Kinguaariit pingasut Narsamut angerlartut

Laila Møller-Josefsen ukiuni 45-ni pisortani atorfeqarsimasoq, ilaatigut Namminersornerullutik Oqartussani Namminersorlutillu Oqartussani atorfiliusimasoq, ukiut 30-t sinnerlugit Nuummeereerluni 2023-mi Narsamut uteqqinniarluni aalajangerpoq.

- Siullermik qitornakka ernuttakkalu pivakka. Aamma pinngortitaq illoqarfillu nipaatsoq. Nuanneqaaq. Avammut qiviariarit - avatangiisit!, oqarlunilu illunnguamini aappaluttumi igalaap tungaanut tikkuarpoq.

Taamaalilluni Laila Møller-Josefsen qitornani pingasut, ukiualuit tamatuma siorna meeqqatik ilagalugit illoqarfimmut meeraaffigisimasaminnut utersimasut, malippai.

- Nuummi ilaqutariittut takunissatsinnut piffissaqanngisaannarsimavugut. Qitornakka ullaakkuinnarluunniit meeqqatik meeqqerivimmukaanniarlugit nalunaaquttap akunnera ataaseq atortarpaat, taanna oqaluttuarpoq.

Laila Møller-Josefsenip illuata eqqaani aqqusinikkut ujaraarartalikkut biilinik ingerlasoqaraangat pujoralaartaraluartoq Narsami biileqangaarneq ajorlunilu ulapittoqanngilaq.

Laila Møller-Josefsen Qullissani 1953-imi inunngorpoq. 1977-imi erni ilagalugu Narsamut nuuppoq. Taamani aalisarneq annertuvoq, eqqaamavaa. Illoqarfik inuussutissarsiornerlu ingerlalluarput.

- Kikkut tamarmik sanaartorput, kikkut tamarmik sulisarput. Taamanikkut periarfissat amerlanerujussuupput - 90-ikkunnili ajorsiartulerpoq. Saarulliit taamani tammarsimassasut eqqoriarpara.

Uini 1991-imi Namminersornerullutik Oqartussani atorfinimmat meeqqani pingasut uinilu ilagalugit Nuummut nuuppoq.

Illoqarfik allanngortoq

Laila Møller-Josefsenip ilaqutaasalu illoqarfiit pingaarnersaannut nuunnerannit ullumikkut ukiut 35-t qaangiupput. Laila Møller-Josefsenip qitornai eqqissisimanermik kissaateqartut meeqqaminnullu Narsami meeraanerminnitut kiffaanngissuseqarnissamik kissaateqartut, uterniarlutik aalajangerput.

Laila-Møller Josefsenip 2021-mi soraarninngortup malinnaanissaa pissusissamisoorpoq.

- Maani illoqarfimmi pisiniartartut ikittuinnaapput. Maanna maanga nuukkama Nuuk Centerimut isernissaraluunniit quilertagipajaartarpara. Isipallariarluni, isumagisassat isumagipallariarlugit anipallattarnissaq pisariaqartarput, taanna oqarpoq.

Nuummiit ullunik tallimanik kinguaattooreerluni 2023-mi juunip arfineq-pingajuanni Narsap qulimiguulinnut mittarfianut mippoq, taamanimiillu tassani najugaqalerpoq. Nuannarigaluarlugu illoqarfik ilaqutariit uterfigisaat allaaneruvoq.

- Uteratta inissiarsuit affaat assiaqusersorneqarsimapput — tamanna annernarpoq, Laila Møller-Josefsen oqarpoq.

1977-imi inuit 1.894-it illoqarfimmi najugaqarput. Naatsorsueqqissaartarfik naapertorlugu ullumikkut 1.241-t tassani najugaqarput.

USA-mik illersornissamut isumaqatigiissut nutarterneqarmat Narsarsuarmilu Amerikamiut sakkutooqarfiata ammarnissaa ilimagineqarmat, Laila Møller-Josefsenip illoqarfimmiut amerlanerit assigalugit illoqarfiup siunissami qanoq ineriartortinneqarumaarnera pissanngatigaa.

- Naluarpummi, taamaammat ernumavugut, taanna oqarpoq.

- Maaniiginnassasugulli isumaqarpunga.