Amerikamiut illersornissamut ministeriata oqalugiarnermini Kalaallit Nunaat arlaleriarluni eqqaavaa

USA-p præsidentiata Donald Trumpip Kalaallit Nunaat pillugu tamanut oqaaseqarneraniit piffissaq sivitsorpoq, illersornissamulli ministeria, Pete Hegseth, qanittukkut oqalugiaammini Kalaallit Nunaat eqqaavaa.

Decembarip arfernani oqalugiaammini ministeritut suliassani ima eqqaavai:

- (…) Nunarsuup kitaani ikiaroornartunik pinerlunniat toqorarnissaannut ministeriaqarfiup suliassaasa ilagiinnanngilaat. Nunarsuulli illuata tungaani naalagaaffittut soqutigisavut aarlerinarsinnaasunut illersortussaavagut.

- Tamanna eqqarsaatigalugu ministeriaqarfiup pisariaqaraangat præsidenti tutsuiginartumik periarfissaqartittuassavaa, Pete Hegseth oqarpoq, nangillunilu Kalaallit Nunaat eqqaavaa:

- Tamatumunnga Amerikamiut sakkutooqarnikkut niuernikkullu nunanut pingaarutilinnut soorlu Panamap Kanaalianut, Caribiamut, Amerikap Kangerliumanersuanut, Issittumut Kalaallit Nunaannullu isersinnaanerannik qulakkeerinninneq ilaavoq,  Pete Hegseth oqarpoq.

- Pimoorsussisumik iliuuseqarnissamik piareersimasoqarpoq

USA saniliminik suleqateqarnissaminut piareersimasoq, naammattumilli iliuuseqartoqanngitsoq USA-miit isumaqartoqarpoq kinguneqarsinnaasoq, aamma nassuiaatigaa.

- Tamatumunnga tunngatillugu nunanik sanilitsinnik tatiginnilluta suleqateqarnissatsinnut piareersimavugut, ataatsimulli soqutigisavut illersorumallugit taakku aamma iliuuseqartariaqarput. Taamaattoqanngippat amerikkarmiut soqutigisaat siuarsarniarlugit sorsunnermut ministeriaqarfik pimoorussisumik iliuuseqarnissamut piareersimavoq.

Illersornissamut ministerip, septembarimi ministereqarfiata taaguutaata allanngortinneqarnerata kingorna aamma sorsunnermut ministeritut taaneqarsinnaasoq, USA-p nunarsuup kitaani sakkutooqarnikkut pissaaneqarnerulernissani anguniagarigaa aamma oqaatigaa. 

Trumpip naalakkersuinerata nalaani Monroe-doktrin uummaareqaluni suli atuuttoq oqarpoq:

- Naalakkersuinermik suliaqartut siulii isumaqarsimapput Monroe-Doktrin atorunnaarsimasoq. Kukkupput. Monroe-Doktrin atuuppoq, Trumpillu ´naalakkersuinerata´ nalaani aatsaat taama sakkortutigaluni — Amerikamiut soqutigisaannut naapertuuttumik nunarsuup immikkoortuani matumani pissaanermik peqalersitseqqittoq, ataatsimullu isigalugu amerikkamiut soqutigisaannik ersersitsisoq.

Ilisimatuup oqaasertaliussaq aalajangersimasoq maluginiarpaa

Monroe-Doktrin naatsumik oqaatigalugu tassaavoq USA-p nunat allat Amerikap nunavissuanik aqutsiniarnerannik akuersaannginneq. 

DIIS-imi ilisimatooq Ulrik Pram Gad Sermitsiamut ilisimatitsivoq Trumpip oqalugiaataa USA-p nunami isumannaallisaanermut periusissiaani nutaami saqqummiunneqaqqammersumi erseqqissaanerit tunngavilersuinerillu uteqqinneritut isigigini.

USA-p saniliisa soqutigisaminnik illersuiniarlutik iliuuseqartariaqarnerat imaluunniit USA-p akuliunnissaminut piareersimanissaa pillugu allassimasoq maluginiarpaa.

Ulrik Pra Gad naapertorlugu oqariartuut, tassa Danmarkip Kalaallit Nunaanni vicesheriffiusinnaanera – taamaalillunilu Kalaallit Nunaata naalagaaffinngornissaa – ilumoortuusoq, kisianni:

- Sillimaniarnitsinnut navianartorsiortitsisorisatsinnik iliuuseqarussi ’nammini namminermi oqartussaaneq’ soqutiginngilarput, Ulrik Pram Gad, DIIS-imi Kalaallit Nunaat Issittorlu pillugit ilisimatusartoq oqarpoq.