Borgmesteri: Borgmesterituunngitsoq kiffartuussigama

Avannaata Kommuniani borgmesteri, Lars Erik Gabrielsen (S), Qaanaap eqqaani nunaqarfinni marlunni, Siorapalummi Qeqertanilu, sannavinnik umiatsialeriffiutigisinnaasunik pissarsiniarnermi allaffissornikkut "borgmesterituunngitsoq" kiffartuussisimalluni Sermitsiamut oqarpoq.

- Borgmesterituunngitsoruna nammineq soqutigisorujussuuginga. Suliap sukkasuumik ingerlannissaa pillugu nammineq containerinnguanik sannavinnik umiatsialeriffiusinnaasunik siunnersuusiortitsinikuuvunga. Sananeqartussanngorput, borgmesteri oqarpoq.

Taassuma suliffeqarfik Danmarkimiittoq, containeriliortartoq, DC Supply A/S, ilutsit akillu pillugit isumaqatigiinniarfigalugu allaffissorluni attaveqatigisarsimavaa. 

- Taakku containerit Thulefondip aningaasalersorpai. Aningaasartassai akuerereerpai, borgmesteri oqarpoq.

Sermitsiap Thulefondip siulittaasua, Jens Danielsen, attaveqarfigaa. Taassuma borgmesterip oqaasii uppernarsarpai. Containerit 20 fodsitut angissusillit arfinillit Thulefondip pisiarisimavai. Pingasut Siorapalummi pingasullu Qeqertani sannavittut umiatsialerivittullu atussapput. 

- Sannaviit umiatsialeriviit katillugit 2 millionit koruunit missaanik akeqarput, Jens Danielsen Sermitsiamut oqarpoq.

Taassuma borgmesterillu oqarneri naapertorlugit borgmesteri allaffissornikkut ikiuunnermini aningaasarsissanngilaq. 

- Naamik. Taamannak eqqarsaateqanngilagut, Jens Danielsen oqarpoq.

"Borgmesterituunngitsoq"

Containerinik pisinissamut isumaqatigiinniarneq Lars Erik Gabrielsenip siorna ukiap kingorna suliaralugu aallartissimallugu oqarpoq. Tassa borgmesteritut atuutilernerminit ukiup affaata missaa qaangiuttoq.

Oqarputit borgmesterituunngitsoq suliaqarsimallutit, taava qaqugukkut suliaraagit?

- Tassa mobilera tigusinnaagaangakku angerlarsimallunga, uagutsinniillunga, passuterujoortarpara, borgmesteri oqarpoq.

Kommunit aqunneqarnerat pillugu Inatsisartut inatsisaanni allassimasoq naapertorlugu borgmesteri qinigaaffik tamaat atuuttarpoq. Tassa imaappoq borgmesteri angerlaruni imaluunniit allaffini qimakkuniuk borgmesteritut atuuffeerutiinnarsinnaanngilaq.

Tamannalu aamma Ilisimatusarfimmi ingerlatsineq pillugu ilisimatusartup oqaatigaa.

- Politikkikkut tatigineqarluni atuuffeqarneq, tassa “innuttaasunut sinniisuuneq”, atuuffimmit ulluinnarni immikkut sulinngiffeqarfigineqarsinnaanngillat.

- Taamaattorli borgmesterip suliassaasa ilaanni kommunip aqutsinermut malittarisassaataani aalajangersakkanik peqarsinnaavoq borgmesterip sulinngiffeqarneranut imaluunniit peqataasinnaannginneranut tunngasunik, ingerlatsineq pillugu ilisimatusartoq, Najaaraq Demant-Poort Sermitsiamut oqarpoq.

Pisumili uani borgmesteri sulinngiffeqanngilaq, sulinngiffeqassagunimi sinniisussaa siulleq, Jens Napãtôk' (N) borgmesteritut atuuttussaavoq. Taannali qinigaaffimmi maanna atuuttumi borgmesteritut suli atuutilinngilaq, tassa borgmesteri Lars Erik Gabrielsen, suli atuuffimminit sulinngiffeqanngimmat.

Kommunip ingerlatsiviata sulinera utaqqinarigaa

Borgmesterip nammineq oqarnera naapertorlugu containerinik nunaqarfinnut marlunnut pisiniarneq Avannaata Kommuniani ingerlatsiviup nammineq suliassarigaluarpaa. Suliarli sukkanerusumik suliarineqassappat nammineerluni allaffissornermigut tamanna naammassineqarsinnaasutut nalileramiuk aallartissimavaa.

- Teknikkeqarfiup ingerlatassarigunaraluarpaa. Kisianni uanga utaqqisinnaassutsinnut ajulaarami. Taamaammat ikiuukkusunnikuuvunga, Lars Erik Gabrielsen oqarpoq.