Meeqqat atuarfiat pillugu oqallinneq Nivi Olsenip nuannaarutigaa
Meeqqat atuarfiannut inatsimmut allannguutit, atuartunut nukarlernut atuartitsissutinik akunnernillu atuartitsiffiusunik ikilisaanermik kinguneqartussat, innuttaasunit oqallisigineqangaatsiarput, tamannalu Ilinniartitaanermut Naalakkersuisup Nivi Olsenip nuannaarutigaa.
Meeqqat atuarfianni atuartitsinermik allannguiniarluni inatsisissatut siunnersuut inuppassuarnit qisuariarfigineqartoq Nivi Olsenip paasisinnaavaa.
Toqqorsivimmit assi: Leiff Josefsen
Naalakkersuisut ilaatigut nukarliit alloriarfianni qallunaatut ilinniartitsisarnerup atorunnaarsinneqarnissaat atuartut ilinniarnertuunngorniarfimmut ilinniakkanullu qaffasinnerusunut danskisut ilinniartitsiffiusunut ingerlariaqqinnissaannut periarfissanik ajornerulersissagami ernummatigineqarlunilu isornartorsiorneqarpoq.
iInuusuttut ilinniaqqinnissamut periarfissaat ajornerulersinnagit kalaallisut ilinniartitaaneq qanoq siuarsarneqarsinnaanerspq taamaammat unammillernartuussaaq.
Peqataalluartut
- Meeqqat atuarfianni atuartut nukarliit atuartinneqarnerannut allannguutissatut siunnersuutaasunut annertuunut amerlasuut qisuariaataat paasilluarpakka. Isumaqarpunga meeqqanut atuarfitta oqallisiginerani kattuffiit inuillu ataasiakkaat ernumaammerlutik isummersorlutillu peqataalluarnerat, isummiussanillu pitsaasunik ilanngussinerat inuiaqatigiinni demokratiskiusuni peqataanermut pitsaasumut peqqinnartumullu takussutissaasoq – kikkullu tamarmik oqallinnermut pitsaasumut peqataanerat qujassutigaara, Ilinniartitaanermut Naalakkersuisoq Nivi Olsen tusagassiutitigut nalunaarummi oqarpoq.
„Meeqqat atuarfiata anguniagaa annikillisanngikkaluarlugu“ atuartitsissutit ikinnerulersillugit atuartullu itisiliinissaminnut piffissaqarnerulersillugit meeqqat atuarfiat pillugu inatsimmut allannguutissatut siunnersuutikkut atuartut nukarliit ullut atuarfigisaasa pisariusuunnginnissaat ataqatigiinnerulernissaallu siunnerfigineqartoq taanna ilisimatitsivoq.
- Kalaallit oqaasii, nunatsinni oqaaserisagut meeqqallu atuarfianni atuartut amerlanerpaat oqaaserisaat, pingaartippagut nunatsinni ilisimasatigut kulturikkullu tunngaviullutik oqaasiummata, atuartullu taakkuninnga eqarisaqaratik atuinissaat pingaartuummat – tamanna ilisimatusarnerni assigiinngitsuni atuartut oqaatsini assigiinngitsuni atuartitsissutinilu allani ilinniagaqaqqinnissaannut tunngaviusutut isigineqarpoq. Oqaatsinik allanartanik pitsaanerpaamik atuisinnaalissagutta tunngaviuvoq nammineq ilitsoqqussaralugu oqaatsitsinnik atuilluarsinnaanissarput tamanna oqaatsinik allanik ilikkarnissamut tunngaviliisuussammat, Nivi Olsen oqarpoq.
Ilitsoqqussaralugu oqaatsit atorlugit ilinniartitsineq
„Qallunaat oqaasii qallunaallu oqaasiini imaluunniit ilitsoqqussaralugu oqaatsini allani atuartitsineq suli nukarliit alloriarfianni pisariaqartitsisoqartillugu ingerlanneqarsinnaassammat“ taassuma erseqqissarpaa.
Allannguutissat atugarissaarnerulersitsisussaasut, tunngaviusutigut piginnaasaqarfinnik nukittunerulersitsisussaasut meeqqallu atuarnerannik ataqatigiinnerulersitsisussaasut Nivi Olsenip aamma erseqqissarpaa.
Oqaatsit arlallit atorlugit ilinniarnerup kingusinnerusukkut ilinniagaqarnerup iluani angusaqarluarnissamut periarfissat annertusisarai Ilisimatusarfimmi Ilinniartitaanermut Ilisimatusarnermullu Immikkoortortaqarfimmi ilisimatusartut ilisimaneqareersut tunngavigalugit ilaatigut oqaatigaat.
Tusarnaarusuttoq
Nivi Olsenip ilisimatusarneq qujamasuutigalugu „iisornartorsiuinerillu tusarnaarusullugit“ KNR-imit apersorneqarnermini oqaatigaa.
Maanna inatsisissatut siunnersuut Inatsisartut upernaakkut ataatsimiinneranni oqaluuserineqartinnagu tusarniaanermi akissutit amerlasuut misissorneqarnerat aallartissaaq.
