Arnat nunanut allanut unammisartut misiliummik unamminerni marlunni angusaat akuerineqartut

Unammineq nalunaaqutaq 10.30 aallartippoq, unammisartut Kalaallit Nunaanneersut timmisartumik ualinerani angerlamut, aallassapput.

Unammisut imminnut qanimut attaveqarput, unamminerit nuannersorpassuarnik minutsillu 30-t marluk ingerlaneranni takutitsiffiupput. Unamminerup immikkoortuata siulleq qiteqqullugu Kalaallit Nunaat sisamanik 10-6-imik siuaqqavoq. Isiginnaariat kalaallit erfalasuminnik nassataminnik arlaleriarlutik erfatsitsissarput. GOG piffissamik unitsitsigallarpoq, tamannalu iluaqutaavoq. 11-11-mik kalaallit siuarput.

Muminnermi Kalaallit Nunaat 17-16-imik siuarpoq. Unamminerup immikkoortuata aappaani Kalaallit Nunaat 27-30-mik ajorsarpoq. Kalaallit arsaattartut arlallit ullut tallimat sungiusareerluni nukissaarussimasutut ipput. Unammineq taanna Kalaallit Nunaanniit unammisartut kukkuluttorneri amerlanerunngikkaluarpata ajugaaffigisinnaagaluarpaa.

HH Elitemut unammineq misilinneqaataasoq

Kalaallit Nunaata assammik arsartartui Horsensip HH Eliteiannut tallimanngornermi unammivoq. Pitsaasumik aaqqissuussamillu unamminerup kingorna Kalaallit Nunaata nunanut allanut unammisartuisa paasivaat qallunaat assammik arsartartui suli nallersinnaanngikkallarlugit, nallernissaannullu aqqut suli takisuujusoq. HH Elite 36-25-mik ajugaavoq.

Sapaatip-akunnera nuannerluinnartoq

Sungiusaasup ikiortaanut Kim O. Petersenimut tamanna qularutissaanngilaq.

- Sapaatip-akunnera ingerlalluaqaaq, aasaanerani uninngareernerup kingorna aatsaat ataatsimoornermi peqataavugut, isumaqarpungalu nivissat piareersarluarsimanerat pillugu nersualaarneqartariaqartut.

- Pingaartumik HH Elitemut tallimanngormat unnukkut unammineranni, kukkussutivut annikillisinneqarput periarfissaqarnitsinnilu isertitsisarluta.

- GOG Elitemut unamminitsinni ullumikkut kukkussuteqartarpugut, tamannalu pitsaasunik unammisaqaraangatta tamatigut nalaattarparput.

- Sungiusarnerput maanna ingerlatiinnassavarput, Sungiusaqqinnissarlu Nuummi sapaatip-akunnerani 43-mi pisussaq, qilanaaraarput. Tamatuma kingorna decembarimi Canadami VM-imut anngunniunnerit pissanganartut sioqqullugu sungiusarnerit ataatsimoornerillu ingerlanneqassapput, Kim O. Petersen naggasiivoq.

Aqqunarneq alianartoq

Nunanut allanut unammisartoq misilittagaqarluartoq Kathrine Mikkelsen sisamanngornermi aqqunarpoq.

Sungiusarnermi nalaani Kathrine Mikkelsen orluvoq maligalugulu seeqqumi aappaa ajoquteqalersoq.

Kathrine Mikkelsen siornatigut aqqunartiternikuuvoq, taamaattumik ingerlaannaq paasivaa ajorluinnartumik pisoqartoq.

- Eqqarsaatit qaangeruminaalluinnarput, Kathrine Mikkelsen taama oqarpoq.

- Napparsimasutut qaammatini sisamani tulliuttuni nalunaartariaqassaanga, ajaappissat ajornarluinnartut, taakkualu tamaasa nassatai aqqusaartariaqassavakka.

Katrine Mikkelsenip ajutoornerata saniatigut aamma allat pingasut peqataasinnaajunnaarput, taakkuli tamarmik naartummata pisinnaannginnerannut pissutaasoq nuannerneruvoq.