Imarpikkoortaatinut talittarfik tunniunneqartoq:
- Pingaarutilimmik kivitsineq, naalakkersuisoq oqarpoq
Maniitsumi imarpikkoortaatinut talittarfik tamakkiisumik nutartigaq decembarimi tunniunneqassaaq, taannalu illoqarfimmut pingaarutilimmik kivitsillunilu suliarineqarnerani suleqatigiilluartoqarnera naalakkersuisup Aqqaluaq B. Egedep (IA) nersualaarpaa.
- Suliniutip sukkasuumik ingerlanneqarnissaanik, nutarterinermilu pilersuinerup atatiinnarneqarnissaanik qulakkeerisumik peqataasut akornanni nukittuumik suleqatigiinneq naammagisimaartorujussuuara, naalakkersuisoq Aqqaluaq B. Egede (IA) oqarpoq.
Toqqorsivimmit: Leiff Josefsen
Maniitsumi talittarfiup nutarterneqarnera, suliallu naammassingajalernera illoqarfimmut alloriarneruvoq pingaarutilik.
Naalakkersuisut taama isumaqarput, imarpikkoortaatinullu talittarfik tamakkiisumik nutartigaq sanaartorunit una qaammat tunniunneqassasoq paasissutissiissutigalugu. 2026-p aasalernerata tungaanut inaarsagassat annikitsut inaarsarneqassapput, tassanilu suliniut pisortatigoortumik naammassineqassalluni.
- Imarpikkoortaatinut talittarfimmik tamakkiisumik nutarterineq Maniitsumut, nunallu immikkoortortaani imarsiornermi attaveqaasersuutinut pingaarutilimmik kivitsineruvoq, attaveqaasersuutinutvnaalakkersuisoq Aqqaluaq B. Egede oqarpoq, nangipporlu:
- Suliniutip sukkasuumik ingerlanneqarnissaanik, nutarterinermilu pilersuinerup atatiinnarneqarnissaanik qulakkeerisumik peqataasut akornanni nukittuumik suleqatigiinneq naammagisimaartorujussuuara.
Maajimi pisortatigoortumik ammarneqassasoq
Attaveqaasersuut nutaaliaasoq nassiussalerinermut, ilaasunillu sullissinermut sinaakkutinik pitsaanerusunik pilersitsissaaq, ineriartortitsinissamut periarfissanut tunngavissiissaaq, qajannaannerusumillu pilersuinissaq qulakkeerneqassasoq, naalakkersuisup naqissuserpaa.
Imarpikkoortaatinut talittarfimmik tamakkiisumik nutarterineq KJ Constructionip, Royal Arctic Linep, Royal Greenlandip, najukkamilu ingerlatsisut allat akornanni ingerlalluartumik suleqatigiinnerisigut ingerlasoq, naalakkersuisut paasissutissiipput.
- Nutarterinerup kingunerisaanik killeqaraluartoq, illoqarfimmik pilersuinerup atatiinnarneqarnissaa suleqatigiilluarnerup qulakkeerpaa.
Imarpikkoortaatinut talittarfiup 2026-mi maajimi atuleqqinnissaa naatsorsuutigineqarpoq.
