Siunnersuummik saqqummiussivoq Naleraq sinnerlugu Inatsisartuni ilaasortaq Kuno Fencker, taassuma siunnersuutigigamiuk Inatsisartut aalajangiissasut nunaqarfinni ineriartortitsinissamut 2050-mut pilersaarusiortoqassasoq.
Partiit tamarmik siunnersuummut tunngaviusumik tapersersuinertik ersersippaat, kisianni qanoq qanorlu sulineq ingerlanneqassanersoq assigiinngitsunik isummerfigineqarpoq. Taamaattumik Fenckerip siunnersuutaanut allannguutissatut arlalinnik siunnersuuteqartoqarluni, tamatumalu malitsigisaanik siunnersuut Inatsisartuni sanaartornermut ataatsimiititaliamut nassiunneqarpoq.
Siunnersuummik saqqummiussivoq Naleraq sinnerlugu Inatsisartuni ilaasortaq Kuno Fencker, taassuma siunnersuutigigamiuk Inatsisartut aalajangiissasut nunaqarfinni ineriartortitsinissamut 2050-mut pilersaarusiortoqassasoq.
Partiit tamarmik siunnersuummut tunngaviusumik tapersersuinertik ersersippaat, kisianni qanoq qanorlu sulineq ingerlanneqassanersoq assigiinngitsunik isummerfigineqarpoq. Taamaattumik Fenckerip siunnersuutaanut allannguutissatut arlalinnik siunnersuuteqartoqarluni, tamatumalu malitsigisaanik siunnersuut Inatsisartuni sanaartornermut ataatsimiititaliamut nassiunneqarpoq.
Sanaartornermut ataatsimiititaliaq siunnersuutip suliarineqarnerata kingorna allannguutissatut siunnersuummik ataatsimiititaliamit aamma saqqummiussaqarpoq, taasissutigineqartussaq imaalilluni:
- KANUNUPE kommunillu peqatigalugit isorliunerusunut iliuusissatut pilersaarummik suliaqarnissamut Naalakkersuisut peqquneqarnissaannik Inatsisartut aalajangiiffigisassaattut siunnersuut. Pilersaarummi inuuniarmi atukkanik tigussaasunik sullissinernullu tunngaviusunut pitsanngorsaanissaq qitiutinneqassaaq kiisalu sumi qanorlu ilinniartitaanikkut, niuernikkut, aalisarnikkut, suliffeqarnikkut, nukissiuuteqarnikkut, attaveqaasersuuteqarnikkut peqqinnissakkullu aningaasaliisoqassanersoq ineriartortitsisoqassanersorlu nassuiaasiorneqassaaq.
Ingvar Motzfeldt: Tigussaasumik iliuuseqartoqarnissaa kissaatiginarpoq
Nunaqarfiit peqatigiiffiata KANUNUPE-p siulittaasuata nuannaarutigaa Inatsisartut aamma Naalakkersuisut maanna sanaartornermut ataatsimiititaliap allannguutissatut siunnersuutaanut ataatsimoorlutik tapersersuimmata:
- Siunnersuut pillugu suli attavigineqanngilagut, kisianni nuannaarutigaarput maanna pilersaarusiornissamut periarfissaqalersoq, uagullu peqataatinneqarnissarput soorunami iluarisimaarparput. Siunniussaq pillugu aalajangerneq uagutsinnut nutaarsiassatsialaavoq, kisianni aamma ilumoorlunga oqartariaqarpunga ukiuni kingullerni piviusunngortitsinerit amigaataasimammata, aamma piumassuseqartoqartaraluartoq.
- Naalakkersuisut ataatsimeeqatigisimavagut, kingullermik 2021-imi, tassani nunaqarfinni peqatigiiffittut ataatsimeeqatigaarput taamanikkut Naalakkersuisoq, Jess Svane. Aamma partiit Inatsisartullu ataatsimiititaliaat ataatsimeeqatigisimavagut, kingullermik 2023-imi. Kisianni aamma, ataatsimiinnerit isumaqatigiiffiulluartut pitsaasunillu siunertaqartut, tassami pisariaqartivipparput siunertat kusanartut timitalersorneqarnissaannut.
Kinguaariit arlariiaat ataatsimoorlutik najugaqartitertut
Ingvar Motzfeldtip assersuutigalugu taavaa nunaqarfinni inissianik amigaateqarneq, tamatumalu kingunerisaanik inuit amerlasuut illuni mikisuni najugaqartitertut:
- Ilumoorpoq inoqutigiit arlallit, tassa utoqqaat, inersimasut, inuusuttut meeqqallu ataatsimoorlutik najugaqartut, aamma amerlasuutigut illut mikisunnguusarput, tamatumalu qaavatigut illut arlalissuit najugaqarfigissallugit piffissamut naleqqutinngillat. Taamaattumik pisariaqartitseqaagut nunaqarfinni inissiat pillugit siunnerfilimmik tigussaasumillu suliaqarnissap aallartinneqarnissaanut.
Eqqakkat pisallu ataatsimoortinneqartut
Ingvar Motzfeldtip aamma assersuutitut eqqaavaa nunaqarfinni talittarfeqarnikkut ajornartorsiutit annertusiartornerat:
- Nunaqarfiit arlallit aamma talittarfeqaqarput aserfallatsaalineqanngitsunik ilaatigullu mikivallaanik peqarput. Uggornaraluartumik maanna nalinginnaavallaaqaaq talittarfinni eqqakkat katersuunneqartarnerat, ESANI-mit suli nunaqarfinnit eqqakkat ataqatigiissaakkamik aalaakkaasumillu suli aaneqartalinngimmata. Tamanna uggornaraluartumik kinguneqarpoq pisat (aalisakkat piniakkallu) tunitsivinmnut apuussassat eqqakkallu talittarfinni sumiiffinni mikisuni ataatsimoortarnerannik.
- Nunaqarfiit arlallit assersuutigalugu imminut pilersornissamut tapertaanissaminnut periarfissarissaartorsuupput, kisianni ullumikkut nunaqarfiit arlallit atortulersuutitigut inerisarneqarnissaminnik amigaateqarput, taamaattumik talittarfinni pissutsit pitsanngorsarneqarnissaat pisariaqartorujussuuvoq ESANI-millu nunaqarfinnit eqqakkat aaqqissukkamik aaneqartalernissaat.
KANUNUPE-mi naapeqatigiissinnaaneq ajornakusoorpoq
Nunaqarfinni peqatigiiffik politikkikkut oqallinnernut, pingaartumik aamma nutaamik iliuusissatut pilersaarutit pillugit sulinissamut atatillugu, peqataarusuppoq, kisianni Ingvar Motzfeldt naapertorlugu peqatigiiffik oqallinnernut naapeqatigiinnertalinnut peqataasinnaaneq ajornakusoorpoq.
- Kommunit arlallit peqatigiiffiup ingerlanneqarnerannut siulersuisut atugassaannik aningaasanik tapiisarput, kisianni nunaqarfiit akimorlugit immitsunnut tikilluta naapeqatigiittarnissarput aamma pisariaqartittarparput. Kisianni angalaneq ajornakusoortorujussuusoq, taamaakkaluartoq nalornisigineqassanngilaq suliassap ingerlanneqarnissaani peqataarusunnerput annertuumik kissaatigalugu qilanaarigipput, Ingvar Motzfeldt naggasiivoq.
