Ilulissat eqqaani umimmaliinissaq misissorneqartoq

Avannaata Kommuniani borgmesterip Lars Erik Gabrielsenip, Siumut, Ilulissat kangiani nunami sermersuarmut atasumi Nunatarsuarmi umimmaliisoqarnissaa siunnersuutigaa.

Piniarnermik inuussutissarsiuteqartunut tamanna siunissami aningaasatigut tapertaalluarsinnaasoq, taanna isumaqarpoq. 

Suliniut Ilulissani Aalisartut Piniartullu Peqatigiiffiannit IAPP-mit isumalluarfigineqarpoq. 

Suliaq aallartinneqartoq

Ilulissat kangiani nuna Sermersuarmut atasoq Nunatarsuaq umimmalerneqassappat, tamanna piniarnermik inuussutissarsiutillit siunissami angaasatigut tapertarilluarsinnaagaat, borgmester Lars Erik Gabrielsen isumaqarpoq. 

Taamaattumik Avannaata Kommuniani kommunalbestyrelsi februaari qiteqquttoq ataatsimiimmat, umimmaliisoqarnissaa pillugu siunnersuut oqaluuserineqartunut ilaavoq. 

Siunnersuut kommunalbestyrelsimi amerlanerussuteqartunit taperserneqarpoq. Umimmaliisoqassappat kalluagassat assigiinngitsut, soorlu Ilulissat Kangerluanut nunakkut aalisartut aqqutaat allallu, misissuiffigineqassasut ilaatigut piumasarineqarpoq. 

Suliallu aallartinneqarnissaa siunertaralugu Namminersorlutik Oqartussat attavigineqareersut, Avannaata Kommuniani Aalisarnermut Piniarnermullu Immikkoortortaqarfimmi pisortaagallartoq, Nikolaj Jensen paasissutissiivoq.

Misissuinerit sukumiisut

Namminersorlutik Oqartussat paasissutissaataat naapertorlugit, umimmaliisoqassappat tamanna pitinnagu misissuinerit sukumiisut annertuullu ingerlanneqaqqaartariaqarput. 

Umimmannik nuussineq umimmaliinerluunniit Naalakkersuisut akuersinerisigut taamaallaat pisinnaavoq. Sumiiffik umimmaliiffigineqartussaq piukkunnaateqarnersoq Pinngortitaleriffimmiit misissuiffigineqassaaq. Misissuinermi nunaminertat umimmannit qassinit ivigartorfigineqarsinnaanersut aammalu pinngortitamut kingunissai nalilerneqassapput. 

Umimmaat illersorneqarsinnaasumik passunneqarnissaat qulakkeerniarlugu, uumasut nakorsaat peqataassasoq aamma piumasaqaataavoq. 

Taaneqartut tamarmik piareerpata, umimmaallu suminngaanniit aamma qassit nuunneqassanersut aalajangerneqarpat akuerineqarpallu, umimmattaliinermut pilersaarut tamakkiisoq Naalakkersuisunit akuerineqassaaq. 

Kommunep umimmattaliinissamut kissaateqartup pisussaaffigaa umimmannut aqutsinissamik pilersaarusiornissaq. 

Takornarianik akiliisitsilluni tammajuitsussarsiniarluni umimmanniartitsinerit, qiviunik katersineq aammalu nassuinik atorluaaneq, aqutsinissamut pilersaarummi ilaatinneqarsinnaapput. 

Umimmaat kisinneqartarnisaat, kiisalu umimmanniarnerup nakkutigineqarnissaanut atalillugu aningaasartuutaasut tamarmik akilerneqarnissaat kommunep aamma pisussaafigaa.

Misiliinerit arlaqartut

Ukiut ingerlanerini umimmaliinissaq pillugu suliat assigiinngitsut ingerlasarsimapput. 

Inatsisartunut ilaasortaasimasoq Jess Svane, Siumut, Qeqertarsuarmi umimmattaliisoqarnissaanut periarfissat pillugit 2017-imi Naalakkersuisunut apeqquteqarpoq. Taamanikkut Naalakkersuisuniit akissutigineqartoq naapertorlugu, Qeqertarsuup nunataanut umimmattaliisinnaanermut tunngatillugu, Qeqertarsuarmi naasoqassutsimik misissuineq Qeqertarsuup Kommunigisimasaata 1993-imi aningaasaliiffiginikuuaa. 

Kisiannili Qeqertarsuaq umimmattalissallugu piukkunnanngitsoq misissuinermi paasinarsivoq. Tamanna ilaatigut umimmaat tuttullu nerisarisartagaat ivikkat latinerisut kobresianik taaneqartartut Qeqertarsuarmi nassaassannginnerat peqquteqarpoq.

Suliniut tapersersorneqartoq

Ilulissaniik Nunatarsuaq ukiukkut qimussimik 3 tiimit missaannik ingerlalluni tikinneqarsinnaavoq. Tamaanilu umimmattaliisoqassappat, tamanna Ilulissani nunaqarfiinilu piniartut aningaasarnerannut iluaqutaassasoq, Ilulissani Aalisartut Piniartullu Peqatigiiffianni IAPP-mi siulittaasoq, Peter Frederik Olsen isumaqarpoq.

- Ilulissani piniartunut pisassiissutigineqartartut amerlineqarnissaat IAPP-miit arlaleriarluta qinnutigisarsimagaluarparput, tamannali iluatsittarsimanngilaq. Taassuma saniatigut Nassuttuumi uagut umimmanniarsinnaatitaanngilagut.

- Taamaattumik Nunatarsuarmi umimmattaliisoqarnissaanik suliniut tapersersornarpoq, taanna oqarpoq.

Ukioq manna ukiuunerani Naternamut pisassiissutinit katillugit 120-iusunit, taamaallaat 21-it Ilulissani piniartunut makitsinikkut pisassiissutigineqarput. Taakku naammaqqajanngitsut IAPP-p siulittaasua isumaqarpoq.