Piffissami nalorninartorsiorfiusumi atugarissaarneq pillugu tusagassiortunik katersortitsineq: Nutaarsiassat malinnaavigiinnaavinnginnissaat eqqaamajuk

Peqqissutsimut inunnullu innarluutilinnut naalakkersuisoq Anna Wangenheim (D) aamma meeqqanut, inuusuttunut, ilaqutariinnut, nunamut namminermut, ilinniartitaanermut, kultureqarnermut, timersornermut ilageeqarnermullu naalakkersuisoq Nivi Olsen (D) tusagassiortunik nal. marlunut katersortitsinissamut aggersaapput.

Naalakkersuisut nittartakkaminni paasissutissiipput.

Piffissami nalorninartoqarfiusumi isumassuineq atugarissaarnerlu sammineqassapput.

Naalakkersuisut siulittaasuata Jens-Frederik Nielsenip (D) aamma aningaasaqarnermut akileraartarnermullu naalakkersuisup Múte B. Egedep, (IA) piffissami Amerikamiut præsidentiata arlaleriarluni Kalaallit Nunaat aqukkusullu oqariartuuteqartarnerani, Kalaallit Nunaata USA-mut attaveqarnera pillugu tusagassiortunik katersortitsinerisa kingorna maanna aamma katersortitsisoqartussanngorpoq.

Danmarkimi ministeriuneq Mette Frederiksen tallimanngormat Nuummiippoq, Jens-Frederik Nielsenilu ataatsimeeqatigalugu. Danmarkimut aallaqqitsigani tusagassiortunut ima oqarpoq.

- Pisut kalaallinut innuttaasunut qanoq ajornakusoortiginerat malugisinnaavara. Ullumi inuit assigiinngitsorpassuit oqaloqatigiikka, taakkulu tamarmik assigiimmik oqaaseqarput. Kalaallit Nunaanniittusi tamassi Danmarkip qanoq ersaritsigisumi, sakkortutigisumik, annertutigisumik kialaartigisumillu tapersersoraasi malugisinnaagissi neriuppunga, ilaatigut oqarpoq.

Peqqinnissaqarfik ulloq unnuarlu saaffigineqarsinnaavoq

Anna Wangenheim kikkut tamarmik, aamma inuit innarluutillit, toqqissisimanissaat qulakkeerneqartariaqartoq tusagassiortunik katersortitsinermi oqarpoq.

- Nunatta siunissaa nunani tamalaani sammineqartorujussuuvoq. Innuttaasut tamarmik, inuusuttuniit utoqqarnut, pisunit sunnerneqaqqapput.

- Soorlu Coronp nalaani pissutsit assigalugit, peqqinnissaqarfik ulloq unnuarlu ammasarput, Anna Wangenheim oqarpoq.

Nutaarsiassat tutsuiginartut malinnaavigineqassasut

Immitsinnut paarinissaq pingaaruteqartoq naalakkersuisoq oqarpoq.

- Eqqarsartaaserput paarissavarput, nutaarsiassallu suut malinnaavigissanerlugit eqqarsaatigalugu.

- Nutaarsiassat ingerlaannavipput. Nutaanik pisoqartuaannavippoq.

Taamaammat nutaarsiassaqarfiit tutsuiginartut malinnaavigineqassasut, soorlu nutaarsiassaqarfiit nunatsinniittut, Anna Wangenheimip oqaatigaa.

Inuit attaveqaqatigiiffii malinnaavigiunnaarallarneqarsinnaasut aamma oqaatigaa. Nutaarsiassat malinnaavigivallaarnagit anilluni pisuttuartoqarsinnaasoq oqarpoq.

Inuit tatineqarujussuaraangamik eqqarsartaatsimikkut atugarissaarnikkullu qanoq sunnerneqartarnerat Kalaallit nunaanni peqqissusermik Ilisimatusarfimmit misissorneqaleruttortoq aamma oqarpoq.

Ileqqut nuannersut

Piffissami matumani pikkunartorsiorfimmi ileqqut nuannersut attannissaat pingaaruteqartut Anna Wangenheimip oqaatigaa.

- Eqqarsartaatsitigut peqqissuuneq nukittorsarniarlugu naleqartitat uagutsinnullu peqqinnartut attannissaat pingaaruteqarput.

Angajoqqaat akisussaaffii

Nivi Olsen oqaaseqarluni aallartippoq. Angajoqqaatut angerlarsimaffimmi toqqissisimatitsinissaq eqqartorpaa.

- Angajoqqaatut meeqqavut qanoq ittuunersut nalunnginnerpaavarput. Susoqarnera pillugu meeqqatsinnut nassuiaariaasivut assigiinngillat, oqarpoq.

Meeqqat toqqissisimanissaat pingaarnerpaasoq oqarpoq, aammali pisut pillugit meeqqat oqaloqatigisarnissaat kaammattuutigalugu.

Meeqqap ulluinnai allanngortinnginnissai pingaaruteqarpoq.

Meeqqat oqaloqatiginissaannut kaammattuutit

Pisut pillugit meeqqat qanoq oqaloqatigineqarsinnaanerinut kaammattuutinik saqqummersitsinertik oqaatigaa.

Taakku Paarisap Facebookiani, TikTokiani Instagramianilu takuneqarsinnaapput. Video pisoqassagaluarpat qanoq iliorsinnaanermut siunnersuutinik imalik Naalakkersuisut nittartagaanni takuneqarsinnaapput.

Unicef meeqqat piffissami matumani tapersersornissaat pillugu ilitsersuummik aamma suliaqarnikuuvoq. Nittartagaanni takuneqarsinnaavoq. Quppersakkat illoqarfinnut nutaqarfinnullu nassiussorneqassapput, taakkulu Pilersuisuini aaneqarsinnaapput.

Nutaarsiassat imaaginnavimmata taakku alariarlugit meeqqat pinnguaqatigisarnissaat Nivi Olsenip kaammattuutigaa.

Annilaanganeq aqutsissanngilaq

Meeqqat anginerit inuusuttullu Kalaallit Nunaanni nunalluunniit avataani ilinniarfinni assigiinngitsuniittut angerlartinnissaat angajoqqaat eqqarsaatigisinnaavaat. Tamatumunngali naalakkersuisoq eqqissisaavoq.

- Piffissami matumani pikkunartorsiorfiusumi unittuunnginnissarput pingaaruteqartorujussuuvoq. Ingerlaannassaagut, tapersersoqatigiilluta ingerlaannarnissarput pingaaruteqarpoq. Annilaanganerup aqussanngilaatigut.

Kalaallit Nunaanni ilinniarfinni tamani pitsaasumik atugassaqarnissaq toqqissisimanissarlu annertuumik sulissutaasut, ataavartumillu attanneqartut, oqarpoq.

Ilinniartitaanermut Aqutsisoqarfik Kalaallillu Illuutaat suleqatigalugit qanorluunniit pisoqaraluarpat inuusuttut paarinissaannut ikiuigasuarnissamut upalungaarsimanissamullu pilersaarusiortoqarnissaa isumaqatigiissutigineqarsimasoq, Nivi Olsen paasissutissiivoq.

- Atuarfinni aamma ilinniarfinni ikiuigasuarnissamut upalungaarsimanissamullu pilersaarummik atuinissamik pinngitsoortitsisoqassasoq neriuutigaarput. Maannakkulli avataanit tatiniarneqarnermik misigisaqarnerput suli allanngunngilaq. Taamaattumik pisut oqaloqatigiissutigineqarnissaat pingaartuvoq, aamma maannakkut eqqissisimanerullusi misigisimanissarsi neriuutigaarput, oqarpoq.

Tusaannga saaffigineqarsinnaasoq

- Sinerissamut angalanissarput pilersaarusiorparput, taamaattumik naalakkersuisunut ilaasortanik naapitsinissaq taamaattumik naatsorsuutigineqassaaq, oqarpoq.

- Ilanngullugu sinerissami sumiiffinni assigiinngitsuni peqqinnissaqarfiit upalungaarsimanermut pilersaaruteqareernerat oqaatigisinnaavara, soorunami artorsartilluni Tusaannga sianerfigineqarsinnaajuaannarpoq, Anna Wangenheim oqarpoq.

Allatigut iliuuseqartoqaqqinnissaa pisariaqartinneqarpat Naalakkersuisut piareersimasut aamma oqaatigaa.