Niuertoq akerleriissutaasoq aatsitassarsiortitseqatigiiffimmut Nunatsinni aatsitassarsiornissamut soqutigisaqartumut ilaatinneqalersoq

Avatangiisinut illersuiniaqatigiiffiit aatsitassarsiortitseqatigiiffimmik isornartorsiuinertik aalajangiusimavaat

Australiamiut Amerikamiullu aatsitassarsiortitseqatigiiffiat Critical Metals Corp, Australiamiut aatsitassarsiortitseqatigiiffiannik Tanbreez-imik pisinissaminik suliniuteqaleruttortoq, taamalu Killavaat Alannguanni saffiugassanik qaqutigoortunik piiaanissamut akuersissummik tigusisussanngorunartoq, Romaniami tusagassiorfinnit sammineqalerpoq.

Tusagassiorfiit marluk Romania-Insider.com aamma Ziarul Financiar, Critical Metals Corpsip suliffeqarfiutaata European Lithiumip piginneqataassutaanik misissuisimapput, taakkualu tikkuarpaat niuertoq Romæniamiu-Australiamiu assortuussutaasoq Frank Timis, ullumikkut Londonimi najugaqartoq, ingerlatseqatigiiffimmi piginneqataassutit amerlanerpaartaannik piginnittoq, isertortumillu aqutsisuunerarneqartoq, siunertaqarnerarlugu qulakkeerinninniartutut siunissami Romaniami suliffissuaqarfinnut saffiugassanik saviullu kajungerisaanik siunissami aallaqqaammut suliarinnittarfittut suliffissuaqarnermut illersornissamullu atortussiortunngortinniarlugu.

Heroinimik tigummisaqarneq akilersillunilu peqquserluttuliorsimaneragaaneq

Frank Timis akerleriissutaasorujussuuvoq. Australiami illoqarfimmi Perthimi heroinimik tigummiaqartarnera pissutigalugu arlaleriarluni ukiut siuliini tigusarineqartaraluarluni, aatsitassarsiornermik uuliasiornermillu ingerlatseqatigiiffiit Gabriel Resources, Regal Petroleum, African Minerals il.il. aqqutigalugit aningaasarsiorluarsinnaasimavoq, taamaalillunilu 12 milliardit dollarit missaannik pisuussuteqalersimalluni. Frank Timis akileraarutinik akiliisanngitsutut, ingerlatamini ileqqorluttutut peqquserluuteqarsimasutullu tusagassiutinit oqartussanillu arlaleriarluni misissuiffigineqartarpoq. BBC-p 2019-imi piviusulersaarusiaani “The $10 Billion Energy”-mi (nukissiuut $ 10 Billioninik akilik), Senegalip sineriaata avataani gassisiorfimmik pisineq apeqquserneqarmat, ilaatigut taamaaliortoqarsimasoq oqaatigineqarpoq. Unnerluutiginnissutigineqartut tamatuma kingorna Frank Timis-imit aamma Timis Corporationimit ilumuunnginnerarneqarput.

Senegalimi oqartussat uuliamik isumaqatigiissummut atatillugu akileraarutinik akiliisimannginnermut 250 millionit eurot qanittukkut akiligassiissutigaat. Suliaq tamanna suli naammassineqanngilaq.

Oqartussaasut uppernarsaatissaaleqinertik pissutigalugu misissuinerminnik arlaleriarlutik taamaatitsiinnartariaqartarsimapput.

Frank Timisip ingerlatseqatigiiffiisa ilaat arlallit Jomfruøerne-mi nalunaarsorneqarsimapput – aammattaaq Critical Metals Corp-imut tunngatillugu, Killavaat Alannguanni suliniummik tigusisussaasumut aamma atatillugu. Tamannalu oqartussat akileraartarnermut paasissutissanik pissarsiniarnerannut ajornakusoortitsisarpoq.

Naalakkersuisunut innersuussutissaq suliarineqaleruttortoq

Aatsitassanut naalakkersuisoqarfimmi Frank Timisimik ilisimasaqartoqarnersoq apeqqutigineqarmat, ilisimaneqanngitsoq akissutigineqarpoq. Maannakkorpiarli aatsitassarsiornermut inatsimmi pisinnaatitaaffeqartut pillugit piumasaqaatit naapertorlugit ingerlatseqatigiiffik misissoqqissaarneqarpoq. Tassami ingerlatseqatigiiffik piiaasinnaanermut akuersissummik peqartoq ingerlatseqatigiiffimmit allamit tiguneqarpat, Naalakkersuisoqarfik Naalakkersuisunut innersuussuteqassaaq, taakkualu inaarutaasumik nalilersussavaat ingerlatseqatigiiffik akuersissuteqartutut nutaatut akuerineqarsinnaanersoq.

Allatut oqaatigalugu Critical Metals Corp-ip Killavaat Alannguanni piiaanissamut akuersissut tigusinnaassappagu, Naalakkersuisut akuersissuteqarnissaat pisariaqartippaat.

Misissuinerit ingerlanneqartut

Naalakkersuisoqarfiup inassuteqaataanut ilaasussatut nangaanartoqartitsisoqassanersoq imaluunniit toqqaannartumik mianersoqqussuteqartoqassanersoq, Naalakkersuisoqarfiup pisortaata oqaatigiumanngilaa, Sermitsialli siusinnerusukkut allaaseraa, Naalakkersuisoqarfiup ilisimagaa, Critical Metals Corpsip ingerlatseqatigiiffiutaa European Lithium, Østrigimi Wolfsbergimi litiumimik suliniummut atatillugu aningaasanik peqquserlutsitsisimasutut niuernermillu atornerluisimasutut arlaleriarluni unnerluutigineqarsimasoq, tamanna ilaatigut Østrigimi tusagassiorfinnit marluusunit, Wiener Zeitung-imit aamma Der Standard-imit allaaserineqarpoq, siornalu Sermitsiami aamma allaaserineqarluni.

Taamanikkut Sermitsiap suliat pineqartut aatsitassanut naalakkersuisumut Naaja H. Nathanielsenimut saqqummiuppai, taassumalu oqaatigalugu soorunami ilisimatinneqartuartarluni Naalakkersuisoqarfillu ingerlatseqatigiiffiup ingerlataanik misissuinerarlugu: „Illit ilisimariikkattut Naalakkersuisoqarfimma misissuinerit piumasarineqartut aallartippai, Tanbreezip aningaasaliisartoq taaneqartoq peqatigalugu tunniunneqarsinnaaneranik paasiniaanerit atorlugit qulaajaasoqassalluni.”

Peqqissaartumik misissuinissaq pisariaqartoq

Avatangiisinik illersuiniaqatigiiffik NOAH isumaqarpoq, Nunatsinni aningaasaliisartunik misissuisarnissamik inatsimmik piaarnerpaamik atuutilersitsisoqarnissaa, suliap tamatuma erseqqissaraa. Taamaalilluni suliffeqarfiit soorlu Critical Metals Corp.-itut ittut nunarsuarmi saffiugassanik qaqutigoortunik nunarsuarmi annertunerpaamut akuersissummik pissarsinnginnerini peqqissaartumik misissorneqarsinnaaniassammata:

– Critical Metals Corp-imi piginnittut pillugit nalorninartorsiornerup inuillu pinerluuteqarsimasut akulerussinnaanerisa erseqqissaqqippaat, aningaasaliisartut Kalaallit Nunaanni aatsitassarsiorfinnik pisisut peqqissaartumik misissuiffigineqartalernissaat. Inatsisinik ataqqinnissuteqanngikkunik nunamullu allamut akileraartarunik, taava sooq maani taamaaliorusussanngillat? Aningaasaliisartunik misissuisarnissamik inatsit nutaaq naapertorlugu aatsitassanut naalakkersuisoqarfiup suliffeqarfiit pasinapilussinnaasut misissoraangamigit Danmarkimi inatsiseqarnermut oqartussat suleqatiginissaanut periarfissaqarpoq, inatsilli suli atuutilinngikkaluartoq oqartussat Critical Metals Corp sapinngisamik peqqissaartumik misissortariaqarpaat, NOAH-p oqaaseqartartua Niels-Henrik Hooge oqarpoq.

Piginnittuunermut tunngasut paasiuminaattut 

Aalborg Universitetimi aningaasaqarnermik aqutsinermut professorip Per Nikolaj Bukhip European Lithiumip Critical Metals Corp-illu børsimi nalunaarsorsimaffii piginneqataasullu allattorsimaffii aamma misissorsimavai. Piginnittuunermut tunngasut paasiuminaangaatsiartut isumaqataavoq.

– Pingaarutilik unaavoq, kikkut ingerlatseqatigiiffinnik aqutsinersut kikkullu ingerlatseqatigiiffinnit pissarsinersut paasinngilluinnarmat. Piginneqataasutut allassimasut matumanittaaq aningaaseriveqarfissuit assigisaallu piginneqataasunik tunuliaqutaqarput, taakkulu kikkuunersut ilisimanngilarput.