60 millionit koruuninik aningaasaliineq: Peqqinnissaqarfimmut tunngasuni ilinniartut nutaamik sungiusarfeqalissasut
A. P. Møller Fonden Nuummi illumut sungiusartarfittaassamut nutaamut 60 millionit koruuninik tunissuteqarpoq.
ILINNIARTITAANEQ: Peqqinnissaqarfimmi sulisut Nuummi sungiusarfissap ineriartortinneqarnerani inuusaq atorlugu sungiusartut.
Assi: Naalakkersuisut
Suliffinnik misiliivissat amigaatigineqarmata peqqinnissaqarfimmut tunngasuni ilinnialersinnaasut maanna killeqarput. A.P. Møller Fonden-ip aningaasaateqarfia pissutaalluni peqqinnissaqarfimmut tunngasuni ilinniarsinnaasut amerlanerulersinnaalissapput.
Nuummi illumut sungiusartarfittaassamut A.P. Møller Fonden 60 millionit koruuninik aningaasaliivoq. Taamaalilluni peqqinnissaq pillugu ilinnialersinnaasunik ilinniakkaminnillu naammassinnissinnaasunik amerlanerulernissaannik kinguneqassaaq. Illu sungiusartarfittaassaq peqqinnissamut tunngatillugu ilinniartitaanermut, ilinniaqqinnermut piginnaasatigullu inerisaanermut toqqammavissanik nukittorsaassaaq.
- Peqqinnissakkut sullissisunik pisarialinnik ilinniartitsineq sulisussarsiniarnerlu, Peqqinnissaqarfimmut ingerlalluartumut pingaaruteqarluinnarput. Ullumikkut immikkoortortat sulinermik sungiusarfissat amerlassusaat qassinik ilinniartoqarsinnaanermut killiliisuuvoq. Aningaasaateqarfiup A.P. Møller Fondip illumik sungiusartarfiliornissamut aningaasaliineragut - Peqqinnissaqarfimmi kommuninilu amerlanerusunik ilinniartitsinissamut, taamaalillutalu peqqinnissakkut sullissisuni fagini arlalinni siunissami sulisussaqarnissamik qulakkeerinissamut pitsaanerujussuarnik periarfissinneqassaagut, peqqissutsimut inunnullu innarluutilinnut naalakkersuisoq Anna Wangenheim oqarpoq.
ILINNIARTITSINEQ: Nuummi peqqinnissaqarfimmi sulisut Nuummi peqqinnissaqarfinni ilinniartitsinerup annertusarneqarnerani inuusaq atorlugu sungiusartinneqartuq.
Assi: Naalakkersuisut
Illu sungiusartarfittaassaq 1.000 m² missiliorlugu angissuseqassaaq, aammalu peqqinnissaqarfimmi piviusorsiortumik avatangiisinik takutitsissalluni. Tassa imaappoq, illu ilusilersorneqassaaq soorlu eqqortumik katsorsaanermi ininut aammalu annertuumik ajoqusernernut ininut.
Sanaartorneq ukioq manna aallartissaaq
Illu pilersaarutaavoq inissinneqassasoq Dronning Ingridip Napparsimmavissuata qanittuani, taamaalilluni napparsimmavissuaq qanittumik suleqatigineqarsinnaassaaq, aammalu illu atorneqarsinnaalluni annertuumik pisariaqartitsisoqarnerani imaluunniit napparsimmavissuarmi inissaqanngitsoornerani.
Praksis- aamma piginnaanngorsarfimmik illu ukiuni arlalinni peqqinnissaqarfimmi ilinniarfiit kissaatigisaat pingaarutilik aammalu Peqqissutsimut Ataatsimiititaliap inassutigisaa. Illu taamaalilluni siunissami sulisussanik qulakkeerinnittassaaq peqqinnissaqarfimmi aammalu kommunini peqqinnissaqarfimmi sulisut naammattut qulakkeerlugit.
- Illu sungiusartarfittaassaq ilinniartitaanermut piginnaasatigullu inerisaanermut periarfissanik ullutsinnut naapertuuttunik ataqatigiissunillu inerisaanissamut pingaaruteqarpoq. Suliniutip aningaasaateqarfimmit namminersortumit aningaasaliiffigineqarnera, aningaasaateqarfiup inuiaqatigiinni pingaarutilinnik tapersersuisinnaaneranut ilinniartitaanermilu Peqqinnissaqarfimmilu pitsaassutsimik kivitseqataasinnaaneranut assersuutissaqqissuuvoq, isumaginninnermut, suliffeqarnermut, ineqarnermut, attaveqaasersuutinut, isorliunerusunullu naalakkersuisoq Aqqaluaq B. Egede oqarpoq.
Suliniut Nuummi illussanik titartaasarfimmit tnt-mit Peqqinnissaqarfik, Peqqissaanermik Ilinniarfik kiisalu Ilisimatusarfik suleqatigalugit suliarineqarpoq. Ineqarnermut, Attaveqaasersuutinut, Isorliunerusunullu Naalakkersuisoqarfik sanaartortitsisuuvoq.
Sanaartorneq 2026-2027-mi ingerlanneqassasoq naatsorsuutigineqarpoq.
