Ilisimatuut nassuiaat ujartorpaat

Ukiut 13.000-it matuma siornagut sermeqarnerata nalaa qaangiukkiartorpoq.

Nunarsuup ilaani najukkatsinni sermersuaq kilometerimk issussuseqartoq aaleraluarpoq, silalu kissatsikkiartorluni.

Tassanngaannarli allanngortoqarpoq. Nunarsuup avannarpasissortaani sukkasuupilussuarmik sila allanngorpoq.

Piffissap sivikitsup iluani, immaqa allaat ukiunik qulinik sivikitsigisumi ukiut 13.000-it missaata matuma siornagut nunarsuup avannarpasissortaa nillertupilussuanngorpoq, Jostein Bakke oqaluttuarpoq.

- Allanngoriasaarneruvoq sukkasuupilussuaq.

Jostein Bakke Universitet Bergenimi professoriuvoq, itsarsuarlu silap pissusaa pillugu annertuumik ilisimatusarnikuulluni.

Issi ukiuni 1.000-ini sunniuteqarpoq.

Amerikami avannarlermi Skandinaviamilu sermeq annertusiartoqqilerpoq, imaanilu sarfat ingerlaartut Mexicop kangerliumarngani immamik kissartumik tarajornitsumillu pajuttoq sanngiillipput.

Immap sarfarnera taamaattoq AMOC-imik taaneqartartoq nunarsuarmi silap pissusaanik qitiulluni aalajangiisuusartup ilagaa, arlalitsigullu ilisimatuussutsikkut nutaarsiassani atuagassaagajuttarpoq immap sarfaa tamanna maannakkut sanngiilleqqissinnaasoq.

Taama pisoqassappat nunarsuatta ilaa najugarput ullumikkornit nillernerujussuanngussaaq.

Ilisimatusartut isumaqarput piffissami tassani sumiiffinnit assigiinngitsunit arlalinnit innermik anitsisoqartarsimaneranik takussutissanik nassaarsimallutik.

- Isumaqarpunga tamanna kisimi piffissamut Yngre Dryasimik taagorneqartumut nassuiaatissaanngitsoq, nassuiaataasinnaasulli ilagisinnaavaa.

- Isumaqarpunga ujarassiornermut atatillugu suliaasoq tutsuiginartoq, ilisimatusaataasimasoq atuagassiami Science Advencesimi saqqummersinneqarsimasoq atuareerlugu Jostein Bakke oqarpoq.

Imeq tarajoqanngitsoq, sermip aannera ullorissallu anaat

Taamatut pisoqarneranut peqqutaasut imaannaanngillat assortuussutigineqartarlutillu, piffissamili sakkortuumik innermik anitsisoqartarnera nillernerulernermik kinguneqartoq aamma peqqutaaqataasinnaavoq.

USA-mi qaarusunni kinnernik nassaartoqarsimavoq piffissami sivisuumi ujarassiornerup oqaluttuarisaaneranik sukumiisumik takutitsisunik, ilisimatusarneq naapertorlugu.

Matumani ilisimatusartut takutippaat aalajangersimasunik isotopeqarsimasoq piffissap Yngre Dryasip aallartinnerani innermik anitsinerit annertusinerannik takussutissaasut.

Naluaat anitsinerit sumiissimanersut imaluunniit qanoq annertutiginersut.

Piffissalli taassuma aallartinnerani ukiuni 100-nik sinneqalaartumi nalinginnaasumit innermik anitsinerit immaqa amerlanerusimasinnaapput.

Jostein Bakkep tikkuarpaa, uuttortaanerpassuit pitsaasuusut sukumiisumillu piffissalersuisoqarluni, taamaalilluni innermik anitsisoqarnerusarsimannissaa ilimanarluni.

Annertuumik innermik anitsinerit silaannarmik nillernerulersitsisinnaapput silallu pissusaa sunnerlugu, pujoralammik aniatitsinermikkut seqernup qinngornerinik assiinermikkut. Tamanna nunarsuarmi siusinnerusukkut annertuumik kinguneqarsimavoq – inunnullumi, innermik anitsinerit peqqutigalugit inuiaqatigiit annertuumik isasoorsimasinnaallutik.

Sukkasuumik allanngorneq

Suulli tamarmik sukkasuumik pipput.

- Kalaallit Nunaannit sermip iluanit takuneqarsinnaavoq tamanna ukiut qulit ataallugit sivisussusilimmik pisimasinnaasoq, Jostein Bakke oqarpoq.

Allanngorneq ima sukkatigaaq siusinnerusukkut isummertoqartarsimalluni piffissaq Yngre Dryas annertuumik ullorissat anaanik nakkaasoqarneranik peqquteqartoq, tassalu silap pissusaanut sunniuteqarluni.

- Taama isummersimaneq utertinneqarpoq, Jostein Bakke oqarpoq.

Ilisimatusartut ilisimasanik katersat innersuussutigaat, ullorissat anaasa nakkaanerannik peqqutaatinneqarat upperineqarunnaarluni.

Oqaluttuarpoq ilaatigut Amerikami avannarlermi nunap timaani sermip aaneratigut imerujussuarmik katersuuttoqarsimanera pingaaruteqartumik peqqutaasoq sukkasuumik nillertinneranut.

Sermip aanneranit imeq Atlantikup avannaanut kuukkaangat, tamanna qerisinnaavoq imerlu kissartoq Mexico kangerliumarnganeersoq matullugulusooq, Jostein Bakke nassuiaavoq.

- Tamanna immap silaannartattalu akornanni kissartumik aniatitsinermik annikillisitsisinnaavoq.

- Piffissap Yngre Dryasip nalaani tamanna annertuumik pivoq, sermip ima annertutigisumik aanneratigut imaanut kuuttoqarluni.

Jostein Bakke isumaqarpoq piffissami tassani innermik anitsisoqarneruneranik nassuiaatip pingaartup ilagigaa sooq Yngre Dryasimi taama nillertigisimanersoq taamalu sukkatigisumik.

©Forskning.no. Stephanie Lammers-Clarkimit nutserneqartoq.