Aaqqissuisoq: Amerikami innuttaasunut akerliussutsimik takutitsivugut
Akerliussutsimik takutitsinermik aaqqissuussisoq Aqqalukkuluk Fontain ulloq akerliussutsimik takutitsiffissaq nalaatsornerinnakkut toqqarneqarsimanngitsoq Sermitsiamut oqarpoq. Kalaallit Nunaanni Amerikamiut sinniisoqarfiata ammarneqarnera soorunami amerikamiunit tusagassiuutitigut sammineqarnissaa pissusissamisoorpoq. Akerliussutsimillu takutitsisut paatsuugassaanngitsumik oqariartuuteqarput: Naamik naamiuvoq!
Aqqalukkuluk Fontain akerliussutsimik takutitsinissamik aaqqissuussisuuvoq.
Assi: Oscar Scott Carl
- Naamik naamiuvoq!
Nuummi akerliussutsimik takutitsisut Amerikami innuttaasunut taanna oqariartuutigaat. Aaqqissuisoq Aqqalukkuluk Fontain sisamanngornermi ualikkut akerliussutsimik takutitsinissap aallartinnissaa sioqqullugu oqarpoq.
- Akerliussutsimik takutitsineq Donald Trumpimut taassumalu aqutsineranut tunnganngilaq, naalakkersuisuttami naaggaarnertik erseqqissumik naqissusereernikuuaat. Kalaallit Nunaat nuna tamat oqartussaaqataanerannik tunngaveqartoq amerikami innuttaasunut oqariartuutigineqarpoq. Amerlanerussuteqartut naaggaarpata tamanna atuutissaaq, Aqqalukkuluk Fontain oqarpoq.
Nuna tamat oqartussaaqataanerannit tunngaveqartoq
Aqqalukkuluk Fontain Sermitsiamit oqaloqatigineqarnerani inuit hunnorujulikkaat Inatsisartut allaffiata silataani katersuupput.
Akerliussutsimik takutitsisut Inatsisartut allaffiata silataaniit Nuup qeqqatigoorlutik sinniisoqarfiup nutaap tungaanut ingerlaassapput. Akerliussutsimik takutitsisut sinniisoqarfik tunullugu minutsit marluk nipangerlutik nikorfallutik naammaginninnginnertik takutissavaat.
Inuit 400-t missaanniittut akerliussutsimik takutitsinissamut peqataasut Inatsisartut allaffeqarfiata silataaniipput.
Assi: Oscar Scott Carl
Aaqqissuisoq ulloq akerliussutsimik takutitsiffissaq sinniisoqarfiup ammaanersiorneqarnerani pisussanngorlugu toqqarneqarsimaso oqarpoq, taamaalilluni Kalaallit Nunaata oqariartuutaa Amerikami innuttaasunut anngunnissaanut periarfissaqarnerussammat.
- Akerliussutsimik takutitsinissap pillugu arlalinnit saaffigineqarpunga, takusinnaavaralu inuit misigissutsiminnik ersersitseqqinnissartik pisariaqartikkaat. Kissaatigaarput inuit kamannertik, ernumanertik misigissutsitillu aniatissinnaassagaat.
