Meeqqat pillugit oqaaseqartartup sulisuusimasoq milliuunilinnik peqquserlussimasutut politiinut unnerluutigaa

MIO, Meeqqat Pisinnaatitaaffii pillugit Sullissiviusumi, sulisuusimasoq MIO-mit politiinut nalunaarutigineqarpoq.

MIO naapertorlugu ukiuni arlalinni sulisuusimasoq peqquserlussimasutut peqquserlullunilu allagaasiorsimasutut nalunaarutigineqarpoq.

- Suleqat tatigisaq aningaasanik annertoorujussuarmik peqquserluuteqartarsimanera paasigatsigu MIO-mi suleqatikkalu assorujussuaq tupaallappugut. Aningaasammi meeqqat pitsaanerpaamik atugaqarnissaannut pisinnaatitaaffiisalu qulakkeernissaannut immikkoortinneqarnikuupput, meeqqat pillugit oqaaseqartartoq Stina Sværd oqarpoq.

MIO naapertorlugu pisoq 2021-miit 2026-mut pisimavoq.

- Pasitsaassineq tigussaasunngormat eqqartuussissuserisut suleqatigalugit suliaq ingerlaannaq politiinut nalunaarutigaarput, kukkunersiuisunillu suleqateqarluta tamakkiisumik misissuinermik aallartitsilluta. Peqatigisaanik suliap ineriartornera pillugu naalakkersuisoqarfik ingerlaavartumik ilisimateqattaarparput, Stina Sværd oqarpoq.

Sermitsiap paasissutissaatai naapertorlugit arnaq politiinut unnerluutigineqartoq pissutissaqanngitsumik akissarsisinneqarsimasutut aamma suliffeqarfiup akiligassaqarnermi kortianik atornerluisutut unnerluutigineqarpoq.

Suliamut tunngatillugu politiit unnerluussissanersut Sermitsiap pingasunngornermi politiinit paasinngilaa. Suliamut tunngatillugu pasineqartoq qanoq isummernersoq aamma suli paasinngilarput.

MIO pisortanit pigineqarpoq politikkikkulli attuumassuteqanngitsumik suliaqartuulluni. Kalaallit Nunaanni meeqqat atugaannik pisinnaatitaaffiinillu nakkutilliinermik, taakkualu soqutigisaat salliutillugit suliaqartussatut pilersinneqarsimavoq.