Ajoqusernermik kingunerlutsitsivipalaaq

Facebookinni ullualuit matuma siorna ima allappunga: Fucking traumaland (ajoqusernermik kingunerlutitsivipalaaq, aaqq.).

Inuusuttut annaasagut pillugit aliasunnermik misigigama, aammali qanoq iliuuseqarsinnaanngitsutut misigisimanermik taama allappunga.

Naak qanoq isumaqarninnik sukumiisumik nassuiaateqanngikkaluartunga amerlasuut isumaqataapput. Suna eqqarsaatigineriga allakkanni apeqqutigineqarpoq. Ilaatigut akivara: Kalaallit Nunaanni kinguaariippassuarni annertuallaamik ajoqusernermik kingunerlutsitsineq.

Assersuutigalugu Kalaallit Nunaanni imminut toquttartut amerlassusaat ukiuni amerlasuuni qaffasissorujussuusimavoq. Amerlassusaat takutinniarnerani agguaqatagiisillugu sapaatip akunneranut ataatsimik imminut toquttoqartarpoq. Kisitsisit tamarmik tunuanni inoqat, ilaqutariit inuiaqatigiillu akornanniittut ipput. Savalimmiuni, Kalaallit Nunaata inuttussusianut sanilliunneqarsinnaasumik amerlassuseqartuni, ukiumut 1–3-it missaaniittut imminut toquttarput.

Nassuiaatit, misissuinerit ilisimatusarnerillu amerlaqaat. Kisianni suli aaqqiissutissamut qanillinngilagut.

Kingunerluutigisanik nalaataqarsimanerit pissutsinut amerlasuunut attuumassuteqarsinnaasut inuiaqatigiinnik ilisimatusarnerup takutippaa: piitsuuneq, inuiaqatigiinni naligiinnginneq, atornerluineq, nakuuserneq, kinguaassiuutitigut atornerluineq, meeraanermi atugassarititaasut ajornakusoortut, suliffissaaleqineq, avinngarusimaneq periarfissakinnerlu. Aningaasaqarnikkut inuiaqatigiinnilu pissutsit, imigassaq ikiaroornartullu allat, meeraanermi ajornartorsiutit, aaqqiagiinnginnerit kiisalu ilinniarnissamut suliffissaqarnissamullu periarfissat ataatsimoorlutik sunniuteqarsinnaasut Kalaallit Nunaanni ilisimatusarnerit aamma takutippaat.

Kalaallit Nunaat kisimiinngilaq. Issittumi sumiiffinni arlalinni kiisalu nunani inoqqaaqartuni allani ajornartorsiutit assingusut takussaanerupput. Kisianni immaqa aamma peqqutaaqataasumik allamik oqaloqatigiissutigivallaanngisatsinnik peqarpoq.

Kulturikkut assigiinngissutsit

»Kulturikkut assigiinngissutsit« oqallisigigaangatsigit kulturimut tunngasoq oqaaseq nassuiarneqanngitsoq oqaatigineqakkajuppoq. Kisianni sunaana piviusumik eqqarsaatigisaripput?

Akissutissat ilaat immaqa aaqqiagiinnginnernik qanoq iliuuseqarfiginnittarnitsinniippoq.

Inuit inuiaqatigiivini ileqqutoqqani ilaanni aaqqiagiinnginnerit toqqaannanngitsumik aaqqinniarneqartarsimasut inuiaqatigiilerinermik ilinniagallip Jean Briggsip nassuiarpaa. Toqqaannartumik assortuunnissaq pinngitsoortinneqartarsimavoq, inuit imminnut nammineersinnaanerat ataqqineqartarsimavoq, quiasaartoqartarsimavoq aaqqiagiinnginnerluunniit qatsullugu unitsinneqartarsimalluni.

Tamanna Inuit kalaallilluunniit tamarmik taama attaveqartarnerannik, assigiinngissutsilluunniit tamatuma inuiaqatigiinni ajornartorsiutinut nassuiaataaneranik isumaqanngilaq.

Kisianni attaveqatigiinnermi ileqqut taamaattut Europamiorpalaartut ingerlatsinermik kulturikkut naapikkaangata, ajornartorsiutit toqqaannartumik oqaatigineqarnissaat, oqallisigineqarnissaat assortuunnikkullu aaqqinneqarnissaat naatsorsuutigineqartillugu susoqartarpa?

Tamanna aamma angajoqqaat meeqqallu akornanni, ilinniartitsisup atuartullu akornanni, innuttaasup pisortallu akornanni suliffimmiluunniit pisinnaavoq. Ilaasa attaveqatigiinneq illersorniarlugu toqqaannartumik aaqqiagiinnginnissaq anguniartillugu, allalli ammasumik toqqaannartumillu oqaloqatigiinnissaq naatsorsuutigippagu, marluullutik aappaa ajornartorsiortitsisutut ataqqinninngitsutulluunniit misigisinnaavaat.

Assigiinngissuseq tamanna qanoq ersarissarlugulu ulluinnarni aqussinnaavarput?

Immaqa kingunerluuteqarneq, piitsuussuseq atornerluinerlu kisiisa oqallisigissanngilagut. Aamma qanoq attaveqatigiittarnerluta, kamannermik, kanngusunnermik aaqqiagiinnginnernillu qanoq iliuuseqarfiginnittarnerluta, kiisalu oqaluttuarisaanerput inuiaqatigiinnilu atugassarititaasut qanoq sunniuteqartarnersut oqallisigisariaqarpagut.

Immaqa aamma inuit pissutsit ajortut kipitittaraat, taakkulu qanoq ikorfartorsinnaanerlugit sammisariaqarparput.

Aniguisut amerlanerunissaat qanoq ikorfartorsinnaavarput?

Tamanna kisimiilluni ajornartorsiutinik aaqqiinavianngilaq. Kisianni immaqa tassaasinnaavoq aaqqiissutissatut eqqarsaatigisariaqakkatta ilaat, siornatigut eqqumaffigivallaanngisarput.