Qeqertalimmi qinikkat ataatsimiinnerminni 425.000 koruuninik atuisut

Kommune Qeqertalimmi kommunalbestyrelsimut nunaqarfinnullu aqutsisunut qinikkat aasami sulinngiffeqarneq sioqqutilaarlugu, Qeqertarsuami naapillutik ataatsimiipput. Ataatsimiinnerni kommunip pisortaanera aamma aningaasaqarnermut pisortaq peqataasut, allagaatini Sermitsiap pissarsiaani allaqqavoq.

Qeqertarsuarmiinnermi kommunalbestyrelsimut ilaasortat 14-it nunaqarfinnullu aqutsisunut ilaasortat aqqanillit najuullutik peqataasut, kommunip paasissutissaataani ersippoq.

AAMMA ATUARUK:

Kommune Qeqertalik millionilikkaanik atuivallaartoq

Kommunalbestyrelsimut ilaasortat juunip arfineq-pingajuanit aqqarngat ilanngullugu Qeqertarsuarmiipput. Nunaqarfinni aqutsisunut ilaasortat ullormik ataatsimik sivikinnerusumik Qeqertarsuarmiillutik juunip qulingani angerlakaapput.

Kommunalbestyrelsi Qeqertarsuup katersortarfiani juunip aqqarnganni ileqquusumik ataatsimiippoq. Qinikkat ulloq taanna sioqqullugu ataatsimoorlutik kommunimi pissutsit pillugit ataatsimiipput. Tamanna aamma ukiup tullissaanut missingersuutissat pillugit isumasioqatigiinnertaqarpoq.

Qulequttat eqqartorneqartut ilaatigut tassaapput: Eqqagassalerineq, siunissami ineriartornissaq aamma ajornartorsiutaasinnaasut, sanaartugassat  qatserisartoqarnerlu.

Qinikkat atorfilittallu Qeqertarsuarmiinnerat kommunimut 425.136,03 koruuninik akeqartoq allagaatini misissuinermi paasinarsivoq.

Aningaasartuutit agguataarnerat

AAMMA ATUARUK:

Qeqertalimmi borgmesteri: Akileraarut qaffaqqinneqariaannaavoq

Qinikkat atorfilittallu aggerfimminnit Qeqertarsuarliarnerat Qeqertarsuarmiillu angerlaqqinneranni angalaneq aammalu Qeqertarsuarmi ineqarnerat katillugit 349.859 koruuninik akeqarpoq. Tassunga akimut ilaavoq angallassinissamik isumaqatigiissuteqarfigisaraluap atorniarunnaarneranik kalerriinnginnermi angallassisussaraluamit kommunimut akileeqqusissut 17.500 koruuninik aningaasartalik.

Qinikkat atorfilittallu ullormusiaat ulluni taakkunani 30.084,19 koruuniupput.

Kommuni oqalutsimik avataanit aamma attartorpoq. Tamanna 23.000 koruuninik akeqarpoq. Taassuma sullissinera angalaneralu taama akeqarpoq.

Qinikkat aamma Qeqertarsuarmi akunnittarfimmi, Hotel Disko Islandimi, unnummi ataatsimi burgerinik, pastanik, fish n' chipisinillu nerilluataarnerminni sodavandituupput. Kommuni akunnittarfimmut unnummi tassani 19.656 koruuninik aningaasartorpoq.

Qinikkat ataatsimiillutik ataatsimoorneranni sutugassat, Pilersuisup illoqarfimmi pisiniarfiani aamma pisiarineqarput. Taakkua 2536,84 koruuneqarput.

Borgmesteri: Naapinnerput iluaqutaassaaq

Kommune Qeqertalimmi kommuanalbestyrelsi ataatsimiikkaagami attaveqaatit atorlugit ataatsimiittarpoq. Ukiumulli marloriarlutik qinikkat naapillutik ataatsimeeqatigiittarnerat ileqquusoq borgmesteri, Simigaq Heilmann (D), Sermitsiamut nalunaarpoq.

- Ulluinnarni atukkat sumiiffinni qinikkanit ilisimaarilluinnarneqartut qanimut naapilluni ataatsimeeqatigiillunilu isumasioqatigiinnermi annertuumik paasisaqarfigisarpagut.

- Aappaagussamut missingersuusiornissamut pingaarnersiuillunilu aningaasaliissuteqarnissamut qanimut naapilluni ataatsimiinneq pissarsiffiulluarpoq tamannalu Kommune Qeqertalimmut ataatsimoorussamik iluaqutaajumaarpoq, borgmesteri allappoq.