Kalaallit Nunaat Hollandimiut namminiussuseqarnermut nersornaasiuttagaannik tunineqartoq

Kalaallit Hollandimi namminiussuseqarnermut nersornaasiuttakkamik, Dutch Independence Awardimik, tunineqarput. Amerikamiut Kalaallit Nunaat pigerusunnerannut iliuuserisaat pissutigalugu taamaaliortoqarpoq.

Hollandip Namminiivinnermut Aningaasaateqarfia (Stichting Nederlandse Onafhankelijkheid) tusagassiuutitigut nalunaarummi allappoq.

Aningaasaateqarfiup taamatut aalajangerneq ima itisilerpaa:

– Naliliisartut kalaallit USA-mit tiguarniarneqarnerminnut qisuariarnerat nersualaarpaat. Aalajangiusimanerat, tamat oqartussaaqataanerannik pingaartitsinerat aamma nunarsuarmi politikkimut piviusorsiornerat pillugu. Kalaallit Nunaata nunarsuarmi politikkimut tunngasunik isumaqatigiinniarfittut isiginiarneqarnera paatsuugassaanngitsumik itigartinneqarpoq, aningaasaateqarfik aalajangiineq pillugu allappoq, nangipporlu:

– Kalaallit Nunaanniit eqqissisimasumik aamma oqariartuuteqartoqarluni, attaveqarneq ajornerulersinneqanngilaq.

Kalaallit Nunaata "Amerikamiut Kalaallit Nunaanni isumannaallisaanermut tunngasunik suliaqarnerat NATO-milu suleqatigiinneq ilanngullugit“ iluarsiivigimmagu naliliisartut aamma nersualaarpaat.

- Periaaseq taanna nunap mikisup naalagaaffissuarnut tamat oqartussaaqataanerat tunngavigalugu politikkikkut qanoq illersorsinnaanermut maligassiuivoq, aningaasaateqarfik allappoq.

Folketingimi ilaasortaanikoq nersornaammik tigusissasoq

Nersornaat tallimassaa tunniunneqassaaq, Ukrainep præsidentia Volodymyr Zelenskyj ukiut 20-t matuma siorna siullersaalluni nersornaaserneqarnikuuvoq.

Aningaasaateqarfiup Folketingimi ilaasortaasimasoq Aaja Chemnitz Haagimi nersornaammik juulip pingajuani tigusisussatut toqqarpaa.

Aaja Chemnitz sapaatip-akunnerata tulliani nersornaasiinermut peqataajartorluni Haagimut angalanissani aalajangiusimallugu Sermitsiamut oqaluttuarpoq, kingornalu nersornaat nassarlugu Kalaallit Nunaannukarluni tulluartumik inissiffissarsiussallugu.

– Politikut nersornaat qaqutigoorpoq, Kalaallit Nunaannullu tunnikkumaneqarnera ataqqinaataalluni.

– Tigujumavara Kalaallit Nunaannilu sumiiffimmut eqqortumut apuunneqarnissaa isumagissallugu, Aaja Chemnitz oqarpoq.

Aaja Chemnitz folketingimi ilaasortaanermini USA-p præsidentianit Donald Trumpimit tatineqarnermi pingaarutilimmik inissisimaffeqarnikuuvoq. Ilaatigut Amerikamiut kongressimi ilaasortat kalaallit isumaat amerikami politikkerinut saqqummiunniarlugit, Danmarkimut Kalaallit Nunaannullu tikeraarnissaat suleqataaffiginikuullugu.