Aammaanermi oqalugiaatip oqallisigineqannginnerani: Illuatungiliuttut Jens-Frederik Nielsen oqalugiareersorlu iliuusissat tigussaasut ujartorpaat

Jens-Frederik Nielsenip ammaanersiorluni oqalugiarnermini akisussaassuseqarluni aningaasaqarnerup, atugarissaarnerup nukittorsarneqarnissaa nunanilu tamalaani Kalaallit Nunaata sunniuteqarnerulernissaa taakkartorpaa. Nunap siunissaa pillugu suleqatigiittoqarnissaa ataatsimoorlunilu akisussaaffeqartoqarnissaa aamma kaammattuutigaa.

Partiit politikki pillugu oqaaseqartartuisa oqalugiaammi amigaatigineqartutut isigisaat assigiikannerpoq : Politikkikkut anguniagassarpassuit qanoq ilillugit timitalerniarneqarpat?

Vivian Motzfeldtip (D) Kalaallit Nunaata nunani tamalaani inissisimaffia aamma nunatsinni unammilligassat aaqqinneqarnissaasa tikkuarneqarnerat maluginiarpaa.

– Oqalugiaataa naatsuaranngorlugu oqaatigissagaanni nunatsinni angerlarsimaffitsinninngaanniit nunarsuup sinneranut tunngassuteqarpoq. Massakkullu nunarsuarmi pisuni nunarput siuliani akuutinneqarnanilu toqqaannaq sunnersimaneqarnera taama sakkortutigineq ajorpoq, oqarpoq.

Peqqinnissaqarfimmi, ilinniartitaanermi meeqqanillu isumaginninnermi unammilligassat aamma eqqaavai.

Erik Jensenip aaqqiissutissat aalajangersimasut amigaatigai

Erik Jensenip (S) akisussaaffeqarnerup, angajoqqaat aamma akisussaaffeqarnerat kiisalu kiffaanngissuseqarluni oqaaseqarsinnaatitaanerup pisussaaffinnik nassataqarnera pingaarnertut maluginiarpai.

Ilaatigut nunaqarfinni mikinerusuni pissutsit eqqakkanillu isumaginninnerup ajornartorsiutaanerat eqqaavai.

– Isorliunerusuni nunaqarfippassuarnilu atukkat ilungersunarsiartorput. Eqqaaveqarneq nunarput tamakkerlugu ajornartorsiutaavoq, ataasinnguamilluunniit eqqaaneqanngilaq, oqarpoq.

Aamma aalisarneq aalisarnermullu inatsit oqalugiaammi oqaatsimik ataatsimilluunniit eqqaaneqannginnerat isornartorsiorpaa.

Innuttaasut ajornartorsiutaat inunnut ataasiakkaanut akisussaaffimmik tunniussinikkut aaqqinneqarsinnaannginnerat aamma naqissuserpaa. Aaqqissuussaaneq ilaatigut pissutaalluni inuit ataasiakkaat maanna inissisimaffimmiilersimanerat oqaatigaa.

Naalakkersuisunit suleqatiginnikkumallutik assammik isaassinerat Siumumiit tikilluaqqusaasoq Erik Jensenip aamma oqaatigaa, taamaattorli illuatungiliuttut inissisimaffiannik ataqqinninnerunissaq ujartorlugu.

Naleqqap piffissaliisoqarnissaa piumasaraa

Jens Napãtuup qineqqusaarnermi neriorsuutigineqartut qaqugu iliuuseqarfigineqarnissaat aamma amigaatigai.

– Neriorsuuterpassuit. Qineqqusaarnerminni neriorsuuterpassuaqariarlutik timitalersornissaannut qanoq qaqugulu ersarissumik oqaatiginngilaat, oqarpoq.

Oqaatsit kusanartut naammanngitsut Napãtôp tikkuarpaa. Neriorsuutit pilersaarutinik piviusunik piffissalersorneqartunillu timitalerneqassapput. Naleqqamiit Inatsisartunut ilaasortat arfineq-pingasuusut aamma qinersiseqarmata tusaaniarneqartariaqarnerat pingaaruteqartoq naggataagut oqaatigaa.

Isumaginninnerup aaqqissuuteqqinnissaa Atassutip sulissutigissavaa

Bentiaraq Ottosenip Atassummeersup isumaginninnerup kommunerujussuillu aaqqissuuteqqinneqarnissaat ujartorpaa.

Kommunerujussuit pilersinneqarmata isumaginninnerup iluani suliassaqarfiit sumiginnarneqarsimasut taanna isumaqarpoq, innuttaasullu qanimut sullinneqarsinnaanngorlugit sinaakkusersuinissaq piffissanngorluni.

– Kommunit kiffartuussinerminni periarfissaat pitsaanerulertariaqarput. Inuiaqatigiit qaninnerusumik kiffartuunneqarnissaat suliarisariaqarparput, oqarpoq.

Inuit Ataqatigiit ilaqutariit atugarissaarnerulernissaat meeqqallu atuarfiata aaqqissuuteqqinneqarnerat sulissutigissavaat

Mimi Karlsenip Inuit Ataqatigiinneersup ilaqutariit ulluinnarni atugaasa pitsanngorsarneqartariaqarnerat, ilaatigut aningaasaqarnermut, aalisarnermut allanullu tunngasunut ilaqutariit ulluinnarni inuunerannut attuumassuteqartunut tunngatillugu erseqqissarpaa.

Naalakkersuisut meeqqat atuarfiata aaqqissuuteqqinnissaanut siunnersuutaat suliarineqaqqissasoq Inuit Ataqatigiit aamma kissaatigaat, ilaatigut immikkut ilisimasallit sulinermut peqataatinneqartariaqarnerat piumarissallugu.

- Meeqqat atuarfiisa pitsanngorsarnissaannut qanoq iliuuseqartoqartariaqarnerata pisariaqarnera erseqqissassavarput. Meeqqat ingerlalluarnissaannut meeqqat atuarfii pingaarutilerujussuummata allannguinerit qanoq ittut kissaatiginerlugit oqariartuutigissavagut.

Peqqinnissaqarfiup utoqqarnullu atugassarititaasut pitsanngorsarneqarnissaat partiimiit aamma anguniarneqarpoq.

Utoqqaat Kalaallit Nunaanniiginnarniassammata inissaqartinneqarnissaat qulakkeerneqartariaqartoq taassuma tikkuarpaa.

- Utoqqaat Nunatsinni najugaqaannarnissaat siunertaralugu inissaqartinnissaat pingaaruteqarpoq. Utoqqarnut inissialiortiternissaq pingaartillugu aamma oqaatigissavarput, Mimi Karlsen oqarpoq.

Inatsisartut Naalakkersuisut siulittaasuata aammanermi oqalugiaataa oqallisigissavaat

Jens-Frederik Nielsenip oqalugiaataata Inatsisartut oqallisiginissaat ataasinngornermi pisussaagaluartoq, sisamanngornermut septembarip 24-anut kinguartinneqarpoq. Naalakkersuisut siammasissummik suleqatigiinnissamut kaammattuillutik suleqatigiinnissamut neriorsuuteqarput, partiilli arlallit pilersaarutinik tigussaasunik nunamilu unammilligassat pillugit erseqqinnerusumik saqqummiisoqarnissaa ujartorpaa.