Nunarsuaq tamakkerlugu misissuinermi Kalaallit Nunaat Danmarkilu tapersersorneqangaatsiartut

Nunarsuaq tamakkerlugu isumasiuinerup nutaap takutippaa USA-mut akerleriinnermi Kalaallit Nunaat Danmarkilu tapersersorneqangaartut. Taama Berlingske Tidende allaaserinnippoq.

Nunani 98-iusuni 85-it amerlanerussuteqagaatsiarlutik Kalaallit Nunaannik Danmarkimillu isumaqataalluinnarput, nunanilu aqqanilinni nalornissuteqartut 4,7 procentit ataallugu inissisimasut  kisitsisit takutippaat.

Nunat marluinnaat — Israel aamma Den Dominikanske Republik — innuttaasa amerlanerussuteqartut USA tapersersorpaat.

Tamat oqartussaaqataanerannik misissuinerup Democracies Percerption Indexip Nera Data aamma kattuffiup Alliance of Democracies misissuineranni tamanna ersersinneqartoq, Berlingske allaaserisaqarpoq.

Ukraine aamma tapersersorneqarpoq

Copenhagen Democracy Summit ingerlanneqarnissaa sioqqullugu tamat oqartussaaqataanerat pillugu misissuineq ingerlanneqarpoq. Copenhagen Democracy Summit marlunngornermi ingerlanneqassaaq.

Nunani 98-ini inuit 94.000-init amerlanerusut akissutaat tunngavigalugit qulingiluassaanik misissuisoqarpoq.

Aatsaalli inuit apeqqutinut aalajangersimasunut tunngatillugu kina isumaqatigineruneraat aperineqarput.

Ukrainemi sorsunneq pillugu nunani 55-ini innuttaasut Ukraine tapersersorpaat, nunanilu 30-ni Rusland tapersersorneqarluni.

Nunanit amerlanerusuni Danmakip Kalaallit Nunaatalu atugarisaat paasilluarsinnaagaat

Nunat amerlanerit Kalaallit Nunaannik Danmarkimillu tapersersuinerat nunanut allanut sanilliullugu Danmarkip Kalaallit Nunaatalu inissisimaffiannik paasinninnissaq ajornannginneruneranut pissutaavoq.

- Naalagaaffik pissaanilittut piumasani naammassiniarlugu pissaanini atorniarlugu misiliisutut isiginiarneqarsinnaavoq, Anders Wivel, pissaaneqarnerup politikkianik nunallu mikisut nunat tamalaat akornanni politikkiannik ilisimatooq, Berlingskemut oqarpoq.

Kalaallit Nunaat Issittumi inissisimanera pillugu Danmarkimut USA-mullu pingaaruteqarluinnarpoq.

2019-imi USA-p præsidentiata Kalaallit Nunaat USA-mit aqunneqalernissaa siullermeerluni kissaatigaa.

Danmarkip Kalaallit Nunaatalu tamanna isuma itigartippaat, Trumpili isumaa allanngorsimanngilaq. Akerleriinneq pissaaneq atorlugu Kalaallit Nunaannik tiguaanissaq Trumpimit tunuarsimaarfigineqannginnera pissutigalugu diplomatiskikkut suliaqarnermi ajornartorsiutaalerpoq.

EU-mili ilaasortaasut Danmarkip Kalaallillu Nunaata allamut atananitik imminut naalakkersornerat tapersersorpaat.

/ritzau/