Imatut sunniuteqarpoq

TikTok, Snapchat, Twitch, Instagram, YouTube, Facebook inuillu attaveqatigiittarfii allat tassanngaannaq inerteqqutaalerput.

Australiami decembarimi 2025-mi nunarsuarmi siullermeertumik attaveqatigiittarfiit 16 inorlugit ukiulinnut inerteqqutaalerput.

Maannali ukiup affaata qaangiunnerani misilittakkat siulliit inatsit killilimmik sunniuteqarsimasoq takutippaat.

Tamanna nalunaarusiami ilisimatusartut inuusuttunik 12-15-inik ukioqartunik Australiamiunik 1.050-inik apersuineranni inerteqquteqarneq qanoq sunniuteqarsimanersoq pillugu inerniliunneqarpoq. Inernerisa takutippaat:

• Inuusuttut 61 procentii suli attaveqatigiittarfinnik atuisuupput.

• Taakkunannga 70 procentit maleruagassat avaqqutaarnissaat ajornanngimmat attaveqatigiittarfinnik atuipput.

• Inuusuttut affaasa nittartakkamik atuinerup isumannaannerulinnginnera oqaatigaat, naak inerteqquteqarnermi tamanna siunertaagaluartoq.

Andreas Lieberothip Danmarkimi perorsaanermik ilinniarfimmi Aarhusip ilisimatusarfiata ataaniittumi lektoriusup kisitsisit tupaallaatiginngilai

- (Inerteqquteqarnerup, aaqq.) kingunitsiaa YouTubemi videot ’Qassinik ukioqarnissamut piumasaqaat ima avaqqutaarsinnaaavat’-mik qulequtaqartut takkussuupput, lektori Australiamik pisunik malinnaaqqissaartoq Videnskab.dk-mut oqarpoq.

Ukiut 5-10 qaangiuppata allatut isikkoqarsinnaavoq

Andreas Lieberotili inerteqquteqarneq suli nutaajummat inatsisit sunniuteqannginnissaannik oqassalluni siusippallaartoq isumaqarpoq.

- Kinguaariit inuusuttut sungiusimavaat attaveqatigiittarfinnik atuisinnaaneq, tassanngaannarli atueqqusaajunnaarlutik, oqarpoq.

Inuiaqatigiinni taama annertutigisumik allannguinerup sunniutaasa takusinnaanissaannut ukiorpassuit ingerlagallassapput. Taamaattumik immaqa ukiut 5-10 qaangiuppata kisitsisit allaanerussapput, kinguaariit inuusuttut nutaat peroriartorpata sungiusimanagu piummamik attaveqatigiittarfinniinnissaq. Pissanganassaaq takussallugu tamanna inuunerinnerannut sunniuteqarnersoq, Andreas Lieberoth oqarpoq.

Danmarkimi pilersaarutaasoq

Danmarkimi tamanna malinnaavigeqqissaarneqarunarpoq.

Naalakkersuisoqatigiit SVM attaveqatigiittarfiit atorsinnaanissaannut 15-inik ukioqaleqqaartoqartariaqartoq siorna oktobarimi siunnersuutigaat.

- Oqarasuaatit angallattakkat attaveqatigiittarfiillu meeqqatta meeraanerannik tiguaapput. Taamaattumik meeqqanut 15 inorlugit ukioqartunut attaveqatigiittarfiit arlaqartut inerteqqutiginiarpavut, Mette Frederiksen Facebookimi quppernermini allappoq.

Norgemi meeqqanut inuusuttunullu 16-it inorlugit ukioqartunut attaveqatigiittarfinnik inerteqquteqalernissamik annertuumik pilersaaruteqartoqarpoq.

Østrigemi meeqqanut 14-it inorlugit ukiulinnut inerteqquteqalernissaq pilersaarutaavoq. Nunat allat arlaqartut aamma iliuuseqalersaarput.

Inerteqquteqalernissamik pilersaaruterpassuaqarneranut attaveqatigiittarfiit inuusuttumik atugarliortitsinerulernissaannut ernumanermit piuvoq. Tassalu inerteqquteqarnerup inuusuttut inuunerannik pitsaanerulersitsinissaat siunertaalluni.

Taamatulli sunniuteqarnissaa ilisimatuussutsikkut ilalerneqanngitsoq, Andreas Lieberoth oqarpoq:

- Ataatsimut isigalugu ilisimatusarnerup takutippaa attaveqatigiittarfinnik inerteqquteqarneq tarnikkut peqqissusaannik pitsanngoriartitsissanersoq killilimmik takussutissaqarpoq, oqarpoq, Cambridgemilu ilisimatusarfimmit tuluit nalunaarusiaat isumaliutigalugu.

Inuusuttut attaveqatigiittarfinni atugarliorpat?

Atugarliorneq naalakkersuinermik suliaqartut attaveqatigiittarfinnut tunngasorisaat inerteqquteqarnermullu tunngaviusoq Andreas Lieberothip ilisimatusarnermi uppernarsineqartoq takusinnaanngilaa.

- Tamanna misissoraanni inernerit nikerartut takuneqarsinnaavoq annikitsumillu sunniuteqarluni. Tamatuma takutippaa teknologimik atuineq namminermini inuusuttut atugarliornerannut peqqutaasorsuunngitsoq, oqarpoq.

Andreas Lieberothilli ernummatigineqarnera paasisinnaavaa meeqqat inuusuttullu piffissartik kukkusumik atortaraat attaveqatigiittarfinnilu soorlu TikTokimi Instagrammimilu nuannaartorisaqarlutik angujuminaallutillu peqqinnanngitsunik.

Inuusuttut atugarliortut ikiorsinnaagai

Inuunerinnermik isumalioqatigiissitamik taaneqartartup meeqqat inuusuttullu peqqissusaat pillugu oqallinnerup paasinissaanut 2023-mi pilersinneqartup siorna angusani saqqummiuppai.

Isumalioqatigiissitami ilisimatuunik arlalinnik inuttaqartumi isumaqartoqanngilaq nalinginnaasumik meeqqat inuusuttullu ilaatigut Danmarkimi meeqqat inuusuttullu atugarliornerulersimasut.

Inuunerinnissamilli isumalioqatigiissitaq soqutiginartumik allamik nassaarpoq: Inuusuttut atugarlioreersut atugarliornerujartortut.

Taamatullu ineriartortoqarnera attaveqatigiittarfinni annertusarneqartarpoq, Andreas Lieberoth oqaluttuarpoq.

- Meeraq aarlerinartorsioreersoq pineqartillugu tamanna digitalimi inuunermi takutinneqartarpoq. Mattussanerusutut misigisarput, pimmatigineqarlutik allatulluunniit nuanniitsumik pineqarlutik, tamannalu attaveqatigiittarfinni takuneqarsinnaalluni, oqarpoq.

Meeqqat inuusuttullu aarlerinartumiittut ikiornissaat Andreas Lieberoth naapertorlugu nalinginnaasumik mattussinissamik tunngavilersuutit nukittunersaraat.

Sunniuteqassanersorli naluarput, oqarpoq.