Greenland Airportsip Nuup mittarfiani killilersuinerit maanna atuuttut decembarimi sakkukillineqarnissaat anguniaraluarpaa.
Greenland Airportsip timmisartut nalunaaquttap akunneranut tikissinnaallutillu aallarsinnaasut amerlineqarnissaat sisamaniit tallimanut amerlitinnissaat kissaatigigaluarpaa.
Greenland Airportsip Nuup mittarfiani killilersuinerit maanna atuuttut decembarimi sakkukillineqarnissaat anguniaraluarpaa.
Greenland Airportsip timmisartut nalunaaquttap akunneranut tikissinnaallutillu aallarsinnaasut amerlineqarnissaat sisamaniit tallimanut amerlitinnissaat kissaatigigaluarpaa.
Aamma timmisartortitseqatigiiffiup nalunaaquttap akunneranut tikissinnaasut marlunninngaanniit pingasunut amerlerusukkaluarpai.
Ilaat iluatsippoq. Angallannermut Aqutsisoqarfiup siullertut kissaatigineqartoq piviusunngortinngilaa, aappaali akueralugu.
- Greenland Airportsip silaannakkut angallannerup isumannaatsuunera akornusinngikkaluarlugu akunnerup ataatsip iluani timmisartunik tikittunik pingasunik sullissisinnaasoq nalilerarput. Timmisartut akunnermi ataatsimi sullinneqarsinnaasut amerlanerpaamik sisamaanerat suli atuuppoq, maannakkulli Greenland Airports eqaannerusumik iliuuseqarsinnaalerpoq, aqutsisoqarfimmi allaffimmi pisortaq Signe Finderup Slot oqarpoq.
Septembarimiit maannamut pitsanngoriartoqartoq
Angallannermut Aqutsisoqarfiup piffissami kingullermi pitsanngorsaasoqartoq nassuerutigaa:
– Greenland Airportsip maannamut killilersuinerit atuuttut tunngavigalugit aqutsinermut atortut Nuummiit aallartussat tikittussallu pilersaarusiorluarnerunissaannut iluaqutaasut atulerpai. Silaannakkut qaammatini kingullerni pingasuni angallannerup nalilersornerani tamanna paasinarsivoq, Signe Finderup Slot oqarpoq.
Nuummi mittarfimmi nakkutilliinerup naammaginanngilluinnartutut Angallannermut Aqutsisoqarfiup naliliinerata kingorna malittarisassat nutaat septembarimi atuutilersinneqarput.
Allannguutit Air Greenlandimut unammilligassarujussuarmik nassataqarput, timmisartuutileqatigiiffiummi Atlantikoq qulaallugu timmisartuussinissaminut nunap iluani angalanerit tulleriiaallugit pilersaarusiortaraluarpai.
Taamaattumik Air Greenland angallannermik oqilisaajumalluni piffissani angallannerpaaffiusuni Nuummiit qulimiguulimmik timmisartuussisarunnaarnissamik neqerooruteqarpoq. Greenland Airportsip Angallannermut Aqutsisoqarfimmut qinnuteqaataani atuarneqarsinnaavoq.
Piffissami ulapaarfiusumi pisut nalunaarutigineqartussaasut
Angallannermut Aqutsisoqarfiup inerteqqutaa timmisartuussinerit pilersaarusiorneqarnerannut tunngassuteqarpoq. Taamaattumik malittarisassanik unioqqutitsinngikkaluarluni Nuummi timmisartuussisarnerit nalunaaquttap akunneranut sisamat sinnerlugit amerlassuseqarsinnaapput. Timmisartup kingusinaarluni tikinnera imaluunniit ulapaarnerpaaffiup avataani tamanna pisinnaavoq.
Greenland Airportsilli akunnerup ataatsip ingerlanerani arfinileriarlutik amerlanerusunilluunniit timmisartunik sullissisoqarsimappat, Angallannermut Aqutsisoqarfimmit nalunaarutiginissaat pisussaaffigaa.
Paasissutissani nalunaarutigineqartuni decembarimi sisamariarluni taama pisoqarsimasoq takuneqarsinnaavoq, ilaatigut kinguaattoornerit, ambulancet timmisartut angallassinerat qulimiguulimmillu angallassineq pissutigalugit.
Sermitsiap Air Greenland killilersuutit kinguaattoornernut qanoq sunniuteqarnersut paasiniarlugu attaveqarfiginikuuaa, kisitsisilli aalajangersimasut pissarsiarineqarsinnaasimanngillat.
Greenland Airportsip aasamut timmisartuussiffiunerpaap aallartinnginnerani Nuummi mittarfimmi timmisartumik angallannermik aqutsineq atuutilersinnissaa anguniagaraa. Timmisartut tikissinnaasut aallarsinnaasullu amerlanerujussuanngorsinnaanngussallutik.
