Nutaarsiassat naatsut: Timersoqatigiit Kattuffiata USA-mik mattussisinnaaneq isumaliutiginngikkaa

Timersoqatigiit Kattuffiata USA-mik mattussisinnaaneq isumaliutiginngilaa

(HD) Timersoqatigiit Kattuffiat USA-mi timersornermut atatillugu unammiuaarnernik peqataatitsiunnaarnissaminik allannguinissaminilluunniit maannakkut eqqarsaateqanngilaq, naak Nunatta USA-llu akornanni politikikkut pissutsit præsidentillu Donald Trumpip oqaaseqaatai ilungersunaraluartut. Timersoqatigiiffiit Kattuffianni siulersuisuni siulittaasoq Claus Nielsen AG-mut mailikkut taama ilisimatitsivoq.

- Politikikkut pisut malinnaaffigilluarpavut, ullumikkullu inassutigineqartunit allaanerusumik siunnersuuteqartoqassagaluarpat maleruassavavut. Maannali taama inissisimasoqarnerani USA-mik suleqateqarnermik allannguinissaq eqqarsaatigineqanngilaq, oqarpoq.

Nunanit tamalaanit tusagassiortunut malittarisassat sukaterneqartut

Nunanit allanit tusagassiuutitigut saaffiginnissutit amerliartornerat allaffissornikkullu periarfissat killeqarnerat pissutigalugit, Kommuneqarfik Sermersooq nunanit tamalaanit tusagassiortunut najoqqutassianik nutaanik nittartakkamini saqqummiussivoq.

Apeqqutit ilarpassui akineqarsinnaanngitsut, borgmesterilu nunat assigiinngitsut akornanni politikimut tunngasunik apersuinernut peqataajumanngitsoq, kommuni ilisimatitsivoq. Aammattaaq Nunatsinni inatsisit malinneqarnissaat kiisalu meeqqat inuiaqatigiinnilu sanngiitsut illersorneqarnerulernissaat pingaartinneqarput, ilaatigut akuersissuteqarnani immiussisoqaqqusaanani.

Qeqertami iliveqarfimmik allilerinissaq

Iliveqarfik ulikkaarluinnalermat, kommunimut pilersaarummut tapiliussaq atorlugu iliveqarfiup allilerneqarnissaa periarfissarsiuunneqarpoq, ilivernut nunaminertanik nutaanik siunissami inissaqarsinnaaleqqullugu. Iliveqarfiup taamaallaat kimmut annertusinissaa periarfissaavoq, sammiviit allat ujarassuartaqarlutilluunniit nunatakimmata, illerfit matusinnaanissaannut ikkappallaassallutik.

Iliveqarfiup allilerneqarnissaanut pilersaarut nutaaq januaarip arfineq-aappaanni 2026-mi atuutilerpoq.

Sumiginnaaneq ilungersunartoq ikuallattoqarneratigut paasinarsisoq

Ilulissani mittarfissap sanaartorneqarnerani ikuallattoqarneratigut upalungaarsimasut ikuallattumut qatserinissaminnut imermik naammattumik pilersorneqannginnerat paasinarsivoq. Qatserinermi qatserisartut illoqarfimmit biilinik imerterutinik atuisariaqarsimapput, mittarfiup eqqaani imeqarfiit annikippallaarnerat pissutigalugu – ajornartorsiut kommunip siusinnerusukkut tikkuarsimasaa. Kommuni nittartakkamini taama allappoq. Upalungaarsimanermi annertuumik amigaateqartoqartoq pisup takutippaa, tamannalu borgmesterip oqaatigaa, mittarfissaq ammartinnagu aaqqiivigineqartariaqartoq, siunissami ikuallattoqassagaluarpat isumannaallisaanissaq qulakkeerniarlugu.

Peqqissutsimik isumaginnittut sulisussaaleqillutillu aningaasatigut ajornartorsiortut

Peqqinnissaq pillugu Siunnersuisoqatigiit 2025-mut ukiumoortumik nalunaarusiaminni oqaatigaat, innuttaasut misigisimasaminnik pitsaanerusunik paasissutissiisarnissaannik pisariaqartitsisoqartoq, peqqissutsimik isumaginnittunut aningaasalersuineq patajaatsoq aamma aqutsinerup nukittorsarneqarnissaa inassutigineqarput. Siunnersuisoqatigiit innuttaasunik apersuisoqartarnissaa kiisalu aningaasaqarnermik, missingersuutinik aqutsinermik pingaarnersiuinermillu arlaannaannulluunniit attuumassuteqanngitsumik misissuisoqartarnissaa ilaatigut innersuussutigaat. Sulili unammilligassaq annerpaaq tassaalluni sulisussaaleqigaluttuinnarneq taartaasartunillu atuivallaarneq. Taamaattumik siunnersuutigineqarpoq qallunaat napparsimmaviinik paarlakaajaannerusumik aaqqissuussisoqartalernissaa, ilinniartitaanikkut suleqateqarneq aamma sulisoqarnermut suliniutit malunnaatilimmik pitsanngorsarneqarnissaat. Tamatuma saniatigut oqarasuaatikkut nakorsiartitsisarneq pitsaasutut erseqqissarneqarpoq, Peqqissutsimullu Siunnersuisoqatigiit kaammattuutigaat, digitalimik aaqqiissutit sukkanerusumik atuutilersinneqassasut aamma napparsimasunut nakorsiartunut elektroniskimik nalunaarsuisalernissamut suliaqarnermi piginneqataasutut misigisimanerulissasut.

Inuusuttut aamma tusaaniarneqartariaqartut

Siumup Inuusuttunut Suliniaqatigiiffiata, SIS-ip, meeqqat inuusuttullu siunnersuisoqatigiiffiat SORLAK, Nunatsinni partiit inuusuttaannik katersortitseqqullugu, taamalu Nunatsinni maannakkut pisut pillugit oqallitsitsinissamik aaqqissuusseqqullugu kajumissaarpaa. SIS tusagassiuutinut taama allappoq.

- Nunatta meerartaralutalu inuusuttaraatigut, Nunatta naalagaaffinngornissaanut akisussaaqataavugut, Nunatta inuusuttaraatigut taamalu Nunattalu siunissaraluta. Meeqqat inuusuttullu isumaasa oqaasiisalu nuna tamakkerlugu tusarneqarnissaat pisariaqarluinnartutut pingaaruteqarluinnartutullu nalilerparput.

Kujataani najukkani timersorneq nukittorsarneqassasoq

Kommune Kujallermi timersornermik ingerlatallit Qaqortumi sapaatip akunnerani matumani siusinnerusukkut isumasioqatigiissinneqarmata inuit 35-t peqataapput – taakkununnga ilaallutik najukkani timersortartut peqatigiiffii, timersortarfissuarnik aqutsisut, atorfillillu kulturimik suliaqartut.

Isumasioqatigiinnermi Kommunimit nunallu immikkoortuinit timersornermut tapiissutit, siulersuisuni sulineq aamma timersornikkut maleruagassat isumaqatigiissutillu assigiinngitsut aamma eqqartorneqarput, Kommune Kujalleq nittartakkamini taama allappoq.

Najukkani timersornerup nukittorsarneqarnissaa, isumasioqatigiinnermi siunertaavoq. Isumasioqatigiinneq aaqqissuisunit pissarsiffiulluartutut nalilerneqarpoq, peqataasullu najukkaminnut uterunik ukiup ingerlanerani ataatsimiinnernik sammisaqartitsinernillu ingerlatitseqqinniarlutik.

Podcastimik unammisitsinermi nutaami atuartut oqaaseqarsinnaatinneqartut

Kivitsisap aamma Ilinniartitaanermullu Aqutsisoqarfiup “Atuartut Nipaat” aallartippaat, taanna tassaalluni nuna tamakkerlugu podcastimik atuartunut akullerni atuartunut unammisitsinissaq. Atuartut nipimik oqaluttuamillu piviusorsiorluni suliaqarnissaminnut kajumissaarneqarput qulequttat “Inuunera” aamma “Oqaluttuaq pitsaasoq” qulequtaralugit. Atuarfiit tamarmik mikrofoninik tunineqarsimapput, peqataanissamulli piumasaqaataanngilaq. Podcastit naliliisartunit nalilersorneqartassapput ajugaasullu KNR Radiokkut aallakaatinneqassallutik.