Piffissamik aalajangersaanissaq ataatsimiititaliamut uterteqqinneqarpoq — nalunaaquttap akunneri tallimat nikingassutaanissai annertuallaarpat?

Piffissap aalajangersarneqarnera UTC-3-mut utertinneqarnissaa aasaaneranilu nalunaaquttap atorunnaarsinneqarnissaa allannguutissatut Siumup siunnersuutaa, Inatsisartut ullumi taasissutigisussaagaluarpaat.

AAMMA ATUARUK

Piffissap aalajangersarneqarnera kinguarteqqinneqarpoq

Politikerinit tamanna akuerineqaraluarpat Kalaallit Nunaat aasakkut Danmarkimut Europallu kitaanut nalunaaquttap akunnerinik tallimanik ukiukkullu nalunaaquttap akunnerinik sisamanik 2028-miit nikingalertussaagaluarpoq, EU-mi aasaanerani nalunaaqutaq suli atuutsinneqarnera pissutigalugu.

Piffissap aalajangersarneqarnera pillugu oqallinnermi politikerit assigiinngitsut nalunaaquttap akunnerinik tallimanik nikingassuteqalernissaq arlaleriarlutik eqqartortarpaat.

Inatsisissatulli siunnersuutip inaarutaasumik aalajangiiffigineqannginnerani Inatsisartut siulittaasuat Kim Kielsen (Attaviittoq) nalunaarpoq Inatsisinut Atuutsitsinermut Ataatsimiisitaliaq piffissamik annertunerusumik atuiumalluni qinnuteqartoq, taamaattumillu Siumup siunnersuutaa pillugu aalajangiinissaq kinguarteqqinneqarpoq.

Erik Jensen (S):

- Pingaaruteqarnerpaavoq Siumup inatsisissatut siunnersuutaata ataatsimiinnermi matumani akuerinissaa, taamaammat UTC-3-mut utissaagut.

- Inatsisissatulli siunnersuutip ukiakkut ataatsimiinnissamut kinguartinneqarnera pissutigalugu piffissap nikinganera pilerpoq. Taamaattumik immikkoortup aappaani ima oqaraluarpugut: Piareersimalluarniaritsi, taamaalilluni piffissap aalajangersarneqarneranik allannguisinnaaqqullusi, Europap Kalaallit Nunaatalu akornanni nalunaaquttap akunnerinik tallimanik nikingassutaa 2028-mi atuutilersinniarlugu.

Nalunaaquttap-akunnerinik sisamanik nikingassut

Siumup inatsisissatut siunnersuutaani allaqqavoq piffissaq aasaaneranilu nalunaaqutaq oktobarip 24-anni 2026-mi atuutilissasoq. Akuersissutigineqaraluarpallu sapaatip akunnerata naaneraniit, Danmarkimut nalunaaquttap akunnerinik sisamanik nikingalissagaluarpugut, aappaagulu marsimiit nalunaaquttap akunnerinik tallimanik nikingassalluta.

Aasaanerani nalunaaqutaq Danmarkimit atuutsittuartillugu, aasaaneranilu nalunaaqutaq atorunnaarsikkutsigu, piffissaq assigiinngissuteqartuaannassaaq.

- Tamanna assigiinngitsutigut suliarineqarsinnaavoq. Soorunami siunnersuutigineqarsinnaavoq aasaanerani nalunaaqutaq qaqugu allallu inatsisissatut siunnersuummiittut allanngortinneqarnissaat atuutilerneqarsinnaaneralu suliarineqarsinnaavoq.

- Teknikkikkut suut tamarmik ataatsimiititaliami nalilersoqqinneqarsinnaapput, soorlu qanoq ilillutik UTC-3-mut utersinnaanermut pillugu, taakkuli nalunaaquttap akunnerinik sisamanik nikingapput, Erik Jensen oqarpoq.

Aalajangersimasumik Europamut piffissap nikingassutaanik ukioq iluitsoq attassiinnassagutta, EU-mi aasaanerani nalunaaquttap atorunnaarsinneqarnissaa, utaqqeqqaartariaqarparput.

Taava ataatsimiititaliaq oqassagaluarpat aasaanerani nalunaaqutaq atorunnaarsinnissaanut EU-p utaqqisariaqaripput, tamanna tapersersussavisiuk?

- Qanoq iliussanersut takoriartigu. Qanoq aaqqinneqarsinnaanersoq takussavarput il.il. Tamanna eqqartorsinnaavarput isumaliutissiissut takkuteqqeriarpat.

- Pingaarneruvorli UTC-3. Inuit kissaatigaat pinngortitap seqernullu pissusiinut naleqqussassasugut, tamannalu inatsisissatut siunnersuutitsinnut tunngaviuvoq, Erik Jensen oqarpoq.

Siunnersuutit tuaviortumik suliarineqanngilaq

Naak Siumut oktobarip 13-ani oqallinnermi, Inatsisinut Atuutsitsinermut Ataatsimiisitaliamut utertinneqarnissaa siunnersuutigigaluaraa, partii ataatsimiititaliami ilaasortaqanngilaq.

Taamaattumik ataatsimiititaliap piffissaq sivisunerusoq atornissaanik kissaateqarnera aalajangeeqataaffiginngilaat.

Inatsisinut Atuutsitsinermut Ataatsimiisitaliami siulittaasoq Bo Martinsen (D) aalajangiisoqareernerata kingorna Sermitsiamit, apersorneqarpoq

AAMMA ATUARUK

Piffissap aalajangersarneqarnerata allanngortinnissaa isumassarsiatsialaanersoq, Naalakkersuisut siulittaasuata erseqqissumik akissutissarsisinnaanngilaa

- Paasissutissat nutaat pissarsiarinerisigut ataatsimiititaliami misissueqqaarumalluta, ilassutitullu nalunaarusiussanerluta imaluunniit taamatut isikkoqartillugu ingerlateqqiinnassanerlugu nalilersorumallugu, aalajangerpugut oqaluuserisassaq kinguartinniarlugu.

Paasissutissat taakku suuppat?

- Piffissanngorpat paasiumaarpasi, Bo Martinsen oqarpoq.

Inatsisinut Atuutsitsinermut Ataatsimiisitaliaq siullermeerluni piffissaq sivisunerusoq atorlugu suliassap suliarinissaanut kissaateqanngilaq. 2026-mi upernaakkut ataatsimiinnermi aappassaaneerneqarmat Bo Martinsenip siunnersuutigaa Inatsisinut Atuutsitsinermut Ataatsimiisitaliap suliassaq misissoqqissaartariaqaraa.

Sooq tamanna kinguartinneqartuarpa?

- Inatsisissatut siunnersuut tamanut eqquisussaq tuaviuullugu suliarissanngilarput, aalajangerpugut suliassaq sukumiisumik suliarissallutigit.

Ukiakkut ataatsimiinnissamut tamanna naammassineqarnissaa naatsorsuutigaajuk?

- Aap, tamanna neriuutigaara, Bo Martinsen oqarpoq.

Pingajussaaneerneqarnissaanut suli piffissamik aalajangiisoqanngilaq.