Timmisartumik angallassinermik aqutsisut kalaallit qaqutigoortut

- Timmisartunik angallassinermi aqutsisuussagaanni atuarneq nuannarisariaqarpoq.

Ujarneq Sørensen 34-nik ukiulik Kangerlussuarmi napasuliami timmisartunik angallassinermi aqutsisoq taama oqaluttuarpoq.

- Ilinniarnera aallartikkakku tupaallappunga. Mittarfinni angallannermik aqutsissagaanni inatsisit, malittarisassat aalajangersakkallu alanngaartariaqakkat amerlaqaat, avaqqunneqarsinnaanngillallu, timmisartunik angallassinermi aqutsisoq Sermitsiamut nassuiaavoq.

- Isumannaallisaanermut tunngassuteqarpoq - timmisartorpassuit ilaasullu arlallit ataatsikkut akisussaaffigigaanni sukkasuumik ingerlasoqartariaqarpoq.

Pisariaqartitsineq annertusiartortoq

TMA-mik taaneqartartoq Nuummi timmisartut tikittut aallartullu aqunnissaannut atorneqartussaq sisamanngormat pilersinneqarmat timmisartumik angallassinermi aqutsisut Kalaallit Nunaanni pisariaqartinneqarnerulerput. Kangerlussuarmi Pituffik Space Basemilu timmisartoqarfimmi timmisartumik angallassinermi aqutsisut saniatigut TMA-mik kiffartuussisoqassaaq.

Pituffimmi timmisartumik angallassinermi aqutsisut USA-mi illersornissaqarfimmi sakkutuunit isumagineqarput, Kangerlussuarmilu timmisartumik angallassinermi aqutsisut Islandimi suliffeqarfimmit Aviansimeersuupput.

- Kalaallinik, Islandimiunik danskinillu sulisoqarpugut. Ilaat Kangerlussuarmi najugaqarput allallu sapaatip-akunneri marlussuit Kalaallit Nunaanni sulisarput, Jón Ingi Jönsson Kangerlussuarmi timmisartunik angallassinermut aqutsisoqarfimmi pisortaq oqaluttuarpoq.

Islandimi ingerlatsiviup Mittarfeqarfiit – maanna Greenland Airports – sinnerlugit timmisartunik angallassinermik aqutsineq 2015-imi ingerlatilermagu pisortaq Kangerlussuarmut nuuppoq.

Kangerlussuarmi napasuliaq mittarfiup eqqaani 10 sømilinik (18 kilometerinik) ungasitsigisumi 3500 fodsinillu (1000 meterit missaannik) portutigisumi angallassinermi aqutsisuuvoq.

- Mittarfik, aamma napasuliamit aqunneqartoq, mittarfimmit 90 sømilit tikillugit ungasitsigisumut silaannarmilu 19500 fodsimik (5000 meterit missaannik) qutsitsigisumut aqunneqarpoq, Kalaallit Nunaatalu silaannartaa, Reykjavikimiit aqunneqartoq, tamatuma qulaaniippoq. Piviusumik pisariunerusumik katitigaagaluarpoq, kisitsisilli pingaarnerit taamaapput, Jón Ingi Jönsson oqarpoq.

Kalaallit Nunaat nuannarigaa

Timmisartumik angallannermik aqutsisoqarfiup pisortaata Kalaallit Nunaanni sulinini suleqatimisut nuannaraa.

- Sulisut 2015-imi Islandimeersut tamarmik suli Kangerlussuarmi pigaartuusut oqarsinnaavunga, taamaammat Kalaallit Nunaat maanilu suliagut nuannaringaaraat qularnaatsumik oqarsinnaasugut isumaqarpunga, Jón Ingi Jönsson oqaluttuarpoq.

- Aamma Danmarkimit suleqateqarpugut Danmarkimi piffissap ilaani sulereersimallutik maanga uteqqissimasunik. Taakku ilarpassui maani ikinngutitaarlutillu ilisarisimasaqalersimapput, misigisarlu amerlanerit inuunerannut sunniuteqartuassaaq.

- Ilisimasat piginnaasallu sapinngisamik amerlanerpaat Kalaallit Nunaannut nuunnissaat aallaqqaataaniilli anguniarsimavarput. Aviansip Kangerlussuarmi sullissilernerata kinguninnguatigut nunaqavissunik, Kalaallit Nunaanni najugalinnik, timmisartumik angallassinermi aqutsisunik ilinniartitsilerpugut. Suliniummut tamatumunnga atatillugu timmisartumik angallassinermi aqutsisut nutaat pingasut misilitsissimavagut.

- Aamma qanittukkut Greenland Airports suleqatigalugu timmisartunik angallassinermi aqutsisunik marlunnik, ukioq manna ilinniarnerminnik aallartittussanik, toqqaavugut, taamaammat ukiuni aggersuni nunaqavissuinnaat atorlugit kiffartuussisinnaalissalluta neriuppugut.

Timmisartortartunngornissi taamaatiinnaraa

Ujarneq Sørensenip, Sisimiuneersup, ilinniarnini 2017-imi aallartippaa, tamatumalu kingorna Kangerlussuarmi illoqarfimminut qanittumi sulivoq.

- Timmisartortarneq soqutigiuaannarnikuuara. Ilinniarnertuunngorniarama timmisartortartutut ilinniarnissara takorloortarpara, inuusuppallaarlungali ukiualuillu utaqqisariaqarlunga paasitinneqarpunga. Taamaammat taarsiullugu afis-operatøritut ilinniarniarlunga qinnuteqarlungalu kingorna timmisartumik angallassinermi aqutsisutut ilinniaqqippunga.

- Taama ilinniarneq uannut pitsaanerpaavoq - naak piffissami taama sivikitsigisumi malittarisassat taama amerlatigisut ilikkarneqarsinnaanerat takorloorsimanngisaannaraluarlugu.

Ujarneq Sørensenip sulinermini mittarfiit allat Kangerlussuarmiit timmisartorpassuaqarnerusut tikeraarsimavai.

- Suliaq assigiinnarpaa. Kangerlussuaq angallaffiulluarallarmat suliassarpassuaqartarpugut – timmisartullu tamarmik piffissap sivikitsup ingerlanerani millutillu aallartarput, kisianni ataasiinnarmik mittarfittaarnerput qaqqallu pissutigalugit suliassat maani aamma imaannaanngitsuupput.

- Nuummi mittarfittaap ammarneqarnerata kingorna piffissami siullermi maani eqqissisimavugut, maannali siornatigutulli ulapitsigingajappugut. Ilaatigut sakkutuut pissutigalugit – aammali timmisartorpassuit Atlantikumik qulaassisut Kangerlussuarmi unittarniarlutik toqqarsimammassuk.

Sisimiut ilaasoq

Kangerlussuarmi timmisartunik angallasssinermi aqutsisut ulloq naallugu sulisut sisamat tallimalluunniit akornanniittut Jón Ingi Jönsson ilisimatitsivvoq.

- Sulisut atorfitsinni assigiinngitsumik sulisartut arfiniliuvugut. Soorunami piffissaq pigaartuuffigisarput Kangerlussuarmiit Kangerlussuarmullu angallattunik timmisartunillu allanik mittarfimmit ingerlasunik aqutsinermut atorneqarnerpaasarpoq.

- Sisimiut silaannakkut angallaffiummat ammatilluta aamma timmisartunik tassunga angalasunik aqutsisarpugut. Pigaartut suliassaasa ilagaat atortunik misileraatinik misissuineq, ammaanissamut qinnuteqaatinik misissuineq, pisariaqaraangat inuttanik aqutsineq, allakkanillu napasuliamiittunik nutarterineq.

- Ulluni ilaanni aamma pigaartuunerup avataatigut suliassat, kikkut tamarmik piginnaasaqarluarnissaat qulakkeertariaqaratsigit ilaatigut atuagarsornermi timmisartortuusaartitsinermilu sungiusarnerit ingerlattarpagut.

- Mittarfik ullukkut taamaallaat ammasarmat pigaartut amerlanerit ullup ingerlanerani sulisarput. Ilaannikkulli timmisartortitseqatigiiffiit ammasarfitta sivitsorneqarnissaat qinnutigisarpaat, tamannalu akulikitsumik pisarpoq, ingammik aasaanerani, taamaammat pigaartuusugut piffissamik tamatuminnga piareersimaffiginnittarpugut.

- Air Greenlandip qulimiguuliutaata annaassiniartup danskilluunniit sakkutuuisa timmisartortartut piffissami sivikitsuinnarmi timmisartortariaqarsinnaanerat pissutigalugu nalinginnaasumik ammasarfiit avataatigut timmisartumik angallassinermi aqutsisoq piareersimajuaannarpoq. Mittarfittaaq Kalaallit Nunaata iluani Atlantikulu qulaallugu angalasunik timmisartuussinermi pinartoqartillugu mittarfissatut pingaarutilittut inissisimavoq, Jón Ingi Jönsson nassuiaavoq.