4000-init amerlanerusut nalunaaquttap-akunneri pisoqqat atuutilerseqqikkusuppaat

Taatsi Fleischerip nittartakkatigut atsiornernik katersuiniarnermi inuit kajumissaarpai nalunaaqutaq UTC-3-mut utertikkusuppassuk atsioqqullugit.

Atsiornerit maannamut 4075-iupput.

Inatsisartuni tamannarpiaq ullumi oqaluuserineqassaaq. Naleqqap Siumullu siunnersuutigaat nalunaaqutaq UTC-3-mut utertinneqassasoq aasaaneranilu nalunaaqutaq aamma atorunnaarsinneqassasoq.

Inatsisinik Atuutsitsinermut Ataatsimiititaliap tamanna taperserpaa, allannguutissatulli siunnersuuteqarpoq aasaanerani nalunaaqutaq aappaagumiit atorunnaarsinneqarnissaa, aamma piffissap 2028-mi allanngortinneqarnissaa inassutigineqarpoq.

Naalakkersuisut akissutaat kialaarpallaanngilaq, ajoqutaasinnaasunillu tikkuussipput.

Kathrine Bødkerip atsiornernik katersuiniarnermi allami inuit kajumissaarpai maannakkut nalunaaqutaq UTC-2 atuutiinnartikkusukkunikku atsioqqullugit.

EU-mi suli aasaanerani nalunaaqutaq atorneqarpoq, Inatsisinillu Atuutsitsinermut Ataatsimiititaliap allannguutissatut siunnersuutaa akuerineqarpat aasaanerani Danmarkimut nalunaaquttap akunnerinik tallimanik ukiukkullu nalunaaquttap akunnerinik sisamanik nikingasalissaaq.

Iluaqutaasut akerleriissutaasullu

Piffissaq pillugu oqallinneq sivisuumik ingerlanneqarpoq misigissutsinillu atuiffiulluni.

Inuit amerlasuut 2023-mi UTC-2-mut allanngortitsineq naammagittaalliutigaat, oqarlutillu meeqqat ullaakkut makinnissartik ajornakusoornerulersikkaat seqineq kingusinnerusukkut nuisalermat.

Tamanna Islandimi ilisimatuup uppernarsarpaa, taassumalu Sermitsiamut oqaluttuaraa seqernup ingerlaarnera ullormut pisarnermit allanngujaatsuunera pingaaruteqartoq.

Timersortartut oqartarput ualikkut nalunaaquttap-akunneranik ataatsimik qaamanerusalernera ukiuunerani timersornermut iluaqutaasoq.

Air Greenlandip ilaatigut oqaluttuaraa Danmarkimit nalunaaquttap-akunnerini pingasuni ungasitsigisumiinnini iluaqutigingaarlugu, aamma UTC-3-mut uterneq aningaasatigut kingunerlutsitsissasoq.

Siunnersuutit ullumi aappassaaneerneqassapput oktobarillu 21-ani pingajussaaneerneqassallutik, tassani inaarutaasumik aalajangiisoqassaaq.