Kim Kielsen Siumumit aamma ilaasortaajunnaarpoq

Politikeri partiimi Siumumi malunnaateqarluartoq, tassa Kim Kielsen, ukiuni 41-ni ilaasortaareerluni Siumumit ilaasortaajunnaartoq, KNR allaaserisaqarpoq.

- Vivian Motzfeldt tamakkiisumik isumaqatigaara, tallimanngormat Siumut naalakkersuisooqatigiinniit aninera aalajangerneruvoq kukkusumik, isumagalu naapertorlugu paasiuminaatsumik tunngavilik.

ATUARUK AAMMA

Vivian Motzfeldt Siumumit anivoq

- Innuttaasut qinigaat qarsutiinnarlugit aalajagiisoqarsinnaanngilaq, Siumullu imminut sunniutaarutsilluni siunnerfeqarsimanngisaannarpoq, tusagassiutinut nalunaarut tunngavigalugu KNR allaatigisaqarpoq.

Siumumi siulersuisuunerit tallimanngormat aalajangerput partii naalakkersuisoqatigiinni ilaajunnaassasoq. Tamassumalu kingunerisaanik politikerit malunnaatillit marluk partiimit tunuarput.

Vivian Motzfeldt aamma Kim Kielsen Sermitsiamut tallimanngormat oqarput, naalakkersuisoqatigiinnit aninissaq partiip siulersuisuunerisa aalajangigaat isumaqatiginagu, partiili ataatsimoorneq inuiaqatigiinnillu katersuutsitsinissaq anguniarlugu sulisariaqartoq.

Kim Kielsen Sermitsiamut tallimanngormat oqarpoq naalakkersuisoqatigiinnit aninissamut tunngavilersuutit pillugit isumaqatigiinngittoqartoq.

Kim Kielsen Siumumi 2014-imiit 2020-p tungaanut siulittaasuuvoq aammalu partii sinnerlugu Naalakkersuisunut siulittaasuunikuulluni. Siumup naalakkersuisoqatigiinnit anineranit naatsorsuutigineqartussaassaaq Kim Kielsen Inatsisartuni siulittaasuujunnaassasoq.