Qeqertalimmi borgmesteri: Akileraarut qaffaqqinneqariaannaavoq

Kommune Qeqertalik aningaasaqarnikkut ilungersuuteqartuarsinnarpoq. Kommunimi qinikkat sapaatit akunnerisa siuliani Qeqertarsuarmi katersuullutik ataatsimiipput. Ukiup sisamararterutaani siullermi missingersuutit 18 millionit koruuninik sipporneqarnerat tassani oqaluuserineqartunut ilaavoq.

- Aningaasaqarnikkut eqqumanerunissaq annertuumik pisariaqartinneqartoq takusinnaavarput, kommunimi borgmesteri, Simigaq Heilmann (D), Sermitsiamut oqarpoq.

AAMMA ATUARUK:

Kommune Qeqertalik millionilikkaanik atuivallaartoq

Aningaasaqarnikkut taama inissisimasoqarnera tunngavigalugu qinikkat iliuusissamik pilersaarusiortoqarnissaanik aalajangiipput. Sippuinerunissarmi kissaatigineqanngilaq. Sippuinnginnerunissaq pillugu kommuni arlalinnik iliuuseqassasoq, kommunimi akisussaanerpaaq oqarpoq.

- Aningaasaqarnerup aqunnissaanut malinnaaffiginissaanullu nukittunerulersitsinissaq suliassat tulliuttut ilagaat. Suleriutsit aningaasaqarnermik nalunaarusiornermi atorneqartartut nutartissapput, taassuminnga sulineq maanna ingerlanneqarpoq.  

- Sulisut aningaasanik aqutsinermut pikkorissarlugillu nukittorsarneqarnissaat suliassanut ilaavoq. Missingersuutinik malinninnissamut tunngasunik, Simigaq Heilmann oqarpoq.

Akileraarut nikeqqissinnaasoq

Kommunip aningaasatigut pitsaanngitsumik inissisimanera tunngavigalugu akileraarut tamakkiisoq maanna 42 procentimiittoq qaffanneqarsinnaasoq, borgmesterip ilimasaarutigaa.

- Akileraarummik qaffaasoqarsinnaanera kommunalbestyrelsip ammaffigaa. Taamaammat missingersuusioqqinnissatsinnut naatsorsuutigaara aamma taassuma oqaloqatigiissutigineqarnissaa, Simigaq Heilmann oqarpoq.

Kommuni Qeqertalimmi akileraarut tamakkiisoq ukiualuit matuma siornatigut 44 procentimiippoq.

"Uanga killormut paasivara"

Kommuni ukiup matuma qaammataani siullerni pingasuni, tassa januaarip aallaqqaataanit marsip naaneranut, ingerlatsinermini katillugit 162,2 millionit koruuninik aningaasartuuteqarpoq. Ingerlatsinermi isertitat taakkunannga ikinnerupput, 159,2 millionit koruuniugamik. Tamanna ataatsimiissutini allaqqavoq. 

Taama killiffeqarneq ilungersunannginnersoq Sermitsiap borgmesteri aperaa.

- Uanga killormut paasivara taanna.

Qanoq? 

- Siornamit ajunnginnerulaartut, Simigaq Heilmann oqarpoq.

Kommunip siorna piffissani taakkunani ingerlatsinerminut aningaasartuutai 154,4 millionit koruuniupput isertitaalu 160,8 millionit koruuniullutik, taamaammat kommunip angusai siorna pitsaanerupput.

Aningaasartuutissat suli kisitsisitaqanngitsut

Naak kommuni aningaasameeraluartoq pilersaarutaasumik suli aningaasartuutissaqarpoq. Kommunip allaffia Aasianniittoq oqoqarpoq, taamaattumik atorfillit Aasianniittut illoqarfimmi siammarlutik allaffeqartiterput. Tamannalu aningaasatigut aamma akisussasoq, sulilu akiligassaq tamakkerluni paasineqanngitsoq, borgmesteri oqarpoq.

- Taakkua aningaasanik malitseqartussaapput. Massakkoqqissaaq qanoq naleqarumaarnerat oqaatigiuminaappoq.

Tassani allaffinnik attartorneq oqummillu akiuineq pineqarput.

Sippukkat

Ingerlatsiviit arlallit aningaasanik atuivallaarsimasut naatsorsorneqarsimapput. Tamanna qinikkanut ataatsimiinnermi aamma ilisimatitsissutaavoq.

Ingerlatsivik Inuit 9,7 millionit koruuninik, Inoqarfik 5 millionit koruuninik Inualu 4,6 millionit koruuninik aningaasanik missingiussinermit atuinerupput. Timi Tarnilu allatorluinnaq inissisimavoq, missingersuutaasunit 1,3 millionit koruuninik atuinikinnerusimagami.

Isumaginninnermut, soorlu utoqqarnik passussinermut, avatangiisinut ingerlatsinermullu tunngasut atuivallaarnerni peqqutaanerpaasut ataatsimiissutissap nassuiaataani atuarneqarsinnaavoq.