Keira Alexandra Kronvold pinngitsaaliilluni arsaarinneq pillugu suliami taperserneqartoq

Keira Alexandra Kronvold Kalaallit Nunaanneersoq Vestre Landsret-imi, 2024-mi panimmi inunngornerata kinguninngua arsaagaanikuunera pillugu tunngaviusumik aalajangiinermi tallimanngormat ilalerneqarpoq.

Taama arnap eqqartuussissuserisua, Gert Dyrn, oqarpoq.

- Inoorlaamik uani pisumi arsaarinninneq inatsisinik unioqqutitsineruvoq, taanna oqarpoq.

Angajoqqaat piginnaaneri pillugit misissuinermi atorneqartartoq, FKU-mik taaguutilik, meeqqanik pinngitsaaliissummik arsaarinnissutiginninnermi 2025 tikillugu periuserineqartoq pissutigalugu suliaq tusagassiuutitigut sammineqangaatsiarpoq.

Misissuutit isornartorsiorneqartut

Qallunaat naalakkersuisui misissuutit taakku atuukkunnaarsinneqassasut 2025-mili aalajangiuppaat, taamatullu kalaallit meerartaannik arsaarinninnermut sulianut immikkut siunnersortit atorneqartarnissaanik kommuuninut pisussaaffiliillutik.

AAMMA ATUARUK 

Keira Suliareqqitassanngortitsinermut aqutsisoqarfimmut ajorsartoq

Tamanna pivoq misissuinerit kalaallit kulturiannut aamma inooriaasiannut naleqqutinnginnerat isornartorsiorneqareersorlu.

Keira Alexandra Kronvoldip meeraanik 2024-mi arsaarneqarnissaanut misissuutit tunngavigineqartut pisoqaavallaartut Vestre Landretimi tallimanngormat nalilerneqarpoq.

Taanna meeqqaminik marlunnik 2014-imi 2015-imilu arsaarneqarnikuuvoq, tamatumunngalu atatillugu angajoqqaatut piginnaanernut nalilersuutit maanna isorineqaqisut atorneqarnikuullutik.

Misissuinerit imarisaat pissutigalugit pania inoorlaaq 2024-mi erniunerata kinguninngua arsaarinnissutigineqarpoq.

Tunngavilersuutigineqartoq naammanngilaq

Paniusup 2024-mi arsaarinnissutaaneranut “tunngavilersuutigineqartut naammanngitsut” pissutigalugit eqqartuussisuuneqarfik taama inerniliivoq.

Keira Alexandra Kronvoldip qitornaanik 2024-mi pinngitsaaliissummik arsaarinninnissamut misissuinermi tunngaviusut pisoqaavallaartut, tallimanngornermi Vestre Landsret-imi aalajangiinermi nalilerneqarpoq.

Kalaallisut tunuliaquteqarnera misissuinermi aamma malinneqarsimanani.

- Aammattaaq Keira Alexandra Kronvoldip kalaaliunera angajoqqaat piginnaaneri nalilersorneqarnerani eqqarsaatigineqarsimanngilaq, eqqartuussivik allappoq.

Aalajangiinermi inoorlaamik pinngitsaaliilluni arsaarinninneq pineqarpoq - arsaarinnittoqarnikuuneranut naliliinerit kingorna suliarineqartut pineqanngillat.

- Maannamut nuannaaqaagut

Keira Alexandra Kronvoldip eqqartuusisuuneqarfimmi taperserneqarnini nuannaarutigigaa Gert Dyrn oqarpoq.

Suliareqqitassanngortitsinermut aqutsisoqarfiup suliaq eqqartuussisuuneqarfimmut suliareqqitassanngortissinnaavaa.

- Maannamut nuannaaqaagut, aamma kalaallinit inuiaqatigiinnit tamanna nuannaarutigineqarpoq, Gert Dyrn oqarpoq.

/ritzau/