Ilaqutariit Jensenikkut USA sussaaraat – Kalaallit Nunaallu toqqaraat

Aappariit Helle aamma Kurt Jensen Aalborgip eqqaani Vestbjergimeersut ernitik Stig Steenilu kiisalu ukuartik Alma Houen ilagalugit nunarsuaq angalavaat.

- Ukiut marlussuit matuma siorna Australiami aallartippugut. Siorna Afrikap Kujataaniippugut - ukiorlu manna USA tikissallugu eqqarsaatigisimagaluarparput, Helle Jensen oqaluttuarpoq.

- USA-lli, præsident Trump siuttoralugu, ineriartornera ajortoq paasisinnaanngikkaanni tusilartuullunilu tappiitsuusariaqarpoq. Tamanna peqataaffigiumannginnatsigu taamaatiinnarparput.

- Taava arlaannarpulluunniit tassaniissimanngimmat Kalaallit Nunaat oqaluuserilerparput. Taamaammat Aalborgimiit Nuummut toqqaannartumik timmisartuussisoqartalernissaa tusaratsigu aalajangerpugut, Helle Jensen Air Greenlandip timmisartuussissutaani Airsevenimi, Aalborgimit Nuummut angalasussami, issialluni oqarpoq.

- Eqqumiikkaluarpoq, kisianni Trump pisuulluni maanna Kalaallit Nunaannukarpugut. Taannaqarsimanngitsuuppat USA-mut timmisartorsimassagaluarpugut.

Eqimattakkaarluni angalaqatigiinnerit naaggaaraat

- Eqimattakkaarluni angalaneq nuannarinngilarput – aamma atuanngiffeqarnerup nalaanni angalarusunneruvugut. Taamaammat angalanissarput takornariarfissagullu Ruby Rejserimi pisiaraagut, kisianni angalatitsisoqarata angalaniarpugut. Tamanna iluatsissinnaassasoq naatsorsuutigaarput. Nammineersinnaavugut – Kalaallit Nunaannilu qularnanngitsumik aamma taamaaliorsinnaavugut.

- Angalanitsinni sipaarniarnata aalajangerpugut. Inuunitsinni siullerpaamik immaqalu naggammik tamaanga angalagatta ingerlalluarnissaq pisariaqarpoq – sipaarnianngilagullu, Helle Jensen illarpoq.

- Nuummi kangerlummi tupernissarput sioqqullugu Hotel Hans Egedemi akunnittarfeqassaagut. Aamma suluppaagarniarlutalu pisagut neriartussavagut, taanna oqaluttuarpoq.

Ilaqutariit Jensenikkut ulluni marlussunni illoqarfiit pingaarnersaanneereerunik Ilulissanukassapput, tassanilu soorunami Kangia takussallugulu qulimiguulimmik angalaarlutillu arfernik takusassarsiussapput.

- Tamanna qilanaaraarput. Aammali Kalaallit Nunaat takussallugu qilanaaraarput. Kalaallit Nunaat ukiup kingulliup ingerlanerani tusagassiutitigut sammineqartorujussuuvoq, taamaammat pissanganarluinnassasoq qularinngilluinnarpara.

- Immaqa Kalaallit Nunaanniittunut eqqumiiginarsinnaavoq, uagulli suna naatsorsuutigissanerlugu nalulluinnarparput, tassami Kalaallit Nunaanneersunik sulisimasunilluunniit ilisarisimasaqanngilagut, Helle Jensen oqarpoq. 

Naammattunik pissamaateqartut

Tusagaqarsimappulli. Kalaallit Nunaanni immiaaqqat imigassallu aalakoornartullit akisupput.

- Taamaammat pissamaateqarpugut. Pissamaatinik naammattunik kuffertitsinniittuuteqarpugut. Feeriarattami ilorrisimaartariaqarpugut - soorunamilu aamma najoqqagassaqalaassaagut.

- Akilli pillugit tusatsiakkat annilaangatiginngilagut. Kisitsiguttami angalanermut aningaasartuutit ilaminiinnaraat – aalisagartoriartoruttalu viinnimut pitsaasumut akissaqassaagut, Helle Jensen oqarpoq ilaqutariillu aamma Kalaallit Nunaanni neriniartarfinni akunnittarfinnilu aalisakkanik nerisoqartartoq ilisimagaat ilanngullugu oqaatigaa.

- Usi. Immaqa Kalaallit Nunaat pillugu ilisimasaqarpallaanngilagut, taakkuli raajaatitik aalisagaatitillu pillugit ilisimaneqarluarput, taamaammat soorunami tamakku misigisaqarfigissavagut, Helle Jensen oqarpoq.

Ilaqutariit Jensenikkut Kalaallit Nunaanni angalanissaat pilersaarutit malillugit pinngitsoorpoq. Ilaqutariit silarlunnera pissutaalluni Ilulissanut apuutinngillat.

- Taamaakkaluartoq nuannaarlutalu naammagisimaarinnippugut. Misigisaq imaannaanngilaq. Ingammik kalaallinik naapitsinerput. Inuit tamarmik inussiarnerlutillu ajunngitsuupput - Kalaallit Nunaanni misigisassaq immikkuullarissoq, Helle Jensen oqarpoq.

- Silarlunnera pissutigalugu Ilulissanukanngitsoornerput ajorinngilarput. Pissutsit tassa taamaapput. Akueriinnagassaavoq - angalanerpulli ajunngeqaaq.

- Aappaagu uteqqittariaqarpugut. Taamatut pilersaaruteqanngikkaluarpugut sulili amerlanernik misigisaqarusulluta - sulilu Ilulissanukarusulluta. Takoqqissajunnarsivatsigut, Helle Jensen qungujorujussuarluni oqarpoq.