Innaallagissamik imermillu atuineq akitsulerpoq – kinguaattoornerit aaqqiviginiarneqartut

Innaallagiaq imerlu 2026-mi ukiullu tulliuttut marluk akisunerulissapput.

Innaallagissamut imermullu akit ukiut pingasut ingerlaneranni januaarip aallaqqaataaniit 7 procentimik qaffassasut, Naalakkersuisut tusagassiuutinut nalunaarummi allapput.

Akitsuineq Nukissiorfiit ingerlatsinerannik, iluarsartuussinissaannut kiisalu attaveqaatinik pingaarutilinnik aserfallatsaaliuinissaannik qulakkeerinnissaaq.

- Imaappoq akigititanik qaffaanissamut pissutissaqavippoq, Naalakkersuisut allapput.

Angerlarsimaffiup ataatsip 2026-mi akit qaffannerisa kingorna, 2025-mut ukiumut akiliutigisaanniit 700 koruunit missaannik aningaasartuuteqarnerulissasut, Naalakkersuisut naatsorsuinerisa takutippaat. Tassa qaammammut 60 koruunit missaannik akiliinerusalissallutik.

Nukissiorfiit aningaasaqarnera oqimaaqatigiinngitsoq

Innaallagissamik imermillu tunisassiornermut akigimit akikinnerusumik atuisut ukiuni arlalinni akiliuteqartarnerat pissutaalluni Nukissiorfiit aningaasaqarnera oqimaaqatigiissumik ingerlasimanngitsoq, Naalakkersuisut nassuiaapput.

Taamut ingerlariuseqarneq aserfallatsaaliuinerup naammaginannginneranik aningaasaliissutitigullu kinguussaanermik kinguneqarpoq, imermillu innaallagiamillu pilersuineq aalaakkaasoq qulakkeerniarlugu akit piffissami sivisuumi akisuninngortariaqarlutik.

- Taamaaliornikkut Nukissiorfiit aningaasaliiffigisassanut kinguleruttoorutaat iluarsiiffiginiarneqassapput aammalu attaveqaatinik pitsanngorsaanermut aningaasalersuinissaq Nukissiorfinnit qulakkeerniarneqarluni, ukiuni tulliuttuni suliariumannittussarsiuussinissat pilersaarusiorneqassallutik iluarsartuussinermilu suliassanut isumaqatigiissusiortoqassalluni.

2026-mi januaarip aallaqqaataaniit akigititat 7 procentimik qaffanneqarnerat Nukissiorfinni 37 millionit koruuninik kaaviiaartitsissasoq naatsorsuutigineqarpoq. Suliffeqarfik 2024-mi 62 mio. koruuninik amigartooruteqarpoq.