Inuk atisaqanngitsunik assilisanik videolianillu allap pigisaanik tatisilluni sioorasaarisimasutut unnerluutigineqartoq

Inuup ataatsip alla pinngitsaaliilluni akiliisitsiniarsimasutut politiinut nalunaarutigisimavaa. Kalaallit Nunaanni Politiit pigaartuisa pisortaat Aputsiaq Hansen taama ilisimatitsivoq.

- Pineqartoq atisaqanngitsunik assilisanik videolianillu allap pigisaanik tatisilluni sioorasaarisimasutut unnerluutigineqarpoq. Tassa inuk akilerneqanngikkuni atisaqanngitsup assiinik siammarterinissamik sioorasaarisimavoq, Aputsiaq Hansen oqaluttuarpoq.

Pinngitsaaliilluni aningaasanik akiliisitsiniartarnerit tamarmik inerteqqutaapput, ingammik assilisat nammineq pigisat allanut ingerlateqqinneqarnissaat siunertaralugu pinngitsaaliilluni aningaasanik akiliisitsiniartarnerit politiinut nalunaarutigineqarsinnaapput, pigaartut pisortaat erseqqissaavoq.

Suliaq misissorneqartoq

Pisoq politiinit misissorneqartoq Aputsiaq Hansenip oqaatigaa.

- Taamaammat suliaq pillugu oqaaseqarsinnaanngilanga, nalunaaruteqartoq imaluunniit nalunaarutigineqarsimasoq pillugu. Namminerli assiutit allanut ingerlateqqinnissaat mianersuunneqartariaqartoq erseqqissaatigiumavara, Aputsiaq Hansen oqarpoq.

Innuttaasunut qanorluunniit peqquserluffigineqarlutik pinngitsaalineqarunik politiinut saaffiginnittassasut politiit kajumissaaruteqarput. Aamma kinguaassiuutinut tunngagaangata.