Kommunit sipaarniuteqarnissaannik piumasaqarfiginiarneqarunnaarlutillu suliffissarsiortunut kinguneqartitsisinnaanngortut

Inatsisartut ukiakkut ataatsimiinneranni tallimanngorneq ulloq kingulliuvoq, oqaluuserisassatuarlu tassaavoq aningaasanut inatsisissap pingajussaaneerneqarnera.

Aningaasaqarnermut naalakkersuisoq Múte B. Egede (IA) Inatsisartunut akissuteqaammini aappaagumut ataatsimoortumik tapiissutit pillugit kommuninik isumaqatiginninniarnerit naammassineqaqqammertut paasissutissiissutigaa. Kommuninullu nutaarsiassatsialaqarpoq.

Naak sipaarniartoqarujussuartussaangaluartoq, nunallu karsia aningaasatigut ajornartorsiorfiugaluartoq, kommuninut ukiumi tulliuttumi ataatsimoortumik tapiissutit tamakkiisumik akinut aningaasarsianullu iluarsineqarnissapput:

- Taamaaliornermi kommunit Naalakkersuisuniit pitsaanerusumik inissisimalersinneqarput, tassami Naalakkersuisut aningaasaliissutit atugassaat akinut aningaasarsianullu iluarsineqartanngillat imaluunniit akigititaq appasinnerutillugu akinut aningaasarsianullu iluarsineqartarlutik, Múte B. Egede paasissutissiivoq.

Tamakkissumik iluarsiineq Nunatta karsianut aappaagu 45,5 millionit koruuninik naleqassaaq. Naalakkersuisut siunnersuutaanni siullermi kommunit millioninik pissarsisussaanngikkaluarput. Kommuninut ataatsimoortumik tapiissutit 2 milliardit koruunit missaanniipput.

Kommunit isumaginninnermut, utoqqarnut suliffissaqartitsiniarnermilu atugarissaarnermut suliassat qitiusut ingerlanppaat.

Kinguneqartitsinerusoqarsinnaalerlunilu spiralilerneqarsimasunut taarsiinissamut konto

Aningaasanut inatsisip akuersissutigineqarneratigut kommunit suliffissarsiortut suliffiit neqeroorutigineqartut akueriumanngippassuk kinguneqartitsisoqarsinnaalissaaq:

- Suliffissarsiortunut ikiorsiissutinut maleruagassani allanngortitsisoqarpoq, taamaalilluni pisuni immikkut ittuni, innuttaasut uteqattaartumik suliffissamik innersuunneqartumik tigusiumanatik pisoqartillugu, ikiorsiissutit 0 procentimut appartinnissaannut kommunit periarfissaqalerlutik, Múte B. Egede allappoq.

Spiralilersuinermut tunngatillugu aningaasartuutit matussuserniarlugit 0-konto nutaaq pilersinneqartoq, Naalakkersuisoq aamma ilisimatitsivoq.

Aningaasat 4,5 millionit koruunit taarsiissutissatut immikkoortinneqaqqaaraluarput, suliammi siornatigut ilimagisamit amerlanerusut paasinarsimmata aningaasalli taakku naammanngitsutut nalilerneqarput.

Partiit naalakkersuisooqatigiit aningaasanut inatsisissaq ataasinngormat saqqummiuppaat, taamaalillunilu amerlanerussuteqartut tapersiillutik.