Ilaqutariit Heilmannikkut Kalaallit Nunaata siunissaa pillugu akerliussutsimik takutitsipput: – Maanna qanoq nukittutiginersugut takusinnaavarput

AAMMA ATUARUK

Nuummiut Kalaallit Nunaat sorsuutiginiarlugu akerliussutsimik takutitsipput

Inaluk Olsen Heilmann meeqqanilu marluk, Siiva Karlalu, angerlarsimaffimminni Nuummiittumi nerisarfimmi issiapput.

Rundstykkit, Nutella, immussuaq, mamerlede punnerlu neeriviup qaavaniipput.

Trump Kalaallit Nunaallu pillugit oqaluttuat sapaatit-akunnerini kingullerni  siammarmata ilaqutariit Heilmannikkut tusagassiortorpassuarnik angerlarsimaffimminnut qaaqqusipput — qallunaat, tuluit allaallu Italiameersut.

- Nunarput siornatigut soqutigineqarsimanngissinnarluni maanna tusagassiortut sumi tamaani takussaapput, Inaluk Olsen Heilmann oqarpoq, rundstykkemillu spegepølsimik qallikkamik tamusserluni.

Isaariami matu ammarpoq. Inaluk Olsen Heilmannip uia Qulu Heilmann, ullormut tassunga atatillugu erfalasumik nutaamik pisisimalluni, isersimaartarfimmut iserpoq.

Ilaqutariimmi Nuummi akerliussutsimik takutitsinermut peqataassapput.

Akerliussutsimik takutitsineq Donald Trumpip Kalaallit Nunaannik USA-mut ilanngutitsitsinissamik anguniagaqarneranut arfinnngornermi akerliunermik takutitsivissatut pilersaarusiorneqarpoq.

- Taamami sianiitsigisorsuamik aqunneqarusunngilagut, Siiva oqarpoq.

1. klassemi atuartuuvoq.

Qulu Heilmannip Erfalasorput qisummut takisuumut qilersorpaa – nissitoqaq puisinik pisanik umiatsiamut qaqitsinermi atorneqartartoq.

- Tassa pitsaanerusinnaanngilaq, suliani qimerloorlugu oqarpoq.

Karlap, 6. klassimi atuartup,  rundstykkemik peanutbutterimik qallersukkamik tamussiutigaluni ataatani isigaa.

Donald Trumpip Kalaallit Nunaannik tiguaanissaminik kissaateqarnera ilinniartitsisunit atuartunillu oqaluuserineqangaartarpoq, oqaluttuarpoq.

- Ikinngutikkalu tassanngaannaq sorsuttoqalernissaa ernummatigaarput. Taamaattoqarnavianngilaq kisianni suli ernumavugut, Karla oqarpoq.

- Trumpip tigussagaluarpanga nilliallungalu tukertassagaluarpara, Siiva aalajangersimalluinnarluni oqarpoq.

Qaarlini koorput ativai. Taqqama sialualaalersimavoq.

- Anilerutta qarlippaalissaatit, Qulu Heilmann ernerminut oqarpoq.

- Nukissaninnarpoq

Anigamik Inaluk Olsen Heilmann ilaquttanilu ilaquttariinnik allanik sanilinillu akerliussutsimik takutitsinissamut aamma peqataasussanik naapitsipput.

- Ullumikkut amerlasuut peqataassasut neriuutigaara, Inaluk Olsen Heilmann oqarpoq, sialussiutimilu tunuanut erfalasoq pitullugu.

- Suna tamaat isigissagaanni iluaqutaavallaarnavianngitsoq nalunngilara. Arlaannilli iliuuseqarnissarput pingaaruteqarpoq – aalajangiisartunik tunuliaqutsiinitsinnik takutitsinissarput, taamaalillutik taakku kisimiittutut misigeqqunagit, taanna oqarpoq.

Tumpip ullumikkut akerliussutsimik takutitsineq maluginiassagaa isumaqarpisi?

- Naagga, Qulu Heilmann akivoq.

- Taanna pillugu akerliussutsimik takutitsinngilagut. Uangaanngitsoq, Inaluk Olsen Heilmann oqarpoq, nangillunilu:

- Ataatsimoornerput tapersersuinerpullu takutikkusupparput.

Qulu Heilamnn erfalasorsiniarami Dannebrogiaqqamik Erfalasutsinnut ilanngussassaminik pisissanerluni isumaliutigaa.

- Kalaallit Nunaata kunngeqarfimmut naalagaaffeqatigiinnermullu ilaanera takutikkusullugu, taanna nassuiaavoq.

Nuummi arfininngornermi akerliussutsimik takutitsinerup saniatigut nunami sumi tamaani aamma akerliussutsimik takutitsinissaq pilersaarutaavoq – ilaatigut Danmarkimi, Aarhusimi, Odensemi Københavnimilu.

- Pikkunarpoq, nukissamillu tunisivoq, Qulu Heilmann oqarpoq.

- Attortinnanngitsuunngilaq.

Yankee, go home!

Ilaqutariit Heilmannikkut Inatsiartut allattoqarfiata eqqaanut apuunnerminni inuppassuaqartoq takuaat, Erfalasorpullu sumi tamaani takussaavoq.

Inuit sumi tamaanngaannit allagartarsuarnik tigumiartut ornigussorput — ilaqutariit meerartallit, ikinngutigiiaat.

"Hands off", Allagartat ilaanni allaqqavoq. Alla "Yankee — Go Home"-mik allaqqavoq.

Inaluk Olsen Heilmann, Qulu Heilmann, Karla aamma Siiva ilusilersukkap Amisut takusinnaanngorlugit nikuipput.

Nipilersuummik appisimaartoqarpoq, qilaatersortut tusaaneqarsinnaapput inuillu avaallattarput.

- Jens-Frederik!, Inaluk Olsen Heilmann suaarpoq.

Naalakkersuisut siulittaasuat Erfalasorput tuermiullugu inuppassuit akorngisigut ingerlaartoq assiliisartut tusagassiortullu arlallit malippaat.

Jens-Frederik Nielsen (D) Mute B. Egede (IA) politikkerillu allat akerliussutsimik takutitsisut takuniarlugit apussinermut majuarput.

Akerliussutsimik takutitsinermik aaqqissuussisut najuuttunut oqalugiarput. Taallamik atuaasoqareersoq, minutsi nipaallisimasoqareersoq inuit erinarsorlutik appipput.

Erinarsuut “Sorsunnata” atorpaat.

Qulu Heilmann nissik erfalasortalik tigummiarlugu inuppassuit erinarsoqatigiittut isiginnaarlugit qullilivoq.

Erinarsuut eqqissinermut tunngavoq, piffissarlu kingulleq taamaattoqarani.

Inaluk Olsen Heilmannip Donald Trumpip Kalaallit Nunaata pisiarerusunnera siullerpaamik tamanut nalunaarutigimmagu eqqaamarpianngilaa.

- Isumassarsiaq iluarluanngitsutut isigialugu eqqaamavara. Eqqarsarlunga, 'Qanoruna aamma isumaliortoq?', Inaluk Olsen Heilmann oqarpoq.

- Kingornali ingatsikkiartorpoq. Maanna sakkutoorpassuaqarpoq, oqaaserisartagaalu pissutaallutik aningaasarpassuarnik atuisimalluta.

Naak NATO-mi nunat arlallit Kalaallit Nunaannut sakkutuunik tikisitisinermikkut tapersersuinerat qujamasuutigingaluaqalugu, qulimiguullit umiarsuillu sorsuutit Nuummi takussaanerat eqqumiilliuutigaa.

- Timmisartut Herculesit assigiinngitsorpassuillu — ullutsinni takuneq ajukkavut.

Uini meeqqanilu assigalugit Trumpip sioorasaarinini pimoorunneraa ernummatigaa.

- Ilaanni ima eqqarsarpunga: ‘Silaqaraluarnerpa, illu qulaallugu timmisinnarluni illu qaartissinnaallugu?´, oqarpoq.

- Aamma eqqarsaatir unitsinneqarsinnaapput: Naamik, soorunami taamaaliorunnanngilaq.

- Taamaakkaluartoq ataatsimoorpugut

Nalunaaqutaq 13.13 inuit pisullutik aallarput, ilaqutariillu Heilmannikkut aqqusinikkut Tusass sanioqqullugu Aqqusinersuup tugaanut ingerlaarput.

- Kalaallit Nunaat. Kalaallit pigaat – not for sale, Inuit ataatsikkut nilliapput.

Drone qutsissukkut qulaappoq, inuppassuaqarlunilu.

Qulu Heilmann qiiaammisaarluni oqarpoq.

Ingerlaqatigiit Amerikamiut sinniisoqarfiata silataanut unipput. Inaluk Olsen Heilmann ilaqutaalu ungasinngitsumi, KNAPK-p allaffiata eqqaani, takusaqarluarsinnaanerujumallutik unipput.

Sinniisoqarfiup silataani assersuuteqarpoq — politiillu tallimat arfineq-marluk missaanniittut akerliussutsimik takutitsisut nakkutigaat.

Akerliussutsimik takutitsisut ilaat sinniisoqarfiup eqqaaniittoq tassaavoq Tupaarnaq Ella Elsner.

- Siorna akerliussutsimik takutitsinermut sanilliullugu ullumikkut peqataasut amerlanerungaarput, oqarpoq.

- Nuanneqaaq attortinnarlunilu. Killitseqaanga.

Akerliussutsimik takutitsinermi oqariartuut USA-mut anngutissasoq neriuutigaa.

Isumaqarpit Trump tusarnaassasoq?

- Unneqqarillunga oqassaguma naamik, quiatsalluni oqarpoq.

- Amerikamiulli tusarnaarput.

Sumiiffiit ilaanni Gitte Larsilu Drachmann inuppassuarnit peqataanerat tupigusuutigaat.

- Naluaraluunniit taama amerlatigaluta, takulaakkit! Lars Drachmann tikkuarluni oqarpoq.

Aappariit ataqatigiinneq ersersinniarlugu akerliussutsimik takutitsinermut peqataapput.

- Piffissami matumani ataatsimoornissarput pingaaruteqarpoq, Gitte Drachmann oqarpoq.

- Ilaannikkut inuiaqatigiinni avissaartuuttoqangaatsiartoq misigisarpunga, maannakkulli ulluni tatineqarfiusuni ataatsimoornerput malugineqarsinnaavoq.

Oqariartut amerikamiut tusaassagaat neriuutigaat.

- Nunarsuaq tamakkerluguluunniit! Lars Drachmann ilassuteqarluni oqarpoq, nangipporlu:

- Ingasaqaaq. Angut USA-miittoq qasukkaamisariaqaraluarpoq. Tuniniagaanngilagut — pissutsit eqqumiilluinnarput.

Siunissamut namminiilivinnermullu neriuuteqarneq

Inaluk Olsen Heilmann Qulu Heilmannilu nalunaaqutaq 14.15-ip missaani angerlamut ingerlarnialerput.

Qungujulapput ikinngutillu, suleqatit ilaquttallu uniffigalugit ilassiartortarlugit.

Karla Siivalu akerliussutsimik takutitsisut akornanni arpallutik ingerlaarput.

- Inuppassuit takkuttut tupaallaatigaakka. Ataatsimooraangatta nukimmik angisuumik pilersitsisinnaanerput tamassuma takutippaa, Qulu Heilmann oqarpoq.

Akerliussutsimik takutitsineq amerikamiunut kalaallinik amerikamiunngorusunnerannik isumaqartunut paasinnilersitsissasoq neriuutigaa.

AAMMA ATUARUK

Kalaallit Nunaat pissutigalugu Trumpip Danmarki akitsuusiiviginiarpaa

- Akerliussutsimik takututsineq naalagaaffeqatigiinnermik tapersersuisut ima amerlatiginerat paasineqalerlunilu USA-mit tinguarneqarusunnginnitsinnik paasineqassasoq, Inaluk Olsen Heilmann oqarpoq.

Erfalasorput suli uleruaraa.

- Pisut qaangiuppata inuiaqatigiittut nukivut atorlugit nunatsinnik ineriartortitsisinnaanersugut neriuutigaara, oqarpoq.

Namminiilivinnissamik anguniagaqarneq sivisuumik sulissutigineqartussaagaluartoq Kalaallit Nunaata taamaaliornissaa kissaatigaa.

- Ajornartorsiummut aaqqiissutissaqanngilanga, ataatsimoorlutali kivitseqatigiikkutta iluatsissinnaavarput.