Løkke Amerikamiut aallartitaat oqaloqatigereerlugu: Nassuiaasoqarnissaa piumasaraarput

USA-p Danmarkimi aallartitaa Ken Howery, Københavnimi nunanut allanut ministereqarfimmut ataasinngormat oqaloqatiginnikkiartorpoq.

Oqaloqatigiinnermi tamatumani Danmarkip “killissaq aappaluttoq” erseqqissarpaa “naaggaarninilu erseqqissarlugu”.

Tamanna nunanut allanut ministerip Lars Løkke Rasmussenip (M) DR-imit TV 2-millu ataasinngornermi unnukkut apersorneqarnermini oqaatigaa.

USA-p præsidentiata Donald Trumpip sapaatip ataasinngornerullu unnuaani Nunatsinnut immikkut aallartitamik, Jeff Landrymik, toqqaanerata kingorna Howery oqaloqatigiinnissamut qaaqquneqarpoq.

Løkkep oqaatigaa, tamanna „qummukajaakkut alloriarnerusoq pimooruttariaqartoq“.

- Tamanna aamma pissutigalugu ambassadøri nunanut allanut ministereqarfimmut qaaqqusimavarput, tassanilu kalaallit sinniisaat peqatigalugu erseqqissumik naaggaarpugut, killiliussaq aappaluttoq aalajangiusimallutigu, sunarpiarlu pineqarnersoq pillugu nassuiaaffigineqaqqulluta, Løkke DR-imut oqarpoq.

Tamatumani pineqarluni Nunatta Danmarkimi Sinniisoqarfiani pisortaq, taannalu Nunatta naalakkersuisuinit Danmarkimi naalakkersuisunut attaveqaataalluni.

Danmarkimit nunanut allanut ministereqarfimmit peqataatitaq ataatsimiinnermut peqataavoq.

Løkkep TV 2-mut oqaatigaa, oqaloqatigiinnerat pillugu sukumiinerusumik oqaaseqarsinnaanani, taamaaliorunimi atorfilittat pissuserissaarnissaannut unioqqutitsinerussammat, TV 2-mut taama nassuiaavoq.

- Paasivarali præsidentip (Donald Trumpip, aaqq.) oqaatigisaa, præsidentip nammineq oqaaserisimagaa. Tamanna USA-mi naalakkersuisut allaffeqarfiata ilisimanngilaa, tamannalu naaggaarnissamut suli pissutissaqarnerulersitsisoq, Danmarkimi nunanut allanut ministerip oqaatigaa.

USA-p immikkut aallartitamik toqqaanissaa pillugu kalaallit naalakkersuisui ilisimatinneqarsimanngillat. Nunanut allanut naalakkersuisoq Vivian Motzfeldt tusagassiuutinut taama nalunaaruteqarpoq.

Ken Howery Nunatsinnut decembarip aallartinnerani siullerpaamik tikeraarpoq.

- USA-p Danmarkimut aallartitaa Howery pilersaarutit tamakku pillugit paasissutissiinngilaq. Tamannalu tatiginninnermik ersersitsinerunngilaq, Motzfeldt allappoq.

Ken Howery TV 2-mit novembarip aallartinnerani apersorneqartilluni, Trumpip Nunatsinnik tiguaaniarluni oqaaserisai qanoq isumaqarfiginerai aperineqarpoq.

- Trumpip oqaasii uteqqissavakka: USA-p Kalaallit siunissaminnik namminneq aalajangiisinnaassuseqarnerat tapersersorpaa, aallartitaq oqarpoq.

Howeryp aamma oqaatigaa, nammineq isumaqarluni „Issittumi isumannaatsuuneq kunngeqarfimmi suleqatitsinnisulli (Danmarkimik, aaqq.) isumakulunnartoqartoq”.

- Siusinnerusukkut oqaatigeriikkattut, unammillernartup tamatuma suleqatitsinnut oqaloqatigiissutiginissaanut qanorlu pitsaanerpaamik suleqatigiissinnaanissarput paasiniarlugu oqaloqatigiinnissarput qilanaaraakka. Tassami oqaatigineqartunut tusarnaarniarlunga ilikkagaqarniarlungalu maaniippunga, novembarimi taama oqarpoq.

Ritzau-ip ataasinngormat ataatsimiinneq pillugu Danmarkimi Amerikamiut aallartitaqarfiat oqaaseqartinniarsaraa.

/ritzau/