Tysklandip kansleriata tikeraarnerani Ukrainemi ikaartarfik Ruslandip saassuteqqikkaa

Tysklandip forbundskansleria, Friedrich Merz, sapaatimmi Ukrainep illoqarfiisa pingaarnersaannut Kyivimut tikippoq, tyskit illersornissamik suliffeqarfiisa qullersaat tikeraaqatigissallugit.

Nutaarsiassaqartitsivik Reuters taama allappoq, tikeraarnerlu „Ukrainemi præsidentimut Volodymyr Zelenskyjimut tapersersuinertut“ taaneqarpoq, piffissami Ruslandip Ukrainemik saassussinerulerfiata nalaaniummat.

Sapaammi aamma illoqarfik inunnik millionilinnik najugaqarfiusoq russit saassussinerannit eqqugaavoq. Merz Zelenskyjllu Ukrainemi Videnskabsakademimi ataatsimiinnerisa nalaani kalerrisaarutit aallartipput.

Ikaartarfissuaq Kyivimiittoq sapaammi saassunneqarpoq. Pineqartoq tassaavoq ikaartarfik Pivnitjny, ikaartarfillu Pivdenny peqatigalugit illoqarfiit pingaarnersaata kitaa kangialu taakku atassuteqartippaat. BBC allappoq sisamanngorneq tikillugu ikaartarfiit saassunneqarsimanngitsut.

Zelenskyj Merzimut oqarpoq saassussinerup nalaani Kyivimi innuttaasut „ullut unnuaallu amiilaarnartut“ misigisaraat.

Tysklandip naalakkersuisuinut qanimut attaveqartut oqaatigaat Merz Kievimi iliuusissanik saqqummiussissasoq, ilaatigut sakkutuunut 1 milliard euronik aamma nukissiornermut iluarsaassinissamut 350 million euronik tapiissuteqarnissaq pillugit.

Reuters naapertorlugu ilimagineqarpoq tikeraarnermi timmisartunik assigiinngitsunik ataatsimut tunisassiornissaq pillugu inaarutaasumik isumaqatigiissuteqartoqassasoq.

- Ullumi Kyivimut aallarpunga Ukraine sapaatit-akunnerini tulliuttuni uagutsinnit tapersersorneqarnissani pisariaqartilluinnarmagu, Merz oqarpoq.

Nangilluni allappoq russit sakkutuui illoqarfinnik, illunik kiassartarfinnillu qaartartumeeriuartut.

- Rusland unitsinneqanngikkuni „siusinnerusukkut kingusinnerusukkulluunniit“ uagutsinnut saassussissaaq. Præsident Zelenskyjmut ullumi oqassaanga: Ikiuuttuarnissarput naatsorsuutigisinnaavarsi.

Ukrainep dronenik, missilinik taakkununngalu qarasaasuakkut programminik sanaartornissamut Tysklandimut isumaqatigiissut qanittukkut naammassiumaaraa, Zelenskyj Merzimik telefonikkut oqaloqateqarnermini pingasunngornermi oqarpoq.

Reuters naapertorlugu ilimagineqarpoq dronet timmisartunit aqunneqartartut akiorniarlugit dronet piaartumik sananeqassasut. Taama sanaartorneq tyskit illersornissamut suliffeqarfissuata Quantumip iluatsittumik ingerlattareerpaa.

Septembarip naanerani præsident Zelenskyj oqarpoq Ruslandip septembarimiinnaq dronet Shahed 2730-it aallartissimagai, taakkunanngalu 1500-t nakkartinneqarsimasut imaluunniit sakkutut atorneqarsinnaajunnaartinneqarsimasut.

Dronet Shahed Iranimi sanaajupput Ruslandimillu atorneqarlutik.

RITZAU