Kommune Kujallermi imigassanik tuniniaaneq matuneqarpoq

Kommune Kujallermi imigassanik atuineq avatangiisinut kingunipiloqarpallaarpoq.

Taamaattumik taama ingerlaannarnissaq illersorneqarsinnaajunnaartoq, borgmesteri Malene Vahl Rasmussen (D) tusagassiuutinut nalunaarummi allappoq.

Taassuma Naalakkersuisut ullumi qinnuigisimavai Kommune Kujallermi imigassanik tuniniaanerup matuneqarallarnissaa pillugu.

Imigassanik aalakoornartortalinnik tuniniaaneq sassaalliisinnaanerlu inerteqqutaangallartussanngorlugu qinnuteqarneq Naalakkersuisut ullumi akuerigaat, Naalakkersuisut tusagassiuutinut nalunaarummi allappoq.

- Imigassanik aalakoornartortalinnik tuniniaanerup sassaalliinerullu utaqqiisaasumik
unitsinneqarnerata siunertaraa meeqqat atugarisaanut innuttaasullu isumannaatsuunissaannut ulorianartorsiortitsinerup piuneerutsinneqarnissaa, Naalakkersuisut allapput.

Borgmesterip aamma kommunimi meeqqat illersorneqarnissaat pingaartippaa.

- Imigassamik atueriaatsip nuanninngitsumik avatangiisinut sunniuteqartartut uniinnarluta isiginnaaginnarsinnaanngilagut, inuiaqatigiinnilu nuannginngitsumik pisoqaqqinnissaa utaqqiinnarlugu, Malene Vahl Rasmussen (D) allappoq.

Inerteqqut ullumimiit, tallimanngorneq 2. oktober 2026, atuutilerpoq.

- Kommunalbestyrelsip kissaatigaa imigassanik aalakoornartortalinnik tuniniaanermut sassaalliinermullu inerteqqut tamanna pillugu nalunaarutip atorunnaarsinneqarnissaata tungaanut atuutissasoq, Naalakkersuisut allapput.