Naleqqap Múte B. Egedemut tatiginnikkunnaarneq nalunaarutigigaa

Naalakkersuisup suliap suliarineqarnerani Inatsisartunut tatiginninnginnerminik ersersitsisinnaanera apeqquserneqarsinnaanngitsoq partii isumaqarpoq.

Naleraq naapertorlugu naalakkersuisup USA-mik isumaqatiginninniarnerit pillugit – pingaartumik Kalaallit Nunaata illersorneqarnissaanik toqqaannartumik akiliisarneq pillugu apeqqut pillugu – Inatsisartunut eqqunngitsunik imaluunniit paatsuuinertalimmik paasissutissiisimanera ajornartorsiutaavoq.

Naleqqap tunngavilersuutimini naalakkersuisup oqallinnermi oqaaserisai innersuussutigai, tassanilu ima oqarpoq:

– Akilerneqarneq naqissuserlara, malitseqakkajuttarpoq piumasaqaatinik pilliuteqarnermillu ullumikkut pilliutigisatsinnik anginerungaartunik, naalakkersuisup oqaaseqaataani Naleqqap tatiginnikkunnaarnermik taasititsinissamut tunngavilersuutimini innersuussutigisaani allassimavoq.

– Taamaammat tamanna piareersimaffigineqarsimappat, Naalakkersuisut taanna aqquttoqqarumanikuunngilaat. Allat taanna toqarusussimagunikku taanna toqqagassaraat.

Oqaaseqaat taanna naalakkersuisup akissutaanut akerliusoq Naleraq isumaqarpoq, tassanimi allassimavoq:

– Tassunga atatillugu Kalaallit Nunaata illersorneqarnissaanut Naalakkersuisut USA-mit toqqaannartumik akiliisitsiniarsimanngillat.

Naleraq naapertorlugu paasissutissat pineqartut Inatsisartunut eqqortumik tamakkiisumillu tunniunneqartariaqarsimagaluarput.

Tamatumunnga tunngatillugu Naalakkersuisut akisussaaffii pillugit Inatsisartut inatsisaata § 6-iat partiip innersuussutigaa, tassanilu ilaasortaq Inatsisartunut eqqunngitsumik imaluunniit paatsuugassaasumik paasissutissiippat akisussaatinneqarsinnaasoq allassimavoq.

– Nunanut allanut atsioqatigiittoqarniartillugu piviusut toqqorterneqannginnissaat innuttaasut tatigisariaqarpaat, Naleraq allappoq.

Naalakkersuisup ataatsimiititaliami matoqqasumik ataatsimiinnermi paasissutissat isertuussat saqqummiunneqarnerat pillugu isornartorsiuinera partiip aamma qisuariarfigaa. Naalakkersuisoq saqqummiussineq pillugu akissuteqaammini ima nassuiaavoq:

– Kalaallit Nunaatali nunanut allanut politikkianik Naalakkersuisut Inatsisartullu

suleqatigiinnerini tatiginninnermik tunngaviusariaqaraluartumi innarliivoq.

Naleqqap tamanna partiip sulineranut apeqqusiinertut isiginngilaa, naalakkersuisullu Inatsisartuni tatigineqaqqaartariaqartut erseqqissarpaa.

– Naalakkersuisoq Inatsisartunik tatiginnikkunnaarsinnaanngilaq, tamanut Naalakkersuisuugami, Naleraq oqarpoq.

Inatsisartut ataatsimiinnerat nalunaaqutaq 12.30 nanginneqassaaq, tassanilu Naleqqap naalakkersuisumut tatiginninnginnermik taasititsinissamik siunnersuutaa ilaasortanit isummerfigineqassaaq.