Kujataani qulimiguulimmik angallassinissamut isumaqatigiissut nutaaq
Ineqarnermut, Attaveqaasersuutinut Isorliunerusunullu Naalakkersuisoqarfik aamma Air Greenland Qaqortumi mittarfissap atorneqalernerata kingorna nunap immikkoortuani silaannakkut angallassineq pillugu kiffartuussinissamut isumaqatigiissummik nutaamik atsioqatigiipput. Isumaqatigiissut ukiumi ataatsimi atuutissaaq.
Qulimiguulik H155 Kujataani suli angallassisarallassaaq.
Assi: Air Greenland
Qaqortumi
mittarfik nutaaq
pilersaarutit naapertorlugit apriilip 16-ianni 2026-mi ammassaaq,
maannalu ukiup siulliup ingerlanerani kiffartuussinissamik
isumaqatigiissut piareerneqarluni, taannalu 2027-mi apriilimut
atuutissalluni.
– Kujataani
ilaasunik angallassineq qulakkeerneqassappat aaqqiissutissamik
utaqqiisaasumik isumaqatigiissuteqarnissaq pingaaruteqarpoq. Tamatuma
saniatigut najukkami innuttaasut peqataatinneqarnissaat
pingaartippara, taamaattumik attaveqaasersuutit pillugit Qaqortumi
ulluni makkunani isumasioqatigiissitsivugut. Tamatumani najukkami
soqutigisaqaqatigiit 2030-p tungaanut siunissami angallannerup
aaqqissuussaanissaanut isummersoqataallutik, Ineqarnermut
Attaveqaasersuutinullu naalakkersuisoq Aqqaluaq B. Egede oqarpoq.
Isumaqatigiissutip
tamatuma kingunerisaanik Kujataani qulimiguulimmik angalanissamut
bilitsit ilanngullugit pisiarineqarsinnaalerput.
Air
Greenland allappoq ilaasartut amerlasuut erseqqissumik
paasissutissinneqarnissartik kissaatigisimammassuk, tamanna
nuannaarutigineqartoq.
- Kujataanut Kujataaniillu Nunatta sinneranut nunanullu allanut ataqatigiissumik angalanissamut maanna pisisoqarsinnaalerpoq. Tamanna sullitatsinnut toqqissisimanarnerulerpoq – aamma kinguaattoornerni taamaatitsiinnarnernilu, Jacob Nitter Sørensen oqarpoq.
Tamanut neqeroortitsisoqassasoq
Nuummiit
Qaqortumut timmisartumut bilitsit 2025-mi tuniniarneqalerput.
Kiffartuussinissamik
isumaqatigiissut qulimiguulinnut marlunnut H125-nut Qaqortumi
aallaaveqartunut, ukiup ingerlanerani Narsaq Nanortalik nunaqarfiillu
januaarip aallaqqaataannit maajip 31-annut aamma septembarip
aallaqqaataanniit oktobarip 25-annut 2026-mi angallassisussanut
tunngavoq, Air Greenland tusagassiuutinut nalunaarummini taama
ilisimatitsivoq.
Air Greenlandimit takussutissiaq.
Qulimiguulik
H155, ullumikkut Narsarsuarmit nunap immikkoortuani tamaani
kiffartuussisoq, qulimiguullit nutaat inuttallu tikisinneqarnerisa
nalaani piffissami ikaarsaariarfiusumi suli atorneqartussaavoq.
Isumaqatigiissutaagallartoq
2027-mi atorunnaassaaq, pilersaarutaavorlu Kujataani qulimiguulimmik
angallassisarneq tamanut ammasumik neqeroorutigineqarumaartoq 2030
ilanngullugu atuuttussamik.
