AVANNAATA QIMUSSERSUA
Angutimmarik Thygesen Avannaata Qimussersuanngorpoq: Misigissutsit tamaasa atorpakka
Saattormiu 22-nik ukiulik Angutimmarik Thygesen nunatsinni qimussit ukioq manna sukkanersaraat. Taanna Qasigiannguani Avannaata Qimussersuaqarnerani ajugaavoq. Aqqaneq-marlunnik qimmeqarluni aallarami quliinnarnik qimmeqarluni tikippoq. Tamatumunnga suna peqqutaanersoq tikeqqammiinnartoq Sermitsiamit oqaloqatigigatsinni nassuiarpaa.
Angutimmarik Thygesenip Avannaata Qimussersuanngorluni tikikkami ajugaasut pisarnerattut talini qullarpai.
Assiliisoq: Sara Marie Jeremiassen
Angutimmarik Thygesen Avannaata Qimussersuanngoqqammiinnarluni minutsit qulit missaat qaangiuttullu Sermitsiamit oqaloqatigigatsinni suli killitsisimarpaloqaaq.
- Qiasunngunarlunilu nuannaarnarpoq. Misigissutsit tamaasa atorpakka.
Nuannaarnerli initunerivoq.
- Nuannerpoq assut, ukiorsuaq piareersarnikuulluni angusaq taama kusanartigisoq soorunami nuannertorujussuuvoq.
40 kilometerit 1 tiimit minutsillu 38-t missaannik ingerlaareerlugit ajugaanini aatsaat qulakkeerpaa.
- Aatsaat apuulluinnarlunga qulakkeerpara. Aamma angujartortikkama, Angutimmarik taama oqarpoq.
Angutimmarik Thygesen qimminilu Kiinaalik Ilulissani qimmit nakorsaaniittut.
Assi: Nammineq pigisaq
Angutimmarimmi Saattormioqatinilu Anton Street aqqutaa tamaat imminnut qanittunnguullutik ingerlasut GPS-ikkut malinnaaffiginerani takuneqarsinnaavoq.
- Aallarama 1-inngoraluarama tappikunnarluta saneqqutsikkama, taava silammukarluta 1-inngoqqippunga.
Qanoq ilioravit?
- Ingerlasaarilerama silammukarlunga.
Angutimmarik Thygesenip qimmini qujaffigalugit mamarisaanik nerisissamaarpai.
Assi: Nammineq pigisaq
Qimmini iluatatsinniarai
UKIUNI QULINI KINGULLERNI AVANNAATA QIMUSSERSUANI AJUGAASUT
2016: Edvard Samuelsen, Saattut
2017: Edvard Samuelsen, Saattut
2018: William Jensen, Saqqaq
2019: Ville Siegstad, Ilulissat
2020: Corona peqqutigalugu sukkaniuttoqanngilaq.
2021: Kristian Lundblad, Sisimiut
2022: Anton Street, Saattut
2023: Milan Mathæussen, Ilulissat
2024: Thomas Thygesen, Saattut
2025: Henrik Jensen, Ilulissat
2026: Angutimmarik Thygesen, Saattut
Angutimmarik aallarami aqqaneq-marlunnik qimmeqarpoq, tikikkiartoramili quliinnarnik qimmeqartoq takuneqarsinnaavoq.
- Marluk peerakkit qasummata. Aqqutaa aamma pikkunarami assorujuk. Aput nutaajugami sikulu kinernarluni, nunataa atoruminarnerugaluarpoq.
Qimmit inuttartillu suleqatigiilluarsimanngitsuugunik taama angusaqarsimanavianngikkaluarput. Qimmini sukataarluarsimammata akililaassamaarpai.
- Soorunami qujaffigissuakka. Piumasaanik pissuakka, nerisinnissaat tamaasa nerisissuakka.
Sutussappat?
- Qimmit nerisassaat mamarisaat.
Qimmini nerisilluariarlugit ajugaanini nammineerluni nalliussissallugu oqaluttuarpoq.
- Haalimukassuunga unnugu. Aamma nerisitsilaassuugut illusimavitsinni, Avannaata Qimussersua oqarpoq.
Angutimmarik
Thygesenip Saattormioqataa Anton Street Avannaata Qimussersuani normu
2-nngorpoq, Saqqarmiu Markus Jensen normu 3-nngortoq. Paalu Kristensen
Tasiusarmiu normu 4-nngorpoq, Ilulissaneersoq Jonas Kristensen normu
5-inngortoq.
