2025: Nuna tamakkerlugu aatsaat taama kiatsigineqalerpoq
2025 Kalaallit Nunaanni ukiuuvoq kiattoq, uuttortaaviit tamarmik agguaqatigiissillugu ukiumut kiannerupput.
Sermersuarmi 2025-mi qaammatini sisamani aatsaat taama kiatsigisoq uuttortarneqarpoq
Toqqorsivimmiit assi: Leiff Josefsen
Sermersuup qeqqata tungaani ilisimatusarfimmi Summit Stationimi 1991-imili kiassuseq uuttortarneqartarpoq, DMI-llu paasissutissiinera naapertorlugu qaammatit sisamat – apriili, aggusti, novembari decembarilu – uuttortaanerup aallartinneraniilli kiannerpaapput.
"Summit Stationimi decembarimi agguaqatigiissillugu -30,9 °C issippoq, siornatigullu decembarimi taama issikitsigisimanngilaq. Issikinnerpaavvia –30,9°C-uvoq, tamannalu 1991-imiit 2020-mut silaannaap nalinginnaasumik kissassusianit 8,1°C-nik kianneruvoq.
Eqqarsalersitsisoq
- Summit Stationip uuttuinitsinni ilannguteqqinneqarnera eqqarsarnartuuvoq, kisiannili eqqaamasariaqarparput Summit Stationimi uuttortaanerit nunatsinni uuttortaaviit allattulli pisoqaatiginngitsut, silaannaap pissusianik ilisimatooq Caroline Drost oqarpoq. Summit Stationimit paasissutissat 1991-imeersuupput, nunalli ilaani allani 1950-ikkunniit allaat 1800-kkunniit uuttortaasoqartarpoq.
Juullikkunni silaannaap naqitsinerata appasinnerulernera pissutaalluni, decembarimi nuna tamakkerlugu kiassutsit aatsaat taama kitsigaat.
Assigiinngissutsit
"1991-imiit 2020-mut silap pissusiata nalinginnaasumik allanngorarnera Ikerasassuarmi +2,2°C-miit Summitimi +8,1°C-mut nikingavoq. Tunup kujataani Aputiteeq aamma aatsaat taama kiatsigisimavoq qaammammi agguaqatigiissillugu -2,3°C-mik kiassuseqarluni, tassalu decembarimut sanilliullugu 4,9°C-nik kiannerulluni,“ nalunaarusiami allassimavoq.
