Nuup eqqaani pisuttartut tammartut

Nuup tunuani arnat marluk pisuttuartillutik tammarsimasut, Kalaallit Nunaanni Politiit sapaammi unnukkut nal. 19.37 nalunaarfigineqarput.

Tamanna pigaartut pisortaata Hans-Peter Berthelsenip Sermitsiamut oqaluttuaraa.

Arnat taakku 30-t sinnerlugit ukiullit nalunaaquttap akunneri sisamat missaanni pisussimapput, aqqutinilu ilisarnaasersuutit nassaarisinnaasimanagit. Oqarasuaataatali attaveqarnerisigut taakku politiinut sianersinnaasimapput.

Arnat sumiissusertik oqaatigisinnaasimanngilaat, qatserisartut ornigutsinneqarput, inuillu arnat taakku marluk ujassallugit aallartinneqarlutik.

Taakku marluk qaarsup sivingarnani qatserisartunit nassaarineqarsimasut, qatserisartut pisortaat oqaluttuarpoq.

Arnat namminneq ammut aqqarsinnaasimanngillat, taarpallaarneralu pissutigalugu qatserisartut majuarnissaat ulorianartutut nalilerneqarnerisigut SAR-ip qulimiguua atorlugu annaassiniarneq aallartinneqarpoq.

Qulimiguulli annaassiniartup Nuummut suli apuutinngitsoq arnat namminneq ammut aqqarsinnaasimapput, taamaattumillu qulimiguulik utersinnaasimavoq, pigaartut pisortaat oqaluttuarpoq.