– Naalakkersuisut isornartorsiornerat iluaqutaavoq

Tusareernikuuarput. Kilisaatileqatigiiffiit pisassiissutinik naammattunik tunineqarneq ajoramik Naalakkersuisut isornartorsiortaraat.

Aalisarnermut, Piniarnermut Nunalerinermullu Naalakkersuisup Demokraatineersup Peter Borgip Sikuaq Trawl A/S ukioq manna Tunumi avataani saarullittassiissutinik 2.556 tonsinik pisassissallugu aalajangerpoq.

Peter Borgip taamaalillutillu Naalakkersuisut tupaallannartumik Sikuaq Trawl A/S-imi pisortap piginneqataasullu pingaarnerup Carl Christensenip sakkortuumik isornartorsiuinera akueriniarlugu aalajangerput.

Umiarsuaatileqatigiiffiup pisortaata piginnittullu pingaarnerusup, Sermitsiami januaarip qulingiluaani allaaserisami Naalakkersuisunik isornartorsiuinermini tunuarsimaanngilaq.

Peter Borg nersualaaraa

Taassuma siullermik 2026-mi Kitaani saarullinniarsinnaanermut pisassinneqarsimannginnini pakatsissutigaa. Aappassaanik kalaallit ingerlatseqatigiiffii marluk nunani allani soqutigisaqarluartut, tassa Islandimit Savalimmiuniillu soqutigisaqartut, Kitaani pisassinneqarsimasut kamaatigai.

AAMMA ATUARUK

Sikuaq Trawlimi pisortaq Carl Christensen: – Islandimi Savalimmiunilu pinngitsooratik illaruaatigaatigut

Maannali Peter Borgip Naalakkersuisullu Tunumi saarullinniarnissamut annertuumik pisassiinerat Sikuaq Trawl A/S-imiit nuannaarutigineqalunilu isumalluarfigineqarpoq:

- Dohrn Bankemi saarullittassinneqarnitsigut kilisaaterput Svend C ukioq naallugu aalisarnissamut naammattumik pisassinneqarsimanera nuannaarutigaarput, Carl Christensen Sermitsiamut oqarpoq.

Aamma Naalakkersuisoq Peter Borg nersualaarpaa.

- Naalakkersuisoq, eqqissisimallunilu piginnaasaqarluarpasittoq angusaqarfiusumik ataatsimeeqatigaarput. Maanna siunertaqalerpugut, pisortaq oqarpoq.

Taamaammat Sikuaq pakatsisoq

Naalakkersuisut Sikuaq Trawl A/S-imut Tunumi Dohrn Bankemi saarullittassiissutinik tunniussinerat, eqqaaneqareersutut Carl Christensenip umiarsuaatileqatigiiffiup Kitaani saarullittassiissummik qinnuteqaatip itigartinneqarsimanera pakatsissutiginerata kingorna Sermitsiami januaarip qulingiluaani allaaserineqareersorlu pivoq.

Taanna raajarniarnermut avaleraasartuunullu pisassiissutit kilisaammut ukioq kaajallallugu aalisarnissamut naammanngimmata taamanikkut itigartitsisoqarnera pissutigalugu 2026-p ilarujussua kilisaatertik tulanngasariaqartoq oqarpoq.

– Raajanik avaleraasartuunillu aalisartuaannarutta siunissaq nalorninartoqarsinnaavoq, Carl Christensen oqarpoq.

Sikuaq Trawl A/S-ip nunaqavissunit tamakkiisumik pigineqarnera aningaasatigullu ingerlalluarnera ukiorpassuarnilu misilittagaqarluarsimanera oqaatigaa.

Sikuaq Trawl A/S-ip aalisakkanik tunisassiassanik qaffasinnerpaamik akigitaqartunut ilaajuaannarnera aamma inuttaminut akissarsiaqartitsinerpaasarnera Carl Christensenip aamma erseqqissarpaa.

- Taamaalilluni ingerlatseqatigiiffik Kalaallit Nunaanni inuiaqatigiinnut iluaqutaasumik iliuuseqartuarpoq, taanna oqarpoq.

Naalakkersuisut 2026-mi Kitaani avataasiorluni saarullittassiissutit decembarip 18-iani agguaappaat. Pisassiissutit katillugit 16.000 tonsiupput. Pisassiissutit ingerlatseqatigiiffinnut arfineq-pingasunut agguaanneqarput, taakkunanngalu tallimat 2025-mi pisassinneqarsimapput.

Arctic Prime Fisheries ApS, M/Tr Claudia aamma Tuullik A/S ukioq manna siullermeerlutik Kitaani avataasiorlutik saarullinniassapput. Kitaani saarullinniarnermi ilisimaneqarluartut Royal Greenland A/S, Polar Seafood Greenland A/S, Sigguk A/S aamma Qaleralik A/S ukioq manna pisasseqqinneqarput.

Gudmundur Hanusilu

Carl Christensen toqqaannartumik oqaluttartutut, erseqqissumik oqaaseqartartutut isummaminillu oqaatiginnittartutut ilisimaneqarpoq.

Pisassiissutit agguaanneqarnerannut atatillugu Naalakkersuisut nunanut allanut soqutigisaqarluartunut Kitaani saarullittassiissutinik tunniussinerat Sikuaq Trawl-imiit kamaatigineqarpoq.

Carl Christensen Sermitsiami januaarip qulingiluaani saqqummersumi taama oqarpoq.

Ingerlatseqatigiiffiit Arctic Prime Fisheries ApS aamma Arsuk Food ApS pivai. Islandimi inuussutissarsiortoq pissaaneqangaartoq Gudmundur Kristjánsson Arctic Prime Fisheries ApS-imi, Arctic Prime Coastal ApS-imit pigineqartumi, siulersuisuni siulittaasuuvoq. Línuskip ehf.-ip, Kristjánssonimit 100 procentimik pigineqartup, Arctic Prime Fisheriesip pingajorarterutingajaa pigaa.

Savalimmiuni aalisakkerinermik ingerlatsiviup P/F JFK-p ingerlatseqatigiiffik Malik Seafood ApS aqqutigalugu Arsuk Food ApS-imi 20 procentit inulaarlugit piginneqataavoq. Hanus Hansen P/F JFK-mi umiarsuaatiliullunilu pingaartut piginnittuuvoq.

Carl Christensen: - Alianartumik quiasaarneruvoq

- Paasilluarsinnaavara Islandimi Savalimmiunilu kalaallit illaruaatigineqassagutta. Nunaqavissut ingerlatseqatigiiffii tamakkiisumik siuarsarnagit maanna saarullittassiissutit erlinnartut ingerlatseqatigiiffinnut nunanit allanit soqutigisaqarluartunut tunniunneqarput. Tamanna alianartumik quiasaarneruvoq, Carl Christensen januaarip aallartilaarnerani oqarpoq.

Sikuaq Trawl ukioq manna Tunumi saarullinniarnermi 2.500 tonsinik pisassinneqareersoq saarullinniarneq aallartinniarlugu Svend C-p raajarniarunnaarnissaa pilersaarusiuleruttorpaat, Dohrn Bankimilu avaleraasartoorniartoqartinnagu saarullinniarnissap aallartinnissaa naatsorsuutigineqarpoq.

- Soorlu raajarniartarnitsitut saarulliit akigissaartissallugit taamaalillutalu akileraarutitigut inuiaqatigiinnut iluaqutaasumik tapersersuissalluta naatsorsuutigaarput, Carl Christensen oqarpoq.

Sikuaq Trawlip 2026-mi Kitaani saarullittassiissutit 2.256 tonsit pisassiissutigineqaqqammisut saniatigut Kitaani raajartassiissutinik 4.495 tonsinik, Tunumi suluppaagartassassanik 150 tonsinik nunallu tamalaat akornanni avaleraasartoortassiissutinik pisassinneqarnissi naatsorsuutigaa.

Naalakkersuisut ukioq manna avaleraasartoortassiissutit suli aalajangersimanngilaat. Aalisarnermut, Piniarnermut Nunalerinermullu Naalakkersuisoqarfimmi siunnersortaaneq Iben Funch Døj naapertorlugu upernaap ingerlanerani tamanna pissasoq naatsorsuutigineqarpoq.