Vivi Fleischer-Motzfeldtip, suliffeqarfimmik "Happy Gut“-imik piginnittoq, niuertarfini allilerniarlugu Nuummilu Blok 5-imi inimut nutaamut nuunninni nuannaarluni oqaluttuaraa.
- Nuannaaqaanga pissangaqalungalu, Vivi Fleischer-Motzfeldt AG-mut oqarpoq.
Vivi Fleischer-Motzfeldtip, suliffeqarfimmik "Happy Gut“-imik piginnittoq, niuertarfini allilerniarlugu Nuummilu Blok 5-imi inimut nutaamut nuunninni nuannaarluni oqaluttuaraa.
- Nuannaaqaanga pissangaqalungalu, Vivi Fleischer-Motzfeldt AG-mut oqarpoq.
"Happy Gut“ juiciliorfia Qinngorpumiikkaluarpoq, maannali inini nutaani pisiniarfeqalertussanngorpoq.
- Maskiinat nutaat aamma nerisassanik tuniniaavik angallattagaq aasaanerani atulernissaa pilersaarutaavoq. Taannalu aaqqissuussani assigiinngitsuni atorneqarsinnaassaaq, soorlu NP-toqarnerani Inussiviup silataaniittarsinnaalluni, oqarpoq.
Nerisassanik tuniniaavik angallattagaq nutaaq, aasamut atorneqalissaaq.
Assi: Nammineq pigisaq
Aammattaaq smoothie-nik, chiagrødinik soorunamilu juiceeqqanik ilisimaneqarluartunik ukiuni arfineq-marlunni ineriartortissimasaminik tunisassiaqassaaq.
Vivi Fleischer-Motzfeldt inuunini naallugu toqussutaasinnaasunik nappaateqarpoq.
- Naggataatigut suliunnaartariaqalersimavunga, kisianni juicenik peqqinnarnerusumillu inuuneqarnissamik soqutiginninnera pissutigalugu inooriaasera allanngortippara. Maannalu tamaanga killippunga, nuannaaqaanga qujamasullungalu, Vivi Fleischer-Motzfeldt oqarpoq.
Napparsimatilluni Katti’s Shop Café, maanna matunikoq, ornittarpaa.
- Smoothiet ilaat mamareqaakka. Nukissaqalersittarlungalu qiimmaallatsittarpaanga. Taamaallunga piginnittuusimasoq aperaara smoothiliarisartagaat ingerlateqqissinnaanerikka, qujanartumillu akuersivoq, oqaluttuarpoq.
Vivi Fleischer-Motzfeldtip napparsimanermini maqaasiuakkani maanna suliffeqarfiutimini neqeroorutigilerpai.
Pilersaarutaavoq “Happy Gut” inini nutaani februaarip naanerani ammassasoq.
Maanna iluarsaassineq naammassingajalerpoq, misigissutsillu arlallit atuupput, ilaatigut Vivip aataa toqukkut qimagussimasoq Blok 5-imik sanaartoqataasimammat.
- Maanna uiga ikiortigalugu iluarsaassivugut, tamannalu misigissutsikkut ilungersunartuuvoq, aammami gasimik qaartoornermi ajunaarnikut eqqaamasarakkit.
