ASSAAT KISSALAARTUT AMIGAATIGINEQARNERI
Angajoqqaat akerliussutsimik takutitsinissamut aaqqissuussipput: Paaqqinnittarfinni sulisunit 29-usunit 16-it amigaatigineqarput
Angajoqqaat marluk iliuuseqarumatuut meeqqerivimmit Nukariinniittuutillit Nuummi akerliussutsimik takutitsinissamut tallimanngornernermi maajip aallaqqaataatni nalunaaqutaq marlunut qaaqqusipput. Perorsaasunut atugassarititat naammagiunnaarlugit iliuuseqarput.
Evannguaq Olsen Cortzen aamma Vivi Rothaus Olesen perorsaasut atugaat pillugit akerliussutsimik takutitsinermut qaaqqusipput.
Assi: Oscar Scott Carl
Evannguaq
Olsen Cortzen Vivi Rothaus Olesenilu meeqqerivimmi
Nukariinniittuuteqarput, angajoqqaatullu meeqqeriviup sulisuisa meeqqat pillugit ilungersornerat qanimut misigalugu.
Nukariinni atorfiit affaat sinnerlugit inuttaqanngillat, ulluuneranilu paaqqinnittarfik pisortarqarani.
Taamaattumik perorsaasut
sumiginnarneqarnerat akuerinagu nuna tamakkerlugu akerliussutsimik takutitsinissamut maanna kaammattuipput. Angajoqqaat perorsaasullu
sineriamminngaanneersut akerliussutsimik takutitsinissamut
peqataaqqullugit kajumissaarpaat.
SAMMISAQ: ASSAAT KISSALAARTUT AMIGAATIGINEQARNERI
Kalaallit Nunaanni assaannik kissalaartunik amigaateqarneq, tamatumalu inuiaqatigiinnut sunniutai Sermitsiamiit allaaserisani nangeqattartuni sammivarput Perorsaasut ulluinnarni suliassaqarpallaartarnerat, sulisut ikippallaarnerat aningaasarsiakippallaarnerlu allaaserisani siullerni sammivarput.
- Neriuppunga tapersersuisorpassuaqassasoq. Tassami
toqqissisimananngilaq, ullormut nalusarparput meerarput eqqissilluni
imaluunniit nuannisarluni meeqqerivimmiissanersoq, Evannguaq Olsen
Cortzen oqarpoq.
Perorsaasut ullut tamaasa suliartortartut
nuannaarutigigaluarlugit, maannakkulli atukkat ernumanartoqarnerisa meeqqanut sunniuteqarnera Evannguaq Olsen Cortzenip
erseqqissarpaa.
- Sulisunukua ikiorusullugit iliuuseqartugut, atugassarititai
pillugit meeqqattalu atugarissaarnissaat pillugit. Meeqqatta
siunissaa pineqarpoq. Siunissaat torersumik pitsaasumillu
tunngavilerneqassappat meeqqerivinni sulisut pingaaruteqarnerpaapput,
Evannguaq Olsen Cortzen oqarpoq.
Evannguaq Olsen Cortzen Vivi Rothaus Olesenilu meeqqerivinni assigiinngitsuni marlunngornermi angalaarlutik tallimanngorpat akerliussutsimik takutitsinissamut piareersarnertik pillugu paasissutissiisaarput.
Assi: Oscar Scott Carl
Akerliussutsimik
takutitsinermik aaqqissuussisut kommunimut
attaveqartarsimagaluarlutik naammaginanngitsumilli akissutisisimallutik oqaluttuarput, taamaattumillu maanna akerliussutsimik
takutitsinissamik kaammattuuteqartariaqartutut misigalutik.
- Sulisuninngaanniit angajoqqaat sinniisaat paasitinneqarpugut
sulisut qanoq amigartiginersut. Taava angajoqqaat
ataatsimeeqatigivagut kommunemullu allagaqaasiorluta.
Kommuneminngaanniit akissutit naammaginnginnatsigit akerliussutsimik
takutitsinissaq aaqqissuupparput, Vivi Rothaus Olesen oqarpoq.
Akerliussutsimik takutitsineq Nuummi tallimanngorneq
maajip aallaqqaataat nalunaaqutaq 14:00 pissaaq.
