65-it sinnerlugit ukiullit 53 procentiisa aamma 50-iniit 64-inut ukiullit 38 procentiisa kunngikkormiut pingaartilluinnaraat misissuinerup takutippaa.
Tamanna ukiorpassuarni politikeritut nuimasup Lars-Emil Johansenip tupaallaatiginngilaa:
65-it sinnerlugit ukiullit 53 procentiisa aamma 50-iniit 64-inut ukiullit 38 procentiisa kunngikkormiut pingaartilluinnaraat misissuinerup takutippaa.
Tamanna ukiorpassuarni politikeritut nuimasup Lars-Emil Johansenip tupaallaatiginngilaa:
LARS-EMIL JOHANSEN
Lars-Emil Johansen kalaaliuvoq ilinniartitsisoq politikkeriusorlu; Elisabeth Johansenip ernera.
Johansen Landsrådimut 1971-imi qinigaavoq, Folketingimilu 1973-imiit 1979-imut ilaasortaalluni. Partii Siumut 1977-imi pilersitseqataaffigaa, partiip allattaatut 1977-imi, siulittaasup tulliatut 1978-imi aamma siulittaasutut 1988-imi inissisimavoq. Aamma Namminersorneruneq pillugu Isumalioqatigiissitani 1975-imiit 1979-imut ilaasortaavoq. Kalaallit Nunaatalu Inatsisartuinut qinigaavoq namminersornerullunilu oqartussaanerup 1979-imi atuutilersinneqarnerata kingorna naalakkersuisuni siullerni ilaasortaalluni. Naalakkersuisuni 1986-ip tungaanut ilaasortaavoq, Jonathan Motzfeldtilu kingoraarlugu 1991-imi naalakkersuisut siulittaasuattut qinigaalluni.
- Danmarks Nationalleksikon
- Ukioqqortunerit danskit kunngikkormiui Danmarkimullu atassuteqarneq piumasaqaatitaqanngingajattumik nuannarisuuaat, Lars-Emil Johansen taama amerlatigisut isummernerat pillugu oqarpoq, kunngikkormiullu Kalaallit Nunaannut tikeraaraangamik suli maannamut nuannarineqartaqisut eqqaallugu.
29-nik ukiulik Ingrid Schmidt allatut isumaqarpoq, kunngikkormiut imminut pingaaruteqarpallaanngitsut isigalugit:
- Paasisinnaasara naapertorlugu kalaallit ukioqqortunerit kunngikkormiunik Danmarkimullu atassuteqarnermik pingaartitsinerat eqqarsartaatsikkut sunnerneqarnermik aallaaveqarput. Oqaaseq sunnerneqarsimaneq politikkikkut kanngunartuliat piffissami kingullermi saqqummiunneqartut pissutigalugit atorpara: ilaatigut orsugiammut spiralilersuisimanernullu tunngatillugu, Ingrid Schmidt kisitsisit pillugit oqarpoq.
INGRID SCHMIDT
Ingrid Schmidt kalaaliuvoq 29-nik ukiulik, nunap aningaasaqarnera pillugu ilinniartuuvoq. Taanna tamanut suli saqqumilaartuunngilaq.
Kalaallit Nunaata kunngikkormiut alariartunngilaat
18-it 34-llu akornanni ukiullit taamaallaat 18 procentiisa kunngikkormiut namminneq inuttut pingaartilluinnarpaat.
Lars-Emil Johansen Kalaallit Nunaata kunngikkormiunik pingaartitsivallaarunnaarnerat, namminiilivikkusuttut amerliartuinnarnerannik aallaaveqartoq isumaqarpoq.
KUNNGIKKORMIUNIK QULLERSAQARNEQ
Kunngikkormiunik qullersaqarneq tassaavoq naalakkersuinikkut aqutseriaaseq tunngaviusumik inatsit aallaavigalugu kunngiusoq killiimmik pissaaneqartinneqartoq. Aqutsinerlu ministerinit akisusaaffilimmik pissaanermik ingerlanneqartoq.
- Danmarks Nationalleksikon
- Nammineerluta qinigarinngisatsinnik nunami allamiunik kunngikkormioqarnerput ataqqinartutut isigiinnarsinnaanngilarput.
- Nalunngilara kunngi qinigaanngitsoq, Danmarkili taama naalakkersueriaaseqarnissaq nammineq toqqarpaa: Kunnikkormiunik qullersaqarnissaq. Tamanna danskinit kingornussaraarput, namminerlu piumassutsitsinnit aalajagingarinagu, Lars-Emil Johansen itisiliivoq.
Inuusuttuusugut kunngikkormiut suliassaqarfii ilisimanngilagut
Kunngikkormiut sunik suliassaqarfeqarnerat Ingrid Schmidtip ilisimanagu oqarpoq, isumaqarporlu kunngikkormiut pillugit inuusuttunut paasititsiniaasarneq naammanngitsoq, taamaattumillu kunngikkormiut pingaartinneqarpallaaratik.
- Sumi atuuffeqarnersut naluara, tamannali ilisimagaluarukku immaqa kunngikkormiut pingaartinnerussagaluarpakka, Ingrid oqarpoq.
Naligiinnginneq kalaallit kunngikkormiunut atassuteqarnerannut sunniuteqartoq
Lars-Emil Johansenip Danmarkip Kalaallit Nunaatalu naligiinnginnerat kunngikkormiunik isiginnittaatsimut sunniuteqartoq nalilerpaa.
- Tunngavitsigut naligiinngilagut, aningaasatigut naligiinngilagut, peqqinnissaqarfimmut tunngatillugu naligiissitaanngilagut, taakku assersuutaasinnaapput.
- Danmarkip Kalaallit Nunaatalu nunat naligiimmik inissisimaffeqarnerannik takorluuineq piviusorsiornerunngitsoq akuerisariaqaraat isumaqarpunga, Lars-Emil Johansen oqarpoq.
