Timersorneq ineriartorfiusoq periarfissarpassualik

Futsalimik Ilinniarfimmut akisussaasoq aamma angutinik nunanut allanut futsalimi unammisartunut sungiusaasoq René Olsen, Kalaallit Nunaanni futsalimik sungiusaasartunik ilinniartitsinissamik suliniummik annertuumik ingerlatsivoq:

Aallarterlaaniit sungiusarluarsimasunut — nuna tamakkerlugu, sineriak tamakkerlugu ilitsoqqussaralugu oqaatsit atorlugit, kikkut tamarmik ilinniagaqarnertik iluaqutigilluassavaat.

Suliniummik tamatuminnga Kalaallit Arsaattartut Kattuffiat (KAK) ingerlatsisuuvoq, taassumalu peqatigiiffinnut avatangiisit peqqinnartut isumassarsinartullu pilersinnissaat pingaartippaa. Sungiusaasut piginnaanitik ineriartortissavaat, pimoorussivissaminnik nassaarsinnaallutik taamaalillutillu futsalimi unammisartut ataatsimut isigalugit kivitseqataaffigisinnaalissallugit – arsaattartunut aamma siunissami sungiusaasunngortussanut iluaqutaasussamik.

Inuup aallussilluartuusup ilusilersorneqarnera

René Olsen KAK-mi 2005-imiilli ilaasortaavoq, inuusuttunut inersimasunullu nunanut allanut ­– illup iluani silamilu – unammisartunut sungiusaasuulluni. Aatsaalli 2013-imi pimoorullugu soqutigisaa aallartippoq — futsalip siammaleruttorfiani. 

Elite Sport Greenland suleqatigalugu suliniutip ineriartortinneqarnera aallartinneqarpoq, taamanerniilli timersornerup nuannarineqarnerulernera pitsaanerulerneralu malunnarpoq. René Olsen futsalip timersuutigineqarneranut tinguartippoq, Nunatsinnilu ineriartorfiulluarsinnaanera takusinnaallugu. Illup iluani arsamik unammiuaarneq issittormiuusunut piukkunnarluinnarpoq, silap uneriffeqanngikkajunnera eqqarsaatigissagaanni. Futsali silami unammiuaarnermut taartaannaanngilaq. Illup iluani arsaannermit nalinginnaasumiit futsal teknikkikkut pikkorinnerulersitsisarpoq, tassami passussillaqqissuunissaq, periataallaqqinnissaq ingerlajuaannarnissaallu pisariaqarput. Unammeriuseq sukkaqaaq, sukataarullugu ingerlanneqartariaqarluni, arsaaffiullu iluani iliuuserisassat tamarmik eqqarsaatigilluagassaapput — unammisartut unammillerneqarlutillu isiginnaartunut aliikkusersuutaapput. Ataatsimoortitsinermik, teknikkikkut periuutsitigullu Kalaallit Nunaata timersortarfianni arsartariaaseq tulluartuummat René Olsenip futsal soqutigisarilluinnalerpaa.

Nammineq misilittakkat aallaavigalugit

Renép futsalimi arsaattarneq illup iluani arsaannermit allaanerulluinnarnera paasilertorpaa. Taassuma arsaqatigisartakkanilu illup iluani arsaannermi sungiusimasat qimallugit futsalernermi sukkasuujunissaq teknikkikkullu piumasaqaatinut sungiusaqqittariaqalerneranik kinguneqarpoq. Takorluugaa ersarilluinnarpoq: inuusuttut futsalimik arsaattariaaseqalersinnissaannik periarfissinnissaat. Takorluugarlu piviusunngorpasippoq. 

- Meeqqat inuusuttullu futsalimi unammisarnertik maanna ulluinnarsiutigaat. Uagut allat assigaluta arsaannermi ileqqutoqqat eqqarsaatigisariaqarnagit, taamaattorli arsaattarneq tunngaviatigut ilinniarpaat. Tamanna siunissami arsaattartut aallaqqaataaniilli teknikkikkut nukittunerusut, sukkanerit isumassarsiullaqqinnerunissaannik isumaqarpoq, René oqarpoq. 

René nunanullu allanut sungiusaasooqataa Tekle Ghebrelul aallaqqaataani marluinnaallutik sungiusarneqartut maanna ineriartupallannerup kingunerisaanik futsalertartorpassuupputl.

- Suliniuteqarnissaq pisariaqartoq paasilertorparput. Unamminerit eqqortumik naliliiffigineqarsinnaaqqullugit sungiusaasartut minnerunngitsumillu dommerit amerlanerusut ilinniartittariaqarnerat, René oqaluttuarpoq. 

Taamanerniilli suliniut annertusiartorpoq, misilittagaallu ullumikkut futsalimi unammisartut ineriartortinneqarnerannut sunniuteqangaatsiarsimallutik. - Aallaqqaammut futsalimi misilittakkavut naammattumik ilisimasaqarfigivallaarnagit paasivarput. Ullumikkut allaanerulluinnartumik inissisimavugut. 

– ilisimasaqarnerulersimavugut, aaqqissuussaalersimalluta misilittakkavullu annertusiartorlutik, taamaattumillu anguniagaqarnerusinnaalerlutalu pitsaanerusumik iliuuseqarsinnaalerpugut, René Olsen oqaluttuarpoq.

Skærmip saaniit timersortarfimmut

Futsalip ineriartortinneqarnerani alloriarnerit angusaqarfiulluartut Spaniamiut ilinniarnermut suliffeqarfiutaannik Futsal Profive Academymik suleqateqarneq ilagaat – internetikkut pikkorissartitsineq Kalaallit Nunaanni pissutsinut tulluarsakkamik ingerlanneqartoq. 

- Coronap nalaani internetikkut pikkorissartitsisalersimapput, tamannalu uagutsinnut tulluarluinnarpoq. Avinngarusimasunimi najugaqarpugut, ataatsimullu katerisitsilluni pikkorissaanissaq aningaasarpassuarnik naleqartussaasimassagaluarluni, René qungujulluni oqarpoq. 

Kalaallit sungiusaasut maannamut 150-it missaaniittut 2024-mi 2025-milu Profevi-mik pikkorissartinneqarput – René oqarnera naapertorlugu pikkorissaanerit iluatsilluarput. 

- Internetikkut pikkorissarnerit pitsaalluinnarput, soorunalimi teoriimik ilinniarneq timitalimmik malitseqartariaqarpoq. Taamaattumik 2024-mi ukiakkut nammineerluta qanimut peqatigiilluta ilinniarneq aallartipparput, Aqissiaq Ludvigsenilu tamatuminnga naammassinninnissamut qitiulluinnartumik atuuffeqarpoq, René oqarpoq. 

René Aqissiaq Ludvigsenilu, KAK-mi allattaaninngorlaaq, Futsalimik ineriartortitsilluarlutik sunniuteqarluartumik suleqatigiillualerput. 

- Sungiusaasut sakkussaqarluarneruleraangata timersoqatigiiffimmi sungiusaqatigiinneq pitsaanerulersarpoq. Ilaasortat sungiusarnermi peqataajuaannarput, timersornermik nuannarisaqarnerulertarlutik, Aqissiaq Ludvigsen oqarpoq. 

Taakkua ataatsimoorlutik ineriartorneq kisiat suliarinngilaat, nunatsinnili malugineqarsinnaanissaa qulakkeerpaat.

Oqaatsivut atorlugit unammineq

Upernaviup avannaaniit Nanortallip kujataatungaanut – illoqarfinnilu soorlu Paamiuni, Qeqertarsuarmi, Sisimiuni, Tasiilami, Uummannami, Aasianni Maniitsumilu – kalaallit futsalimik ilitsersuisut nuna tamakkerlugu qanimut pikkorissaajartorlutik angalasimapput. 

Kalaallisut oqaativut atorlugit ilinniartitsillutik, timersortarfinnilu tamani nuannaarnermik takutitsisarlutik. Unammilligassaq annerpaaq maannakkut aningaasanut imaluunniit assartuinermut tunngassuteqanngilaq, oqaatsinulli tunngavoq. Futsal Profive Academymi pikkorissarnerit tuluttut qallunaatullu neqeroorutigineqartarput, tamannalu ilinniartut amerlanerit peqataasinnaanerannut oqaatsit aporfiuneri peqqutaallutik killiliisinnaavoq. René Olsenili annerusumik takorluugaqarpoq — anguniagaqarninilu suliaqarusussusaanut naapertuuppoq. 

- Ilinniartitsissutip kalaallisuunngortinnissaa sulissutigaarput, teknikkikkut suliassarujussuaq, immikkoortulli siulliit nutserneqareerput. Kingunerisaalu sunniuteqalereerpoq. Meeqqat, inuusuttuaqqat inersimasullu namminneq oqaatsitik atorlugit ilinniarsinnaanertik nuannaarutigisaqaat, René oqarpoq. 

Suliniut futsalimuinnaq tunnganngilaq — kinaassutsimut, ataatsimoornermik kalaallisullu ilinniarsimanermik tulluusimaaruteqarsinnaanermut tunngaveqarpoq, Renép oqaluttuarnermini qamannga pisumik qularunnaarsitsisumik oqarpoq. Renép sungiusaasutut pikkorissarnerit tamatigut iluaqutaasarnerat maluginiarpaa, sungiusaasunngorlaallu tunniusimanerat tupaallaatigalugu. Rass Abelsen assersuutissaalluarpoq. Rassi angutini futsalimi nunanut allanut unammisartuuinnarani futsalimi sungiusaasutut ilinniarsimavoq. Tasiilameersuuvoq, illoqarfimminilu pikkorissaanissamik suliakkerneqarnikuulluni.

- Pikkorissareertugut Rassip ornillunga eqeriarlunga ima oqarpoq: Qujanaq periarfissikkamma. Taamatullu saaffiginninnera killitsinnaqaaq ­– piviusorli qiviariaraanni uanga qujasussaagaluarpunga – tamatta inuiaqatigiinnut timersornitsinnullu tunissuteqarnissatsinnut periarfissinneqaratta killitsissimaqaagut, René qungujulluni oqaluttuarpoq. 

Renép internetikkut pikkorissarnerit tunngaviliisutut taavai— sungiusaasunut tamanut tunngavissiisut. KAK-lli suliniutaa, qanimut pikkorissartitsinerit tunngavigalugit ineriartortinneqartoq, pingaarnerpaavoq. Attaveqatigiinneq ineriartortarpoq, misilittakkanik avitseqatigiinneq timersornerlu uummaarissumik ingerlasarpoq. Tassami teknikki periaatsillu kisiisa pineqanngillat – aammali ataatsimoorneq, oqaatsit namminerlu pilersitanik tulluusimaarutiginninneq pineqarput, timersortarfinni Kalallit Nunaannilu. Taamaattumik timersortarfinni aqagu arsartoqalissagaluarpat unamminerinnaanavianngilaq — tassaassaarli futsalimi unamminerit, siunissaqarluartussat.