Ombudsmandi erseqqissaasoq: Meeqqat angerlarsimaffiup avataanut inissinneqarsimasut ilinniartinneqartanngikkunik imminut ikiorsinnaassanngillat
Meeqqanik atuartitsisinnaasunik atuartitsisussarsiorneq ajornakusoortartoq meeqqat ulloq unnuarlu angerlarsimaffiata Namminersorlutik Oqartussanit pigineqartup paasissutissiissutigaa. meeqqat inuusuttullu pisortat inissiisarfiinut inissinneqarsimasut inatsisitigut atuartussaatitaaneq tunngavigalugu atuartinneqannginnerat assut ilungersunartuusoq Inatsisartut Ombudsmandiannit oqaatigineqarpoq.
Ombudsmandip Gedion Jeremiassenip meeqqat inuusuttullu pisortat inissiisarfiinut inissinneqarsimasut inatsisitigut atuartussaatitaaneq tunngavigalugu atuartinneqannginnerat assut ilungersunartuusoq oqaatigaa
Assi: Leiff Josefsen
Inatsisartut ombudsmandiata Gedion Jeremiassenip meeqqat inuusuttullu angerlarsimaffiup avataanut inissinneqarsimasut atuartinneqarnerat pillugu erseqqissaateqarpoq.
Angerlarsimaffiup Isikkiviup, Sisimiuni meeqqat inuusuttullu ulloq unnuarlu angerlarsimaffiata Namminersorlutik Oqartussanit pigineqartup, misissuiffiginerani linniartitsisunik paaqqinniffimmi ilinniartitsisinnaasunik pissarsiniarneq ajornakusoortinneqartarsimasoq ilisimatitsissutigineqarpoq.
Tamanna pissutigalugu meeqqat inuusuttullu pisortanit isumagineqartut inatsisitigut pisussaaffiit malillugit atuartinneqartannginnerat ombudsmandip ilungersunartutut isigalugu erseqqissaavoq:
- Tassunga atatillugu ombudsmandimit oqaatigineqarpoq, pisortanit meeqqat nakkutigineqartut atuartinneqanngikkunik imminut ikiornissamut sapiissuseqartinneqarsinnaanngitsut, misissuineq 2024-mi septembarimi ingerlanneqartoq pillugu tusagassiutitigut nalunaarummi taama allappoq.
Misissuissasoq
Taamaammat ombudsmandip meeqqat inuusuttullu inissiisarfimmiittut pisariaqartumik atuartinneqarnissaat qulakkeerneqassasoq inissiisarfik qinnuigaa, tamatumalu saniatigut nunatsinni meeqqanut inuusuttunullu ilinniartitsinermut neqeroorutigineqartut misissornissaat aallartissavaa.
Ombudsmandip paaqqinnittarfik aamma nersualaarpaa. Misissuinerminut atatillugu Isikkivimmi aqutsisut sulisullu najugaqartunut toqqissisimanartunik naleqquttunillu avatangiiseqarniarlutik sapinngisaminnik iliuuseqartut inerniliivoq.
Sulisut najugaqartut atugarissaarnissaat qulakkeerniarlugu iliuuseqangaatsiartarlutillu immikkoortortaqarfik nuannersumik angerlarsimaffiulluartumillu pisatsersorsimagaat aamma allappoq.
