Boas Sisimiormiu kajumissutsiminik suliniuteqarnera pillugu nersorniarneqartoq 

Boas Johansen 75-inik ukiulik Sisimiormiu illoqarfimmut pinngortitamullu iliuuserisimasani pillugit Qeqqata Kommunianit nersorniarneqarpoq. Qeqqata Kommunia Facebookimi quppernermini taama allappoq.

- Boas nammineq aningaasaatini atorlugit eqqakkanut puussiarsuarnik pisisarpoq. Ullaaralaakkut ilaannikkullu unnussuarmut illoqarfimmi pisuttuartilluni ilaatigut sikaritsit kimmivikuinik eqqakkanillu allanik katersisoq takuneqarajuppoq.

Boasip tusagassiuutinut nalunaarummi aamma oqaluttuaraa, piniariartillutik aamma piniariarfimminni eqqakkanik katersisarluni, taamatummi angumminit ilinniartinneqarsimanini pingaartitarilluinnaramiuk.

- Boasip aamma oqaluttuaraa, aasamut eqqakkanik katersisarnissaminut qilanaalereerluni, taamaaliornissaminummi puussiarsuarnik pisereersimagami, Qeqqata Kommunianit allakkani tamanna atuarneqarsinnaavoq.

Illoqarfimmik saligaatsuutitsinini ileqqussatigullu maligassiuisuunini pillugu kommunimit aningaasanik tunissuteqarfigineqarpoq.