Periusissaq nutaaq timersornermik pikkorissunut pitsanngorsaataassaaq

Elite Sport Greenlandip ukiuni aggersuni ingerlavissani saqqummiuppaa.

Piffissamut 2026-mit 2029-mut periusissiami nutaami kattuffiup kalaallit timersornermik pikkoriffillit siunnerfeqarnerusumik, ersarissumik piujuartitsisumillu ineriartortinnissaat anguniarlugu suliniuteqarpoq – kalaallit timersortartut nunat tamalaat akornanni unammillersinnaanerulernissaat anguniarneqarluni.

Periusissiaq Kalaallit Nunaata timersornermik pikkoriffilittut inissisimalernissaanik takorluugaqarneq aalaavigalugu suliaavoq, tassani timersortartut peqataaginnaratik aammali nunat tamalaat akornanni pitsaanerpaanik inissinniarnissamut unammillersinnaalernissaat siunertarineqarluni. Elite Sport Greenland naapertorlugu aaqqissuussinerit tamarmik ataatsimut sammiveqassapput – piginnaanilinnit sungiusaasunut aamma peqatigiiffinnit atortorissaarutinut.

– Elite Sport Greenlandip 2026-miit 2029-mut periusissiaq aqqutigalugu kalaallit timersornermik pikkoriffillit pitsaanerusumik atugaqalernissaannut alloriarneq pingaarutilik pisariaqartorlu iliuuseqarfigaa, siulittaasoq Angutinnguaq Hegelund-Tittussen Sermitsiamut oqarpoq.

Ineriartornermut tunngaviit pingasut

Periusissiaq nutaaq pingasunik tunngaveqarpoq. Siulleq tassaavoq timersortartut pikkorissut pioreersutpitsanngorsarnissaat, piginnaasat agguatarlugit aalajangersimasunik piumasaqaateqarluni ammasumik tapersersueriaaseqarneq. Elite Sport Greenland timersornikkut angusat nuannarisaqarnerlu nalilersortassallugit.

Aappaattut piukkunnaatilimmiit timersullammammut ikaarsaarneq pineqarpoq. Timersornerup iluani piukkunnaatillit nuna tamakkerlugu ineriartortinnissaat, sungiusaasunik ilinniartitsinerup nunani tamalaani piumasaqaatinut naleqqussarnissaa aamma timersornikkut pikkorissunut ilisimasanik katersuiffik nuna tamakkerlugu pikkoriffiit qaffakkiartornissaannut atornissaa.

Pingajuattut timersornermik pikkoriffiillit sinaakkutaat sammineqarput. Aningaasaqarnikkut atugassarititaasut pitsaanerulernissaat, nuimaneruneq aamma atortorissaarutit sungiusartarfiillu pillugit oqaloqatigiinnermi peqataanerunissap pisariaqartinneqarnerat periusissiami tikkuarneqarput – ilaatigut Kalaallit Nunaanni Timersoqatigiit Kattuffiat suleqatigalugu.

Nuna tamarmi peqataassasoq

Periusissiami nuna tamakkerlugu tunngaviunissaa pingaartinneqarpoq.

Elite Sport Greenlandip timersornermik pikkoriffillit maligassiuisutut attaveqarnerallu nuimanerulertikkusuppai, taamaalilluni piukkunnaatilinnik sungiusaasunillu ineriartortitsineq Kalaallit Nunaanni sumiiffinni tamani ingerlanneqarnissaa qulakkeerneqassalluni.

Timersortartut piginnaanillit angusarissaarnerat illoqarfinni anginerusuniinnaanngitsoq, nunamili tamarmi ataatsimoornermik, tunniusimanermik inuiaassusermillu tulluusimaarutiginninnermik pilersitsissaaq.

- Ersarissumik anguniagaqarluartumillu siunnerfeqarpugut. Timersortartut, sungiusaasut, kattuffiit peqatigiiffiillu nukittorsarnissaannut – tamatumalu saniatigut nuna tamakkerlugu timersornermik pikkoriffilinnik nukittuunik pilersitsinissamik takorluugaq ataatsimut katersorniarlugu. Periusissiaq una atorlugu siunissamut akisussaaffik tiguarput, siulittaasoq Angutinnguaq Hegelund-Tittussen oqarpoq.

Nunarsuup sinnera ukkataralugu

Periusissiaq Kalaallit Nunaata avataani periarfissanut ersarissumik tunngavoq. Aaqqissuussaanerusumik tapersersuineq, sungiusaasut ilinniarluarsimanerusut aamma aaqqissuussaanikkut sinaakkutit pitsaasut timersortartut piareersarluarnerunissaannut nunanilu tamalaani nuimanerunissamut periarfissaqarnerulernissaannik kinguneqarumaarnera naatsorsuutigineqarpoq.

– Inuit, avatangiisit ataatsimoorfiusullu anguniagaraavut. Siunissaq ungasinnerusoq eqqarsaatigalugu suleqatigiillutalu suliniuteqarutta kalaallit timersortartut angusaqarluarsinnaanerat upperalugu taamaaliorpugut, siulittaasoq Angutinnguaq Hegelund-Tittussen oqarpoq.

Anguniakkat ukiumut iliuuserisassatut pilersaarusiortarnikkut timitalerneqassapput. Sungiusartarfinni, unammiffiusuni ukiullu tulliuttut ingerlaneranni angusatigut malugineqartussaassalluni.