Múte B. Egede: Naatsorsuutigaara A7-imi nunat isumannaallisaanermut politikki pillugu isumaqatigissagaatigut

Múte B. Egedep Sermitsiamit aperineqarami ullumi A7-it New Yorkimi ataatsimiinneranni siullertut suna oqariartuutiginiarneraa, qulanngivilluni akivoq. Tassa Issittumi nunat arfineq-marluk ataatsimeeqatigiilerpata Kalaallit Nunaat naligalugu issiaqatigissagaat.

- Ersarissumik oqariartuutigissavara naligiittut peqataassasugut. Suliami tamatumani akisussaaffimmik tigusinissamut piareersimavugut, aammali Kalaallit Nunaat tusarnaarneqassaaq. Tunniussaqarnerujartuinnarnitsinni, aamma peqataatinneqarnerusariaqarpugut. Tamanna ingiaqataaffigerusupparput, nunanut allanut tunngasunut Naalakkersuisoq Múte B. Egede (IA) Sermitsiamut oqarpoq.

Issittumi nunanut arfineq-marlunnut ataatsimeeqatigiittartuni ilaasortatut Kalaallit Nunaata erseqqissarusuppaa sungiusarnernut peqataasarnerup ataqatigiissaarinerullu pingaartinneqarnissaat.

Tamatumanilu naatsorsuutigineqarpoq Issittumi nunat arfineq-marluk — USA, Canada, Island, Sverige, Norge Finlandilu — aamma Danmark Kalaallit Nunaat Savalimmiullu peqatigalugit, tapersiissasut.

- Iligiinnut maannakkorpiaq pingaaruteqartoq tassaavoq nunat suleqataasut ataqatigiissaakkamik sulinissaat, tamannalu siullertut saqqummiutissavarput issittumi nunat arfineq-marluk suleqatigiinni ataatsimiilerutta, Múte B. Egede oqarpoq nangillunilu:

- Kissaatigaarput A7-it isumaqataassasut oqarutta illersornissamut isumannaallisaanermullu politikki pingaaruteqarluinnartoq. Taamatuttaarlu oqaasinngortissagipput nunat killernut aamma ilaagatta.

Isumaqatigiinnissamut aqqut takisooq

Naalakkersuisut siulittaasuata Jens-Frederik Nielsenip nalunaarutigeqqammerpaa USA-p, Kalaallit Nunaata Danmarkillu akornanni isumaqatigiissut marlunngornermi nunatta nalunaaqutaa malillugu nal. 13.30 atsiorniarlugu naatsorsuutigalugu.

Nunanut allanut tunngasunut naalakkersuisup aamma isertuutinngilaa qaammatini arfineq-pingasuni kingullerni suleqatigiissitami isumaqatigiinniarnerit ilungersunarsimallutik:

- Suliaq ilungersunarsimaqaaq, suliassalli ilaat imaannaanngikkaluartut illuatungeriit pingasut tamarmik akuerisinnaasaannik aaqqiissutissarsivugut. Tamanna tamanut ajugaaneruvoq.

USA-p nunanut allanut ministeria Marco Rubio A7-it ataatsimiinneranni Amerika sinnerlugu peqataassaaq, Múte B. Egedep amerikamiumut suleqatiminut qanoq oqarniarnerluni nalunngilaa:

- Kiisami aaqqiissutissamik nassaartoqarnera qujamasuutigaarput. Illuatungeriit akornanni unammillernartoqarmat isumaqatigiissutissamik nassaarniaqatigiissimavugut. Immitsinnut toqqarluta isigisinnaasimagatta naaperiaqatigiillutalu, qujamasuutigaara, oqarpoq.